Tui HĐ bhap bini tỉnh Bà Rịa - Vũng Tàu, thun 2023, tỉnh hu 8 dalam 38 tanut cak rok patagok kinh te - xa hoi oh ngak hu duk saong Sarak thun 2023. Bruk peih ngak dom danak, dự án daok suai damuai, oh ka peih ngak tui bruk ba tabiak to yaom taneh thun 2023. Langiu di nan, bruk khik iek di karja ka pacang caga taong chap ikan tasik suan hukum, oh khan brei thau saong oh tui bruk ba tabiak IUU daok takik. Kol toi pham ma tuy, bruk rapeik rapai uranaih daok rah tabiak sraw kadau; bruk kurang jru, pandap panda y te duh ka bruk taong iek ruak daok rah tabiak.

Di mbang nyaom ka 13, HĐND tỉnh Bình Dương mbang X, dom urang lambaok HĐND sua tangi ka bruk doanh nghiệp dauk tathuak ia ka oh tapa langyah tabiak gah langiu. Yam ndok Sở Tài nguyên-Môi trường tỉnh Bình Dương Ngô Quang Sự ndem lac jeng daok dom doanh nghiệp ka oh saneng mboh dom bruk ngak njauk tui adat alam, nan ye ngak suan. Dalam thun ini, pasang iek di 461 doanh nghiệp ye hu 246 labik ngak suan njauk taong phat jaik 29 tỷ đồng. Tukvak anak tal, sở meda patagok bruk pathau khan, pambuak haong pasang iek bruk khik ramik alam môi trường di dom doanh nghiệp; gam tui di nan jeng taduan langyah dom panuac pathau khan di rahra.

Kuhria tal bilan 11 meng blaoh, ban Cần Thơ hu jaik 3.000 urang ghien matuy saong pandar matuy suan hukum. Njauk huac abih lac bruk pandar dom janih matuy tong hop birau dak harei dak rilo, urang ranaih pandar matuy saong ghien matuy dak harei dak rilo, bruk matuy tame sang bac daok njauk khan pambak praong . Anak bruk nan,  Công an TP.Cần Thơ caong khin pakat karja tacei pato peih bruk cakak ghien jru phien di sang, dalam bhap bini; pakhang bruk pasram ka urang jakar y te cơ sở ginup bruk piah thau lac ghien matuy.

Thun 2023, bruk kinh tế- xã hội di tỉnh Bạc Liêu mek hu rilo jak jeng praong. Dalam 21 asal kadha rilo meng hu HĐND tỉnh jao, hu 18 asal kadha ngak hu saong yam tapa; patagok kinh te mbaih, ngan haong tanut tagok 7,24%, dang ka 5/13 tỉnh, ban dalam bhum ĐBSCL; abih tih pandap panda GRDP kuhria tui akaok menuac hu labaih 66 triệu đồng sa urang sa thun. Urak ini hu 8 danak dak ndien hangin hu prein nduac abih tih 469 MW daok ba tame nduac tani tanat; abih di nyu nan lac kim ngạch pablei tabiak negar langiu mek hu 1 tỷ USD

Dom hãng radaih di TPHCM sanya oh brei tagok yaom jien vé di tuk Tet Duong lich. Yaom ve Tet Nguyen dan kuhria mboh dahlau hu tagok min oh tapa 40%, dom po radaih  njauk brei ba tabiak cambaic laic saong oh tapa tanut ba tabiak di mblang radaih. Urak ini, dom mblang radaih tagok aval piah duh ka tuai ngan haong jalan ngak oh caik veik tuai halei daok di mblang radaih nao tỉnh di biar harei 30 Tet. Langiu di nan, Sở Giao thông Vận tải TP Hồ Chí Minh jeng tagok hu ba tabiak bruk pambuak haong Mblang kapal haok  dunya Tân Sơn Nhất, gah jalan pasei piah pabak bruk nao mai di bhap bini dalam dom harei tabung glong Tết Dương lịch saong Tết Nguyên đán thun anek sak ine girai. 

Mintri Du lịch Indonesia daok pasang iek bruk oh thị thực ka rahra di 20 taneh ia, dalam nan hu Mỹ, Trung Quốc, Autralia, Ấn Độ, Hàn Quốc, Đức, Anh saong Pháp, piah jhul khang du lịch saong kinh tế. Bruk oh thị thực yau sa jalan langyah piah jhul khang gah kinh tế, du lịch saong buh jien tame. Tui dữ liệu khan brei thau lac, hu labaih 16 triệu tuai negar langiu mai tal negar ini dahlau di tuk jit praong thun 2019. Singapore – jeng brei thau lac oh thị thực 30 harei ngan haong Trung Quốc, meng akaok thun tal.

Cảnh sát Singapore daok peih bruk pasang iek langyah 373 urang pambuak tal bruk pachot meblah drap ar praong angaok mạng, ngan haong yaom jien tagok tal 10  triệu đô la Singapore (sumu labaih 7 triệu đô la Mỹ). Dom urang hu brei langyah yah labaih 1.200 mbang pachot pagat angaok mạng tui rilo jalan nan lac: iew da-a urang buh jien tame, pablei salih angaok mạng, brei jien mesre, palih ruah bruk ngak, ja angan urang jakar  rajaei , ngak krein randap angaok mạng…Cảnh sát  kakei bhap bini brei sahaneng  paglong bruk pacang caga saong oh brei ka urang karei pandar  tai khoan gilang pariak di drei  atau  laik phone drei.

Quốc hội Đan Mạch hu brei tapa dự luật, dalam nan  tacei lac  bruk cuh dom baoh Koran labik hu rilo menuac lac ngak suan adat hukum. Ini lac sa bruk kham marat di taneh ia Bắc Âu ini piah ngak pacadu bruk chỉ trích biak catang di urang Islam hadei di tuk rilo mbang rahtabiak dom bruk cuh atau ngak jhak tal  Koran di ban ine Copenhagen dalam dom bilan tapa. Dalam dom adit jaik di ini, di Đan Mạch saong Thụy Điển rilo mbang rahtabiak dom bruk cuh atau ngak jhak tal baoh Koran, ngak tamuh tabiak khang bruk chỉ trích biak catang dalam dom urang  Islam di  dunya./.