Dalam mbang  nao rivang Bhum taneran kraong Cuu Long di harei Sene Dolta di urang Khmer,  biar harei kabroi, Thu tuong Rajaei  Phạm Minh Chính hu tame rivang saong tadhau ayuh  Kapol Jum pataom sư sãi anit ranam taneh ia tỉnh Trà Vinh di baha Kom Pong (daok lac Baha Ông Mẹt) di phường 1, ban Trà Vinh. Thủ tướng tadhau ayuh  saong caong khin dom sư sãi, phật tử, bhap bini bangsa Khmer ngak mbang kaya meda, prein yawa khang kajap, raidiuk dak harei dak trei sir. Thu tuong brei mboh bruk bui sambai tuk thau lac Đảng, rajakar, Mat tran negar tỉnh Trà Vinh tuk halei jeg brei sangka siam abih ka raidiuk jeng yau jalan sahaneng ka bhap bini. Di Sang bac Đại học Trà Vinh, anek taco urang Kinh, Khmer brei hu bac megru, pachreih ba hatai anit ranam  taneh ia, palei negar, sahaneng jum pataom gauk di taong abih bangsa.

Kapul urang kumei TP.HCM bahrau ba tabiak bruk “Bilan gam haong urang kumei ngak bruk” salam uan pahadar 93 thun harei padang kapul urang kumei Việt Nam saong 13 thun harei urang kumei Việt Nam 20/10. Ini lac thun camereip “Bilan gam haong urang kumei ngak bruk” hu peih tabiak di TP.HCM. Dom bruk ngak thun ini pataom tame pathau khan jak ba bhap bini pachreih tui dom danak dak bruk ngak di urang kumei, iek glang an sinh xã hội ka dom urang kamei, hội viên sang kan kandah, hu mbaok tame khik caga alam môi trường, kham merat pamaong mai rahra saong jak ba yaok urang jakar, hội viên pilih ruah sa môn thể thao lagaih piah pasram pahat ka prein yava. 

Tatua Đại Ngãi di jalan Roya 60 pambuak tỉnh Sóc Trăng saong Trà Vinh birau hu padang ngak harei kabroi 15/10, kuhria tabiak abih jien buh tame 8.014 tỷ đồng meng kadung jien Karja. Tatua Đại Ngãi  lac danak dak praong, jalan roya tapen tasik, pambuak dom tỉnh bhum taneran kraong Cuu Long. Tuk ngak salah blaoh, tatua Đại Ngãi meda brei abih takik tukvak, jalan nao mai katut veik labaih 80km meng Cà Mau nao Ban raya HCM, ba mbuan lagaih pambuak bruk nao mai di dom tỉnh gah Meraong saong Ban raya HCM.

Hadei di sa tukvak padang ngak tal urak ini, 2 danak dak cống pacang ia mbak Bến Rớ saong Tân Phú di tỉnh Bến Tre hu ngak salah blaoh. Mban khik ramik padang ngak thủy lợi 9 daok caga pambuak điện piah peih ngak iek saong jao ka tỉnh Bến Tre khik iek, ba pandar dalam bilan 10 ni. Dua cống nan hu daong ka tỉnh Bến Tre pacang ia mbak njaom tame meng kraong Tiền saong kraong Hàm Luông tame kraong Ba Lai, ngak ka kraong Ba Lai jeng labik padang ia taba, pabak ia pandar saong ia pala drak di bhap bini, ia ka bruk ngak di dom doanh nghiệp.

Dom gah chức năng tỉnh Tiền Giang daok samar brei pasang iek, ngak brei cambaic laic bruk dua urang metai kayua mbang pandap hu jru mek. Dahlau di nan harei 14/10, muk Phạm Thị P ( umo 83 thun, daok di xã Hòa Hưng, huyện Cái Bè) mboh anek di drei lac sa-ai  anh Phạm Văn Y. (umo 45 thun) metai. Tal mon 10 melam nan, anek kumei muk P lai 100ml ia tasau brei ka muk P menyum. Tuk menyum abih ia tasau nan, muk P kan suak yawa, glaoh ta-ok, labaih 5  minit hadei, muk P metai di sang. Sang muk P sahaneng lac bruk metai di dua urang nan lac kayua ruak yau nan ye oh khan brei kong an thau. Hadei di nan, mong 4 tuk harei 15/10, sa-ai Phạm Minh T. lac anek di muk P lai 150ml  ia tasau piah menyum, daok menyum ye mboh pandik akok, having akok, gloh ta-ok nan ye menuac dalam sang ba tame sang iek ruak piah taong ruak. Bac si dut mboh sa-ai T njauk jru mek kayua ia tasau.

Tổng thống Nga bahrau tah klaak panuac di phương Tây, ka bruk Mỹ njauk caga ka bruk mesruh haong Nga saong Trung Quốc. Urang dang akaok Điện Kremlin ndom lac, hatai sahneng ka sa bruk mesruh metak di dom taneh ia dang akaok hạt nhân lac oh siam mekre. Dahlau di nan harei 12/10, Hội đồng lưỡng đảng kayua Quốc hội Mỹ pok tagok ngak, hu panuac ieu karja Tổng thống Joe Biden njauk caga ka dom bruk mesruh gauk meda rah tabiak haong Nga saong Trung Quốc, meng bruk peih praong lực lượng, patagok bruk pambuak gauk saong pakhang danak dak pasiam phao ndao hạt nhân.

Tổng thống Ai Cập Abdel Fattah El-Sisi peih bruk ginum biai samar chip di Hội đồng An ninh Taneh ia, piah langyah bruk di  bhum taneh tukvak jaik ini, abih di nyu nan lac pambuak tal dom bruk mesruh catang di Dải Gaza. Bruk ginum biai piah langyah dom bruk sraw kadau saong anak tal di bruk Palestine; tui nan brei mboh bruk an ninh taneh ia di Ai Cập lac “ jalan pacang bhong” saong meda oh iek lap dalam bruk khik caga nan. Langiu di nan, Ai Cập brei mboh bruk daok pambuak  haong dom taneh ia dunya piah pabak bruk daong ka Dải Gaza.

Gah roh duah Langik tasik Ấn Độ (ISRO) meda brei cuh iek kapal du hành meda hu prein ba menuac tagok langik di harei 21/10 tal. Bruk cuh ini piah ngak iek module phi hành đoàn, tui kuhria hu dom phi hành gia Ấn Độ dalam mbang par tame langik praong hu menuac di puac thun tal. Dom urang ilamu Ấn Độ caong lac, danak dak Gaganyaan meda daong brei mboh prein ba phi hành đoàn hu 3 urang tagok quỹ đạo 400 km vil val baoh taneh piah ngak bruk dui atah dalam 3 harei. Kapal du hành hadei di nan ba dom urang nan mai veik baoh taneh tui jalan par trun di bhum tasik Ấn Độ.