Di nyaom biai pataom iek veik bruk tacei ba jalan peih ngak sarak thun 2023, padang ngak sarak thun 2024 peih tabiak di harei 4/1, Bí thư Tỉnh ủy Trà Vinh Ngô Chí Cường caong khin brei ngak khang bruk salih birau gah hành chính saong salih birau bruk buh jien tame pablei salih; jhul khang bruk salih pandar so; patagok prein khang, pandar siam dom prein khangpiah ngak jeng prein khang birau patagok khang kajap. Abih di nyu, urang ngak praong njauk brei pasiam bruk “ 4 oh” nan lac: oh sahaneng mboh piah ngak, pakat angaok tacei tabiak blaoh min oh ngak atau ngak suai; oh atau suai pambuak bruk piah ngak; hu peih ngak min oh tui iek.

Ong Nguyễn Việt Cường - Phó Akaok Cục jalan nduac samar, Mintri Jalan mbak pajeng ba brei thau lac, tal urak ini bruk peih mbaok taneh (GPMB) pataom mek taneh ka danak dak jalan vành đai 3 TPHCM di dom bhum palei ka oh hu ngak salah. Dalam nan: Long An mek hu 98%, TPHCM mek hu labaih 97%, Bình Dương 82% saong Đồng Nai bahrau mek hu labaih 6%. Nan ye, tỉnh Đồng Nai lac labik hu bruk pataom mek taneh bier di abih dalam dom labik hu danak dak nao tapa. Tui UBND tỉnh Đồng Nai, harei 8/1 anak tal, huyện Nhơn Trạch meda peih bruk biyar jien mbang ka 1 ka 512 baoh sang. Abih tih yaom jien biyar mbang ini lac labaih 500 tỷ đồng.

LĐLĐ TPHCM hu caga blaoh tani tanat bruk sangka kuhria ka dom urang daok tavak jien bilan atau oh hu jien thuong tet. Dalam nan, LĐLĐ ban raya hu caga 34 tỷ đồng, LĐLĐ pakat quận, huyện caga 95 tỷ đồng piah peih ngak dom bruk sangka ka urang ngak. Langiu di nan, dom cong ndoan cơ sở jeng peih bruk sangka di đơn vị tui prein di drei; tui nan jak ba urang ngak brei sangka tal urang đoàn, urang ngak.

Dom harei ini, palei rik thu di puk Cảng (ban sit Trần Đề, huyện Trần Đề, tỉnh Sóc Trăng) daok chreih chrai ngak dom pandap rik thu pablei ka darak pasa Tết Nguyên đán. Palei rik puk Cảng lac labik danei angan ka bruk ngak saong pablei dom janih rik thu (ikan tasik) ngan haong yaom meng dom piluh ribau dong tal dom trieu dong yaok sa kg. Pandap rik di pak ini hu pablei tabiak rilo ka dom tinh, ban jaik taphia yau ye Cần Thơ, Bạc Liêu, Cà Mau, abih di nyu nan lac darak pasa TPHCM saong dom tinh gah Đông Nam bộ. Urak ini kanja palei daok pasang iek, hu jalan padang ngak dom pandap rik thu angan je piah cak rok patagok pandap panda OCOP.

Sơ Ilamu, The thao saong Dulich tỉnh Bình Phước daok peih ngak Labik parang iek, yaih khan ilamu- dulich – kaya mbang bingi di dom tỉnh, ban bhum Đông Nam Bộ thun 2024, thị xã Phước Long. Labik prang iek pataom hu 22 labik yaih khan dom pandap ilamu, dulich, pandap mbang bingi karei di dom tỉnh, ban: Tây Ninh, Đắk Nông, Đồng Nai, Bình Dương, Bình Thuận, Lâm Đồng, Ban raya Hồ Chí Minh saong Bình Phước. Bruk dom palei dalam bhum pambuak gauk peih bruk yaih khan dulich lac “ asar pambuak gauk” piah paglong bruk yaih khan labik rivang ma-in ka tuai damuai di bhum Đông Nam bộ.

Tạp chí Thời báo Du lịch (Times Travel) di Ấn Độ hu pok angan inem krung ilamo Luang Prabang, Bắc Lào lac sa dalam 50 labik gheih abih di dunya dalam thun 2023. Luang Prabang daok di angaok sa baoh kaoh hu vil val lac kraong Namkhan saong kraong Mekong, ngan haong biak rilo kiến trúc Hoàng gia, dom baoh paha meng kan biak gireih saong dom palei ngak meng kan. Bruk khik ramik saong patagok dom yaom glaong dom labik ma-in sinh thái, du lịch khang kajap saong vil val di Luang Prabang jeng hu tuai dunya taong yaom glaong. Luang Prabang oh lac ba mai bruk saron mbon di taneh ia trieu limen, bo daok lac labik padeih padai biak siam makre.

Pak harei hadei di mbang megei baoh taneh khang 7,6 di Nhật Bản, urang metai tagok tal 92 urang saong labaih 200 urang lahik. Di tỉnh Ishikawa lac labik gaok khat lahik trak abih hu 242 urang lahik oh ka mboh; labaih 30.000 baoh sang lahik điện saong 80.000 baoh sang di 13 ban saong ban sit kurang ia hacih… Thủ tướng Nhật Bản Kishida Fumio hu panuac ieu brei ba abih prein tabiak daong urang gaok bala. Yau nan min, bruk daok diuk di dom urang lahik dak tuk dak takik.

Trung Quốc ieu Mỹ ngak tui sanya taduan raok anek saih negar Trung Quoc daok di My, padeih mek bruk an ninh taneh ia piah patakik brei ka anek saih negar ini bac taa di Mỹ, tani tanat salamat saong kein lagaih tui njauk adat hukum di dom học giả, anek saih Trung Quốc di pak ini. Urang brei panuac di Mintri Ngoại giao Uông Văn Bân brei thau lac, bruk ngak kateik greik, pandar dom sinh viên mai palei negar ngak kan kandah tal kein lagaih tui njauk adat hukum di anek saih negar Trung Quốc daok pak ini, ngak kanjak jhak tal bruk pambuak gauk di dua taneh ia.