Mban Bangsa tinh Binh Thuan birau padang Kapol nyaom nao bac megru ilamo peih ngak Danak dak pakat negar patagok kinh te - xã  hoi bhum urang bangsa takik saong bhum ceik (iew katut lac Danak dak pakat negar 1719) di dom tỉnh Gia Lai, Kon Tum saong Dak Lak. Ngak bruk haong Mban Bangsa dom tinh, Kapol nyaom  di tinh Binh Thuan  hu klaak rabha  bruk peih ngak dom danak dak praong sit  di Danak dak pakat negar 1719, abih di nyu lac bruk peih ngak cơ chế đặc thù tui Sarak 111/NQ -CP di Rajaei. Mban Bangsa dom tinh Gia Lai, Kon Tum, Dak Lak jeng klak rabha rilo bruk, jalan ngak gheih dalam tuk peih ngak dom danak dak praong sit di Danak dak.

Mikva urang bangsa Khmer tinh Soc Trang hu  30% rahra dalam tinh, haong bruk takik taneh piah ngak mbang, bruk pato pakai bruk ngak, duah bruk ngak, brei bruk ngak mbang daok dang ka mikva bangsa hu tinh peih ngak saong ba mai siam lagaih, dalam nan hu danak dak “Patagok bruk raong glang limo dalam tinh Soc Trang tukvak 2022 - 2025" di tinh daong pajaih athur raong bo daok pato bruk ngak katut harei ka gah raong glang hu daong ka mikva bangsa Khmer di ini patagok bruk raong glang siam lagaih. Meng di thun 2021 tal ini, tinh Soc Trang hu daong salih bruk ngak ka 4.560 baoh sang, haong jien jaik 46 ty dong. 

Pasak Pasang iek ruak kik tinh Dong Nai birau khau tin ka bruk jit ruak sởi di dalam tỉnh. Tui Pasak Pasang iek ruak kik tinh Dong Nai, dalam adit tapa, dalam tỉnh  hu labaih 140 mbang urang ruak hu ba tame taong ruak, tagok jaik 50% dut saong adit dahlau di nan. Dom urang ruak tagok di Ban Bien Hoa saong dom huyen Long Thành, Tân Phú, Định Quán, Nhơn Trạch. Kuhria tal kaok thun  ini, kuhria taong abih urang ruak dalam tinh  lac 628 mbang, tagok 625 mbang dut saong tuvak ini thun dahlau.  Njauk caik hatai, hu rilo uranaih oh ka tal thun  klauk jru vaccine sởi ( umo ala 1 thun) hu ruak tagok baoh bhong.

Di bhum atah bayah di huyen Lạc Dương, tinh Lam Dong haong labaih 90% rahra lac urang bangsa takik, tukvak tapa, xa Đưng Knớ mek hu rilo bruk sangka buh jien tame di Ndang saong Karja, padang jalan mbak, ndien jalan, sang bac, balai. Xa hu mek angan xa palei pala bahrau thun 2021. Meng bilan 7 thun ini, huyen Lạc Dương hu brei mboh Danak dak padang Palei Ilamo yu lit bhap bini xa Đưng Knớ hu peih tabak kein lagaih ka bruk khik ramik ilamo meng kal pagam haong bruk patagok yu lit di bhum palei. Mai meng bruk nan, kapul urang kamei xa hu jak ba, pataom dom adei sa-ai kamei patagok bruk menyim jih dalah, ngak jeng sa labik yu lit lac palei bruk menyim jih dalah.

Mban tacei ba Pacang caga bala meng langik tasik saong duah daong urang gaok bala huyen M’Drắk, tinh Dak Lak brei panduan ba 4 baoh sang di palei Thi, xa Ea Trang tal labik hu salamat hadei glut jaleih di biar harei kabroi. Kayua hajan praong dui suai lavik ngak taneh kambon jaleih trun lam kateik phun pala saong sang radaih di rahra bhap bini. Patuah oh hu urang halei njauk hagait. Mban tacei ba Pacang caga bala meng langik tasik saong duah daong urang gaok bala xã hu mbaok sumu, daong ba 4 baoh sang, 15 urang nao labik hu salamat. Xã daok kuhria bruk khat lahik saong pasang iek veik dom labik mbuan glut jaleih karei.

“Ngak brei samu gauk dalam dunya” - Nan lac jalan ngak saong kadha bo urang pan akaok dom kinh te bahrau patagok - BRICS ba tabiak di Nyaom biai pakat glaong bahrau salah blaoh di ban Kazan, Nga. Bruk hu mbaok di labaih 20.000 urang lambaok mai meng 36 negar saong bhum yaneh, dalam nan hu 22 dom urang ngak praong dalam negar, haong urang dang akaok di 6 kapul dunya brei mboh BRICS daok jeng sa cơ chế rilo gah hu angan jia. Jalan ngak pasak di BRICS lac ngak tabiak sa jaman bahrau di kapul, samu gauk dalam prein quyền dunya.

Harei ini 24/10 lac harei hu LHQ palih ruah ngak Harei dunya mesruh pacang caga ruak bại liệt, sa janih ruak mbuan bala ka uranaih umo ala 5 thun. Dalam tuk bruk mesruh metak daok rah tabiak di ralo labik angaok dunya, abih di nyu nan lac bhum taneh Trung Đông, Kadung jien Liên hợp quốc (UNICEF) harei kabroi iew bhap bini dunya njauk brei ngak njauk tui sanya piah cakak ruak nan. Tui harak pathau khan birau abih di UNICEF harei ini, dalam 541 uranaih ruak bại liệt  di dunya , hu tal 85% uranaih mbuan gaok kan kandah kayua bruk mesruh metak.

          Hadah subuh page ini, ribuk Trami tuh tame Philippines haong hajan praong grauk labik di angaok Tasik Pai. Philippines harei ini patui veik kareik mbang rilo jabat, sang bac di kaoh pulao Luzon – kaoh pulao praong abih di negar ini. Dom mbang pan kapal ahaok pan mai saong pan nao meng Ban ine Manila jeng hu brei tayah klak. Ndien di Philippines gaok khut tayah ngak khat lahik ndien rah tabiak di dom labik saong labaih 1,3 trieu ha phun pala jeng gaok khat lahik. Kuhria mboh dahlau, ribuk Trami petui veik tuh tame Philippines dalam harei ini blaoh cadu, atau meda khang veik tuk yuk tame Tasik Pai./.