Tui ủy quyen di Thủ tướng Rajaei, Akaok Mintri Lao động - Thương binh saong Xã hội Đào Ngọc Dung bahrau mbaoh tangin tame Harak pathau khan Akaok negar ka bruk alin pandap ka urang hu buh prein ka cách mạng di tuk Tết Nguyên đán sak ine girai thun 2024. Tui nan, abih tih yaom jien piah alin pandap mbang ini lac jaik 450 tỷ đồng. Hu thau, yaom pandap 600.000 đồng alin ka dom urang hu buh prein ka cách mạng; yaom pandap 300.000 đồng ka dom urang thương binh, urang hu mbang tui sarak yau thương binh saong dom urang karei tui adat.

Mintri LĐTBXH brei thau, tal urak ini hu 62/63 tỉnh, ban, (lac kurang tinh Quảng Trị) hu payua pathau khan ka bruk jien bilan thun 2023 saong jien thưởng Tết Nguyên đán 2024. Tui nan, hu labaih 47 rabau 370 doanh nghiệp, gam haong 4 triệu 790 urang ngak hu khan brei thau bruk jien bilan, jien thưởng Tết 2024. Yaom jien thưởng kuhria rah tapa lac 6 triệu 850 rabau đồng sa urang, samu yaom jien thưởng tết thun blaoh. Yaom thưởng Tết Nguyên đán glaong abih thun ini lac 5 tỉ 680 triệu đồng sa urang, brei ka urang ngak bruk khik ramik pakat glaong di doanh nghiệp FDI di tỉnh Long An. Daok tết Dương lịch, yaom thưởng kuhria rah tapa lac 1 triệu 850 rabau đồng sa urang, tagok 49% duk haong thun blaoh. Yaom thưởng Tết Dương lịch glaong abih lac labaih 376 triệu đồng sa urang, brei ka urang ngak bruk khik ramik pakat glaong di doanh nghiệp hu phun jien negar langiu buh tame ngak mbang di tỉnh Vĩnh Phúc. 

Dom baoh sang pala njam patam di tỉnh Cà Mau daok samar drah trun pajaih pala piah raok Tết Nguyên đán. Meng bhum taneh glai U Minh atau di TP. Cà Mau, mikva jeng brei mboh hatai bui sambai kayua langik lagaih. Di xã Lý Văn Lâm, TP. Cà Mau hu dom sang pala tamekai piah pabak ka darak pasa Tết Nguyên đán. Mikva trun pajaih tamekai hu jaik 1 bilan, urak ini tamekai cak rok praong tagok siam. Bruk pala njam patam pabak ka darak pasa Tết oh lac daong ka rahra hu veik phun jien buh tame bo daok daong tani tanat pandap mbang pabak ka hatai caong di darak pasa Tết. Thun ini, langik daok lagaih, rahra pala njam patam di Cà Mau daok caong tame bilam pala njam patam pablei Tết hu siam mekre.

Karja saong bhap bini huyện Chợ Lách, tỉnh Bến Tre daok samar peih ngak dom jalan pacang ia mbak njaom tame piah khik caga taneh pala phun pajaih, bingu kiểng, phun mbang baoh praong di taneh ia piah pablei Tết. Huyện Chợ Lách hu taneh pala phun pajaih saong bingu kiểng, phun mbang baoh praong abih di taneh ia. Tal urak ini, dalam huyện khik hu labaih 6.100 ha bein phun mbang baoh, yaok pluh triệu bingu kiểng, phun pajaih dom janih pablei ka darak pasar dalam taneh ia. Meng hu 3 baoh kraong praong daok vil val lac kraong Tiền, kraong Cổ Chiên, kraong Hàm Luông nan ye karja saong rahra huyện Chợ Lách daok samar ngak dom bruk piah pacang ia mbak njaom tame.

