Kapul urang pan akaok ban Cần Thơ bahrau peih bruk nao rivang, alin pandap ka dom urang pablei salih di darak angaok kraong Cái Răng. Di pak ini, kapul hu jao 400 paok pandap, yaok paok  yaom 500.000 đồng, hu ahar, mứt saong jien mbaok, abih tih lach 200 triệu đồng, meng kadung jien jak ba di rahra. bruk alin pandap Tet ini oh lac bruk ngak yaok thun piah klah rabha saong pachreih ba mikva, bo daok brei mboh panuac sanya di ban dalam bruk khik ramik saong cak rok patagok dom yaom glaong ilamo meng kan.

Tal urak ini, dom palei dalam tỉnh Sóc Trăng ngak hu blaoh bruk brei brah daong ka sang kan kathaot, sang jaik si kan kathaot dalam tuk jaik tal Tết. Dahalau di nan, tỉnh Sóc Trăng hu rajaei buh brei 3.545 tấn brah yaom jaik 53 tỷ, brei ka sang kan kathaot saong sang jaik si kan kathaot di dom puk palei. Dom sang jeng brei mboh hatai bui sambai tuk taduan hu brah saong dhar phor Đảng, Rajaei, dom pakat karja sangka tal urang kan kathaot, piah oh thei njauk klaak veik gah likuk. Langiu di nan, dom urang ngak pahla hu daong yaok ratuh rabau pok pandap Tết piah alin hadiah ka urang gaok kan kandah. 

Akaok thun 2023, dalam huyện Lộc Ninh, tỉnh Bình Phước hu 242 sang kathaot, dalam nan hu 144 sang kathaot lac bangsa takik. Dalam thun tapa, huyen hu peih ngak pablak gam Danak dak bruk ngak negar cak rok patagok kinh tế - xã hội bhum bangsa takik saong bhum ceik gam haong Danak dak trun 1.000 sang kan kathaot lac mikva bangsa takik ngan haong phun jien jaik 215 tỷ đồng. Tapa nan hu samar drah daong ka urang bangsa takik cak rok patagok bruk ngak, mbang ngui, tani tanat raidiuk, tabiak truh kan kathaot khang kajap. Urak ini, dalam huyện hu trun 196 sang kan kathaot.

Viện Kiểm sát bhap bini TP.HCM bahrau peih bruk likau ma-ah saong brei thau cambaih bruk sahneng suan ka ongng Nguyễn Văn Khẩn (SN 1953, daok di phường Tân Tạo A, quận Bình Tân) njauk khởi tố oan 30 thun dahlau ka duas "bleik pachot blah mek drap ar bhap bini". Tapa nan, amuk Vũ Thị Xuân Nhuệ, Akaok jabat Thực hành quyền công tố, pasang iek langyah phúc thẩm án hình sự - Viện Kiểm sát bhap bini TP. HCM lambaok ka dom jabat peih bruk tố tụng, likau ma-ah ong Nguyễn Văn Khẩn, tui adat di Hukum  trách nhiệm bồi thường di Karja. Dahlau di nan, makna ba tal bruk cap mek oh njauk ngan saong ong Nguyễn Văn Khẩn lac kayua dom jabat tố tụng oh ka pasang iek, taong yaom ginup abih bruk ba tal ngak suan, ngak brei ong Khẩn hu duas yaom lac ong oh hu duas hagait..  

UBND huyện U Minh, tỉnh Cà Mau bahrau peih Harei tabiak mbaok “jao dom pandap panda, pandap taong cap ikan mbuan ngak metai abih”. Harei ini hu peih tabiak di xã Khánh Thuận – kapul pakat xã camriep di U Minh hu ba tabiak Sarak saong hu jalan ngak tantu cambaic laih piah pamaong tal, yah klak bruk pandar xung điện, kích điện dalam bruk taong mek ikan kaya tasik, kaya ikan dalam mblang hamu. Meng bilan 6/2022 tal urak ini xã Khánh Thuận hu 56 sang halain hatain jao xung, kích điện. Ong Huỳnh Minh Nguyên, akaok UBND huyện U Minh, jak ba rahra njauk paglaong hatai jang veik dalam bruk daong khik kaya ikan, ini jeng lac bruk khik ramik alam môi trường sinh thái, kayua kein lagaih di drei, di rahra.

Tổng thống Hàn Quốc bahrau brei thau lac Triều Tiên meda ngak dom bruk khiêu khích. Tui panuac di Tổng thống Hàn Quốc, dom bruk ngak nan, hu bruk ba phao ndao mai jaik jalan tapen negar, loa tame meng kapal haoh oh hu menuac peih, lih tame mạng atau ba tabiak dom khau tin ja piah ba tangin tame bruk pilih ruah urang ka quốc hội di bilan 4 tal. Dalam tuk nan, urang dang akaok đảng đối lập praong di Hàn Quốc, hu panuac ieu rajaei pasiam veik dom jalan talei pandiak pambuak dua gah Triều Tien. 

Meng puac thun 2026 New Zealand meda pakauk pandar dom janih kadaong suai lavik, kan palai pajoa dalam jru ngak gheih. Dom janih jru kadaong suai, atau janih jru hóa chất vĩnh cửu (PFAS) hu pandar dalam dom janih ngak gheih yau ye jru luak takau tangin takai, jru kuac bilau kang, kem nền, son môi saong chuốt mi. Nyu hu pabak tame piah ngak lamar kalik atau ngak ka jru ngak gheih hu khik sambo mau hu suai jang, janar jang saong pacang hu ia. Dom urang roh duah ilamo hu brei thau ka dom janih kanjak jhak ini biak kan piah palai pajoa, nyu meda pataom dalam rup pabhap saong dom janih daok ba tal jru mek di tanut biak glaong.

Khau tin di Karja Serbia brei thau lac takik di abih 4 uranaih matai dalam mbang tamuh ruak patuk ho gà di ban ine taneh ia ini. Tui Phaok Yam ndok sang iek ruak uraniah di Belgrade, jaik 70 uranaih njauk ruak ini, dalam nan hu labaih 40 adei njauk tame sang iek ruak. Dom bác sĩ mboh lac ruak patuk ini njom mbak khang kayua bruk klauk vaccine trun daok takik. Klauk vaccine caga ruak patuk lac bruk pacap ngak di Serbia. Min rilo amaik ame oh khin klauk ka anek di drei, ba tal dom mbang tamuh ruak dalam bhum./.