Thủ tướng Rajaei bahrau brei tapa bruk Quy hoạch tỉnh Bà Rịa – Vũng Tàu (BR-VT) tukvak 2021-2030 pamaong tal thun 2050. Bruk Quy hoạch ba tabiak jalan padang ngak tỉnh BR-VT cak rok patagok taong abih gah, jeng lac sa dalam dom bhum hu prein khang cak rok patagok hu yaom glaong abih di bhum Đông Nam Bộ, lac pasak kinh te tasik dang akaok di dalam taneh ia. Dalam nan tal thun 2030, BR-VT meda lac hu ginup tanut chuan piah jeng ban di Trung ương, ramik ngak đô thị rilo pasak, kết cấu hạ tầng rilo jalan ngak. Khik ramik khang kajap labik dang dalam nyaom 10 bhum palei hu GRDP saong abih tih phun jien mek tame ka kadung jien kanja glaong abih dalam taneh ia.

Urang raong hadang, ikan pra di ĐBSCL urak ini daok dang anak bruk mbuan khat trak kayua yaom pandap mbang ka ikan jeng daok tagok glaong meng akaok thun tal ini. Di pasak ikan pra Hồng Ngự, tỉnh Đồng Tháp, yaom ikan pra daok trun tal 26.500 đồng/kg. Dalam tuk jien raong yaok ký ikan pra lac labaih 27.000 đồng. Daok di tỉnh Sóc Trăng, dom sang raong hadang daok sahneng kuhria tuk tame bilan raong bahrau. Kayua yaom dom janih piah raong ikan daok tagok glaong. Gam haong nan, bruk raong ikan hu siam daok di tanut biak biar kayua langik tasik, halau ia, jit ruak… rah tabiak srau kadau. 

UBND xã An Tức, huyện Tri Tôn, tỉnh An Giang bahrau pabak brei paok jien daong blei mac jamraik, pandap ngak nong piah ka 60 baoh sang mikva bangsa Khmer kan kathaot salih bruk ngak. Tui nan, kuhria rah tapa, yaok baoh sang taduan hu takik di nyu oh tapa 10 triệu đồng piah blei dom jamraik mac moc, pandap ngak nong piah ngak mbang pablei salih, ngak jit vu, pabak ka raidiuk yaok harei… abih tih phun jien daong jaik 600 triệu đồng, meng kadung jien kanja pakat negar. Bruk ngak ini daok dalam Binah 1 di Danak dak bruk ngak negar ka cak rok patagok kinh tế - xã hội bhum bangsa takik saong bhum ceik tukvak ka I (2021 – 2025).

Tỉnh Vĩnh Long daok kham merat kuhria caga ka harei pataom Du lịch mbang ka III peih tabiak meng harei 23 tal harei 25/12 tal. Ini lac tuk piah ka Vĩnh Long pok meyaom pandap du lịch karei di tỉnh; jeng lac tuk peih bruk pablei salih, buh jien tame ngak mbang, patagok bruk pambuak gauk, daong palagaih piah yaih khan kaya pandap, klah rabha ilamu, yaih khan labik nao tal, pambuak gauk di dom kapul ngak mbang gah du lịch dalam nyaom pambuak gauk patagok du lịch dom tỉnh, thành ĐBSCL haong TP. Hồ Chí Minh.

Meng phun jien padang ngak Danak dak 6, di Danak dak bruk ngak negar cak rok patagok kinh tế - xã hội bhum bangsa takik, tukvak 2021 - 2025,  miuyim tỉnh Sóc Trăng pambuak haong Pasak Ilamo - Thể thao - Truyền thanh saong Kapul Daong gauk urang Lo ban Sóc Trăng peih bruk parang me-in, padang ngak veik “tết Nguyên tiêu” saong peih ngak “Harei pataom pakacah gom” tui adat meng kan. Harei tết Nguyên tiêu meng lavik mai lac ilamo siam gheih meng kan, adat cambat, tanarakun di urang Lo. Nguyên tiêu hu peih tabiak tuk langik tame bilan xuân, njauk harei ia bulan bak baoh camriep di sa thun bahrau, lac tukvak piah ka yaok urang hadar veik muk kei, caong hu haniem phul, siam makre, caong ka sang hu salamat dalam thun bahrau.

Mesup ini (18/12), Triều Tiên cuh gac sa baoh tên lửa oh ka thau lac janih hagait, dom mon hadei di tuk cuh tên lửa đạn đạo jalan katut panak di melam blaoh. Tui Kapul dang akaok bol lin Hàn Quốc, Triều Tiên cuh sa tên lửa đạn đạo dalam tuk mehit lac Triều Tiên daok caga cuh sa tên lửa đạn đạo liên lục địa (ICBM), meda ba tui đầu đạn hạt nhân. Gah Japon brei thau, tên lửa di Triều Tiên nyu laik gah langiu bhum đặc quyền kinh tế di taneh ia ini.

Adit blaoh, sa mbang langik laar khang abih kuhria meng kan mai ngak kan kandah tal jaik abih dom bhum di Trung Quốc. Di Ban ine Bắc Kinh nhiệt độ trun âm 15,5 độ C. 14 bilai tui iek bruk langik tasik pakat negar di Bắc Kinh hu mboh kỷ lục bahrau ka nhiệt độ biak bier di kreih bilan 12, labik bier abih dut hu lac âm 26,7 độ C. Di bhum tự trị Nội Mông, nhiệt độ bier abih lac âm 44,2 độ C. Ủy ban negar ka pacang caga, trun manieng saong daong duah urang njauk bala meng langik tasik Trung Quốc ieu dom bhum palei buh abih prein tame pacang caga haong dom bala kayua nhiệt độ bier, hajan ia patau saong langik biak laar.

Jit COVID-19 daok tagok khang di rilo taneh ia dalam bhum, nan ye Indonesia tabiak panuac ieu rahra nao padeih padei dalam taneh ia tuk Noel saong thun bahrau, saong ieu rahra patui bruk paglaong hatai sangka, dalam nan hu bruk ngak tui dom jalan ba tabiak di gah y tế yau ye cuk khan pacang mbaok saong khik ramik haci hacih. Urak ini, rajaei Indonesia daok ieu rahra ngak salah bruk klauk caga COVID-19 saong pabak labaih 4 triệu mbang vắc xin COVID-19 piah pacang cakak bruk tagok rilo menuac njaom dahlau di Noel saong thun bharau./.