Jaik 900 jalan di TP. Hồ Chí Minh ginup prein piah pandar sa binah takai jalan ngak labik khik radaih, pablei salih hu mek jien phí. Tui nan, dom jalan ginup prein pablei salih njauk praong meng 3m tagok. Tuk hu cih vạch, takai jalan daok veik brei ka urang nao takai praong takik di nyu 1,5m saong oh hu hagait pacang, tavak. Takai jalan, mbaok jalan hu parabha jeng 5 labik, samu haong yaom taneh tui kuhria di pak bhum nan piah kuri kuhria jien brei pah, dom labik jalan di pasak hu yaom glaong jang di labik langiu ban raya. Yaom jien biar abih brei ka bruk khik radaih lac 50.000 đồng, glaong abih lac 350.000 đồng/m2 yaok bilan. Tui kuhria, TP. Hồ Chí Minh meda pandar adat khik ramik mbaok jalan, takai jalan bahrau meng akaok thun 2024.

Dom ban praong di dunya brei patagok dom bruk khik caga sron mbon di tuk daok taduan raok thun bahrau 2024. Ini lac tukvak hu rilo bruk pataom gauk rilo menuac abih dalam thun saong jeng lac tukvak hu bruk khủng bố tatgok glaong. Mblang bein Thời đại di ban New York, Mỹ lac labik meda hu yaok triệu menuac mai pataom gauk piah salam uan thun bahrau. Karja ban ini daok tui iek mạng xã hội saong dom bruk ndom biai online piah duah tabiak dom bruk jhak piah caga pacang. Karja Đức, Pháp hu paglaong bruk caik hatai sangka gah an ninh tagok tanut glaong di abih. Dalam tuk nan, Mintri Nội vụ Tây Ban Nha hu ba tabiak dom jalan khik caga an ninh di pakat 4 lac pakat mbuan hu bala. Di châu Á, karja quận Shibuya di ban ine Tokyo, Nhật Bản brei klaak bruk yaok kadun veik melam palao thun klak, raok thun bahrau mbang ka 4 gam gam kayua huac oh hu salamat.

Tổng thống Ucraina Volodymyr Zelenskiy brei thau lac, ong hu ginum biai ka bruk saron mbon di Ucraina dalam mbang ieu phone ndom biai haong Giáo hoàng Francis. Tổng thống Ucraina brei thau lac, urak ini jalan ngak ini hu mbaok di labaih 80 taneh ia. Dalam tukvak anak tal, meda hu veik rilo taneh ia hu mbaok tame piah rik tame jalan ngak ini tuk hu ba tabiak gium biai di mbang nyaom biai meda hu peih tabiak di Davos, Thụy Sĩ dalam tukvak anak tal. Piah pabak veik dom siam lagaih di Ucraina, Giáo hoàng jeng hu payua sa urang đặc phái viên, urang Italia nao tal 4 taneh ia lac Ucraina, Nga, Mỹ saong Trung Quốc piah jhul khang bruk saron mbon. Anak bruk salam uan thun bahrau, Giáo hoàng jeng hu payua asal kadha di saron mbon, dalam nan ieu padeih dom bruk mesuh gauk, hu gam bruk mesuh metak di Ucraina.

Dom urang langyah kuhria mboh lac, patagok kinh tế di Đông Nam Á meda siam jang dalam thun 2024 min meda tagok oh samu gauk di dom taneh ia dalam ASEAN. Thun 2024 hu maong lac patagok GDP di dom taneh ia praong khang yau Mỹ saong bhum pandar jien euro meda suai jang 6 bilan akaok thun 2024 kayua dom bruk jien padai gam gam njauk khik catang veik. Patagok di Trung Quốc tui kuhria trun di thun 2024 kayua trun gah sang danaok taneh riya saong blei pandar dalam taneh ia. Tui nan, patagok di ASEAN+3 daok rilo bruk oh tantu dalam nan hu bruk kan kandah gah năng lượng dunya pambuak haong suy thoái kinh tế meda ngak kan ka abih bhum./.