Bruk padang quy hoạch Thủ đô saong ramik veik Quy hoạch haong gauk padang ngak Thủ đô brei hu siam lagaih, njauk haong bruk di anak meta saong hu salih birau piah pasiam dom tavak tavaiy di urak ini, ba Hà Nội patagok, salih birau, ilamu. Nan lac bruk hu manuac sia jeng yau dom urang QH sangka caik hatai tuk Danak dak Hukum Ban ine ( pasiam veik) hu pok tagok di mbang nyaom ka 6 daok peih tabiak. Meng labaih 8 triệu urang, menuac sia Hà Nội birau samu meteh duk saong Ban raya HCM saong takik jang ban ine di rilo taneh ia angaok dunya. Yau nan min, menuac sia daok oh sumu gauk, ba tal gal jalan rilo thun tapa. Meng bruk nan, rilo urang QH lac, bruk padang quy hoạch saong pasiam veik Hukum Thủ đô njauk brei ngak dahlau piah patagok jalan mbak praong birau saong langyah hu lagaih bruk radaih nao mai di urang.

Taong lãnh sự quán Australia pambuak haong ban Cần Thơ bahrau peih bruk pathau khan ka paok daong dom doanh nghiệp bhum ĐBSCL ngan haong angan ieu lac “Jalan pambuak haong doanh nghiệp: lagaih haong bruk biến đổi khí hậu”. Danak dak hu peih ngak di bhum ĐBSCL vaktu 2023 – 2025 saong Rajaei Australia meda daong kadung jien buh tame lac 2,5 triệu đô la Úc (AUD). Meng thun 2000 tal urak ini, Australia hu buh tame bhum ĐBSCL 650 triệu AUD piah paglaong cơ sở hạ tầng, jhul khang bruk buh jien tame, urang ngak, salih jalan ngak bahrau.

Meng hatai kham merat glong dalam bruk peih ngak dom jalan ngak di dom Danak dak pakat negar, tal abih bilan 10 meng blaoh, tỉnh Ninh Thuận peih brei phun jien hu 73% bruk ba tabiak saong phun jien di karja 36%. Abih di nyu lac, dom sarak peih ngak 3 Danak dak pakat negar hu ngak salah, ngak njauk tui hukum piah jhul pasamar bruk peih ngak dalam tukvak anak tal.

Bruk Festival hadang Cà Mau saong Mbang nyaom pambuak pandap panda OCOP bhum ĐBSCL hu asal kadha “Festival hadang Cà Mau 2023 – Hadah hadai angan je Việt” meda hu peih tabiak meng harei 10-13 bilai 12 anak tal. Tui ong Nguyễn Minh Luân, Phó akaok UBND tỉnh Cà Mau, Festival hadang oh lac bruk kinh tế bo daok lac harei ilamo, xã hội ndung bak bruk pambuak rilo gah dalam saong langiu taneh ia. Tỉnh Cà Mau thau lac Festival hadang lac pasak di bruk ngak mbang ini. Hadang Cà Mau hadah hadai angan je Việt saong hadang Cà Mau jeng rik daong paglaong yaom hadang Việt tabiak dunya.

So Ilamu, The thao saong Dulich tỉnh Trà Vinh birau peih parang iek dom bruk pahadar Harei Ilamu Viet Nam 23/11. Tỉnh Trà Vinh urak ini hu 34 inem krung sajarah pakat tỉnh, 16 inem krung sajarah pakat negar, 1 drap ar pakat negar, labaih 13.000 pandap saong 6 drap ar ilamu phi vat the hu ba tame angan pakat negar. Bruk nan hu rik daong tame biak siam ka bruk pato pakai, khik ramik saong patagok dom ilamu meng kan, anit taneh ia, ranam cach mang di tỉnh.

Tapa mbang pasang iek hu pathau khan di Mintri Jalan mbak pajeng ba Indonesia brei thau lac taneh ia rilo rahra abih di Đông Nam Á ini meda mboh sa bruk “nao mai praong” ngan haong dom urang nao mai tagok rilo di tuk Noel saong raok thun bahrau 2024. Urak ini rajaei Indonesia daok caga dom jalan ngak piah patakik bruk gar jalan, jang yau bruk pasang iek, bảo dưỡng, peih praong dom jalan piah tani tanat salamat ka jalan mbak nao mai.

Kuhria tal melam 21/11, labaih 4.000 urang di dom bang di takai tasik gah timun Malaysia brei panduan ba tal labik hu salamat hadei di dom mbang hajan praong rah tabiak gam gam ngak brei ia tagok glaong, urang njuak panduan ba nao labik karei daok tagok veik. Karja bang Terengganu brei thau, labaih 4.000 urang hu ba nao daok di 28 pasak daong salamat. Dalam tuk nan di bang Kelantan, dom urang panduan ba nao labik karei daok tagok veik labaih 300 urang.

Tui khau tin ngoại giao Cata brei thau lac, meng bruk dang tabiak di Cata, Israel saong gah Hamat di Palestin daok dalam tukvak ginum biai puac abih saong daok yam jaik tal bruk padeih cuh. Tui nan, bruk padeih cuh dalam rilo harei, salih veik lac Hamat peih palao 50 con tin daok njauk Hamas cap khik, saong Israel jeng peih palao ka dom rahra Palestin.