Melam blaoh, di labik tasik Ocean Dunes di phường Phú Thủy, ban Phan Thiết hu rah tabiak bruk tamat Thun Du lịch negar 2023 “Bình Thuận – Pataom veik hijao”. Thun Du lịch negar 2023 hu labaih 200 bruk ngak ilamo, the thao, du lich, nghe thuat biak chreih chrai, siam makre, hu peih tabiak di tỉnh Bình Thuận saong 41 tỉnh, ban di dalam taneh ia, caik veik rilo bruk siam makre dalam hatai tuai damuai saong ayut saabat atah jaik. Mbang camriep, tỉnh Bình Thuận raok hu labaih 8 trieu 5 rituh ribau tuai saong jien mek tame meng bruk du lịch abih tih hu labaih 23.000 tỷ đồng, tagok jaik dua mbang dut saong thun 2022. Tapa nan, gah du lịch hu yaih khan thaot bingu taneh ia, anek manuac Việt Nam tal ayut saabat di grauk labik. Mban peih bruk hu jao bruk dang peih ngak Thun Du lịch negar thun 2024 ka tỉnh Điện Biên.

Bruk jit ruak njaom mbak jeng daok rah tabiak dalam srau kadau, kan kuhria dahlau hu, dom jit praong daok tagok bruk hu mbaok, Việt Nam daok dang anak bruk mbuan njaom mbak di rilo jit ruak. Nan lac panuac brei thau di tuk mít tinh pachreih tui Harei dunya pacang caga jit ruak ngan saong kadha “abih menuac sia ba gauk tame pacang caga jit ruak”, peih tabiak di harei kabroi. Dalam tuk dunya dak harei dak tagok, dom jit praong hu biak rilo biến chủng, biến thể bahrau gam gam salih karei tapa tukvak. Taphia di nan, dom ruak daok hu yau ye pandiak tabiak darah, tangin takai cambuai, sởi jeng tagok biak rilo. Dom menuac njauk ruak pandiak tabiak darah tagok jang labaih 10 mbang dalam 10 thun tapa, saong tui kuhria, meteh dom menuac sia di dunya mbuan njauk ruak yaok thun.

Meng harei 1-1-2024 anak tal, urang umo labaih 75 thun tuk nao iek ruak, taong ruak di labik y tế hu brei iek ruak, taong ruak dahlau oh lac ginup umo 80 thun yau dahlau deih. Hukum iek ruak, taong ruak thun 2023 hu brei pandar meng harei 1-1-2024 anak tal, pandar rilo adat bahrau ka bruk pabak harak iek ruak, taong ruak, brei iek ruak dahlau meng atah. Hukum iek ruak, taong ruak dahlau di nan brei adat iek ruak taong ruak dahlau ngan haong dom urang cấp cứu, uranaih umo ala 6 thun, urang jaoh jo trak, urang meng ginup umo 80 thun tagok, urang hu buh prein ka cách mạng, urang kumei matain. Hukum iek ruak, taong ruak thun 2023 pasiam veik, pabak dom urang hu brei iek ruak, taong ruak dahlau, dut saong adat dahlau di nan lac urang meng ginup umo 75 thun saong urang jaoh jo biak trak.

Tỉnh Đồng Nai urak ini hu labaih 29 rabau urang ngak lac urang bangsa takik daok ngak di dom sang mac, xí nghiệp dalam dom labik ngak kong. Ginum biai "Urang ngak lac urang bnagsa takik mai ngak di Đồng Nai – bruk anak meta saong jalan langyah" bahrau peih tabiak lac labik ndom biai praong piah ka Đồng Nai taong yaom njauk bruk di anak meta, raidiuk di urang ngak lac bangsa takik di dalam tỉnh; gam haong nan, caik hatai tui pang panuac di dom urang roh duah, jabat ngak tabiak sarak, jabat khik ramik dom pakat hu pambuak pagam tal bruk bangsa, sarak bangsa, khik ramik karja ka bruk bangsa. Tapa ginum biai, UBND tỉnh hu jalan piah patabiak sarak karei piah daong samar drah ka urang ngak lac bangsa takik mai ngak di Đồng Nai piah ka mikva sahanang hatai ngak bruk, cakrok kinh tế sang, pok panuac tagok Trung ương ka dom sarak brei ka urang ngak lac urang bangsa takik panduan mai ngak bruk di Đồng Nai.

 Di tuk tabung glaong jhung thun saong Tết Nguyên đán jaik tal, dom tuai tapa mblang kapal haoh Tân Sơn Nhất meda tagok rilo veik, samu haong tuk dahlau jit COVID-19, nan lac hu meng 860 - 900 mbang par yaok harei. Mblang kapal haoh dunya Tân Sơn Nhất saong dom gah pambuak tal di TP. Hồ Chí Minh daok ba tabiak rilo jalan ngak piah duh siam di abih ka bruk nao mai di bhap bini dalam tukvak nan. Meng kuhria mboh dahlau lac thun ini tuk tabung glaong meda hu tal 135 rabau tuai sa harei, mblang kapal haoh Tân Sơn Nhất hu ba tabiak rilo jalan ngak, yau ye pandar jalan ngak bahrau A-CDM piah peih ngak abih tih dom mbang par, atau ba tame pandar dom hệ thống tame tabiak negar tự động piah duh ka tuai hu siam jang.

Jalan pasei meng ban Phòng Thành Cảng tal ban Đông Hưng di bhum tự trị bangsa Choang Quảng Tây, Trung Quốc jaik jalan tapen negar Việt Nam atah abih tih 47 km, nduac samar hu 200 km sa maong bahrau hu ba tame pandar. Ini lac jalan pasei nduac samar camereip abih di Trung Quốc pambuak tapak tal tapen negar Việt - Trung, dui katut panak tukvak nao mai di 2 ban meng 60 minit trun daok 20 minit saong pambuak Đông Hưng – ban tapen negar haong Việt Nam – tame jalan pasei nduac samar atah 42.000 km di Trung Quốc. Dalam vaktu camereip peih tabiak, jalan hu 6 radaih pasei pajeng tuai yaok harei.

Talei pambuak bruk di Nga saong Ấn Độ biak tani tanat, kim ngạch pablei salih di dua taneh ia meda yam tapa 50 tỷ USD di puac thun ini. Dua gah brei thau bruk pambuak gauk di Nga - Ấn Độ urak ini daok biak tani tanat, njauk gauk saong lagaih. Ấn Độ saong Nga urak ini daok pambuak gauk dalam dom gah quốc phòng, năng lượng hạt nhân, vũ trụ gam haong rilo gah karei, Ngoại trưởng Ấn Độ brei thau lac, kim ngạch pablei salih di Liên bang Nga saong Ấn Độ meda ngak jeng 100 tỷ USD dalam dom thun anak tal, mayah abih gah jeng kham marat.

Thun 2023, brei mboh bruk siam veik, tagok biak rilo di gah du lịch Lào hadei di jit praong Covid-19, tapa bruk tuai mai tagok khang tapa tanut ba tabiak. Dalam nan, dom tuai dang akaok mai tal Lào lac Thái Lan, patui di nan lac Việt Nam, Trung Quốc, Hàn Quốc saong Mỹ... Rajaei Lào jeng sangka bruk padang ngak pasiam jalan mbak, hạ tầng, abih di nyu lac pambuak jalan kapal haoh piah ba mbuan lagaih ka tuai dunya mai tal Lào. Langiu di nan, taneh ia ini jeng daok caga peih pakak sa mblang kapal haoh pakat dunya bahrau daok jaik Bhum kinh tế Tam giác Vàng di tỉnh Bokeo./.