Tỉnh Cà Mau birau padang ngak Dom danak dak Rup patau pahadar mbang radaih pui pajeng ba urang lin tabiak gah Barak negar thun 1954. Dom danak dak daok di gah Meraong pabah kraong Ông Đốc di huyện Trần Văn Thời, praong labaih 10ha, hu phun jien buh tame ngak abih tih labaih 200 tỷ đồng. Bruk buh jien tame ngak dom danak dak Rup patau pahadar mbang radaih pui pajeng ba urang lin tabiak gah Barak negar thun 1954 piah patagok sajarah dakrai, ilamu, bruk ngak cách mạng khang kadang hadah hadai di bhap bini Nam bộ jeng yau di tỉnh Cà Mau, rik daong tame bruk pato pakai sajarah, hatung hatai anit ranam taneh ia ka dom rairah harei ini saong rai hadei.

UBND TP.HCM bahrau patabiak Jalan peih ngak buh jien tame 5 danak dak padang ngak pasiam veik, peih praong, ngak bahrau danak dak jalan mbak urak ini hu pandar janih harak gar pambuak gauk padang ngak – ba pandar – jao brei (BOT) di dalam Ban raya. Abih tih phun jien buh tame di 5 danak dak tui kuhria lac labaih 44.592 tỷ đồng. Jalan ngak ini hu daong rami ramik dahlau phun jien Kanja buh tame peih ngak danak dak tui njauk adat (bruk caga buh jien tame, bruk biyar jien, daong ba, tái định cư di danak dak; daong padang ngak danak dak,…); jak ba buh jien tame, dui pachreih dom gah di rahra hu mbaok tame peih ngak tani tanat patagok dom yaom glaong kein lagaih, peih ngak tantu cambaih laih.

Mban Bangsa tỉnh Ninh Thuan birau peih bruk alin brei labaih 100 baoh phone tangin ka Urang hu angan je dalam bhap bini bangsa takik dalam tỉnh. Dom urang hu angan je taduan phone tangin hu sanya pandar njuak bruk pathau khan duh ka bruk chinh tri di palei. Bhian pambuak Internet tame blah web điện tử di UB bangsa, Mban Bangsa tỉnh, dom blah web khaw tin, harak mbao, tap chi điện tử di dom jabat Đảng, Quốc hội, Rajaei, UBND tỉnh piah duah thau pabak khaw tin cambaic laic bruk peih ngak jalan tacei ba, sarak ngan haong bhum urang bangsa takik saong bhum ceik.

Thun 2024, tỉnh Trà Vinh peih ngak Danak dak bruk ngak negar patrun kan kathaot khang kajap ngan haong phun jien labaih 73 tỷ đồng. Tui nan, meng phun jien ini, tỉnh meda rami ramik piah peih ngak cak rok patagok bruk patrun kan kathaot, daong urang ngak lac sang kan kathaot, sang jaik kathaot, sang bahrau tabiak truh kan kathaot, urang jaoh jo ka oh atau oh hu bruk ngak mbang duah jien tani tanat cak rok patagok bruk ngak dalam gah ngak nong; pasiam veik dinh dưỡng ka uranaih mala umo 16 thun lac sang kan kathaot, sang jaik kathaot, sang bahrau tabiak truh kan kathaot, urang kumei matain saong daok brei anek mom.

Tuk padei Tet Duong lich 2024, tỉnh Bạc Liêu hu taduan raok jaik 40.000 mbang tuai damuai mai rivang me-in, jien mek tame meng bruk du lich hu labaih 28,5 tỷ đồng. Dom labik rivang main, dulich pataom tame ralo tuai nan lac Khu Quán âm Phật đài, Mblang brein Hùng Vương, Labik Rivang main Bein darang, Labik pahdar nghe thuat Đờn ca tài tử Nam bộ saong Nhạc sỹ Cao Văn Lầu... Dom bruk ngak dulich, duh ka tuai damuai dalam tuk Tet Dương lich 2024 hu buh jien tame ngak, kuhria caga siam, pabah hatai caong khin di tuai damuai mai rivang me-in saong bhap bini.

Thủ tướng Thái Lan Srettha Thavisin brei thau lac negar ini saong Trung Quốc meda peih ngak danak dak miễn thị thực ka rahra di gauk piah paglaong talei pambuak gauk di dua taneh ia. Tui nan, tuai Thái Lan saong Trung Quốc oh daok ngak harak likau thị thực dahlau di tuk tame negar. Tui Tổng cục Du lịch Thái Lan, tuai mai du lịch Trung Quốc lac kapul tuai damuai praong ka dua mai negar ini dalam thun 2023, hu labaih 3 trieu 4 rituh 2 piluh ribau urang.

Sa kapal haok pajeng tuai di hãng ahaok Japan Airlines apui khuah di jalan bang di mblang ahaok Haneda di Tokyo hadei di tuk ginuk tame kapal haok ngak bruk pasang iek tasik di harei 2/1. Taong abih 379 tuai damuai, dalam nan hu 8 uranaih saong urang nao ngak bruk di ahaok 516 hu ba tal labik salamat. Yau nan min, 5 urang di ahaok gah Bol lin Khik caga ar tasik Nhật Bản metai. Thu tuong Nhật Bản Kishida Fumio khan lac, bruk nan biak pandik harao” saong payua panuac klak rabha saong dom baoh sang, gauk gar di urang jhak vak nan. Gam haong nan, brei panuac lac meda pabak khaw tin ka bol bhap hu thau cambaic laic saong samar chip.

Labaih 2.000 rahra daok dalam labik vil val ceik pui Lewotobi Laki-Laki di Indonesia njauk panduan ba nao daok di labik karei tuk ceik pui ini daok tagok prein pruh tabiak. Ceik pui ini pruh rilo mbang dalam adit blaoh, ngak jeng gang bau thur mur par tagok glaong 1 kilomet meteh. Urang jakar pak nan brei tagok tanut cảnh báo ceik pui tal tanut ka dua dalam abih tih 4 tanut, gam tui di nan jeng peih praong labik mbuan hu bala meng bán kính 2 km tagok 4 km vil val cambuai ceik apui. Bau meng ceik pui pruh tagok ngak ka mblang kapar ahaok Frans Seda atah di nan 80 km njauk kareik pabah mbang dalam harei 1/1.