Akaok UBND tỉnh Cà Mau bahrau tabiak harak tacei pato dom sở, ban, ngành, kapul nyaom pakat tỉnh saong UBND dom huyện, ban dalam tỉnh caga yaok bruk siam di abih piah peih ngak Tết Chôl Chnăm Thmây thun ini di bhap bini Khmer. Akok UBND tỉnh Cà Mau ieu peih ngak harei Tết Chôl Chnăm Thmây (meng harei 13/4 tal harei 16/4) tui njauk adat, siam mekre, salamat, patak pataom, lagaih haong ilamu meng kan di bhap bini Khmer. Dom sở, ngành, kapul nyaom, puk palei, brei ba mbuan lagaih di abih piah bhap bini Khmer raok Tết dalam bui sambai, chreih chrai, khik ramik saong patagok ilamu siam mekre meng kan, oh ngak kandah tal bruk ngak mbang, pablei salih di mikva.

Harei kabroi, di ban sit Ea Pốk, huyện Cư M’gar, tỉnh Đắk Lắk, Mintri Công an peih bruk padang ngak, jao alin sang ngak blaoh saong phun jien daong padang ngak 1.200 baoh sang ka mikva bangsa, dom sang sarak kanja, sang kan kathaot gaok kan kandah ka sang danaok di dalam tỉnh. Tapa nan, mban peih bruk hu jao 2 baoh sang ka dom sang di dalam huyện Cư M’gar. Ini lac bruk ngak hu makna piah daong ka dom sang rahra gaok kan kathaot, abih di nyu nan lac mikva bangsa takik, tapa nan pabak hatai jia ka rahra ngan haong jalan ngak di ndang, Kanja saong pakat ủy, kanja palei.

Hadei di klau pluh thun ba tame pandar, ký túc xá Sang bac Phổ thông Bangsa gam bac gam daok tỉnh Gia Lai khut tayah trak, njauk padang ngak bahrau piah duh ka bruk pato saong bac. Min bruk padang ngak ini oh ka ngak hu kayua daok tavak gah taneh riya. Dua talei sang ký túc xá 40 bilik di sang bac daok mbaih mboh biak khang. Bruk buh jien tame padang ngak labik saong pabak pandap bac ta-a ka sang bac Phổ thông Bangsa gam bac gam daok tỉnh Gia Lai lac sa binah di Danak dak bruk ngak negar piah jhul patagok KTXH bhum bhap bini bangsa takik saong bhum ceik, piah samar ba mai labik bac ta-a saong labik daok siam jang ka anek saih bangsa takik.

Piah daong ka rahra bhum atah biyah, bhum tasik, bhum cù lao trun manieng dom kan kandah ka ia pandar dalam bilan thu, tỉnh Tiền Giang hu ramik caik rilo vòi ia pabak ka rahra oh mek jien. Di 2 huyện Gò Công Đông saong huyện pulao Tân Phú Đông, Công ty TNHH pabak ia Tiền Giang hu peih 40 vòi ia oh mek jien pabak ka rahra. Dom vòi ia hacih hu caik di labik atah bayah, pabak luac harei melam ka rahra, tal urak ini jeng pabak hu labaih 1.100 m3 ia. Mayah langik thu lagu daok dui atah, tỉnh Tiền Giang meda peih taong abih 77 vòi ia ka rahra meng dom bilai pabak ia piah ka rahra di dom xa bhum atah biyah, langiu ar, tapen tasik, dom sang daok parai rai atah di gauk mai mek ia oh lahik jien.

 Meng akaok thun tal urak ini, jit ruak maruai tagok biak samar saong hu 22 urang metai, glaong jang dua mbang dut saong tukvak ini thun blaoh. Abih di nyu nan lac, jaik di ini rahtabiak dom urang ruak hu tukvak pa-auk ruak katut, tok meng 10-15 harei. Mintri Y tế kakei UBND dom tinh, ban jhul khang bruk pathau khan ka dom kanjak jhak di ruak maruai; samar drah pathau khan dom khau tin piah ka rahra caga dahlau dom jalan pacang caga ruak; jak ba rahra samar drah nao tal labik y te piah iek ruak, langyah, klauk jru vaccine pacang caga ruak maruai. Tuk njauk anek asau, marau kaik njauk rao chip labik kaik mala vòi ia nduac dalam labaih 15 minit, meda mek xa phon piah rao labik kaik.

Tổng cục Du lịch Thái Lan bahrau brei thau lac Phuket – kaoh pulao padeih padai danei angan di negar ini tui kuhria meda raok labaih 300.000 tuai dalam mbang padeih lễ Songkran thun ini ngan haong jien mek tame takik abih lac 7 tỷ baht (labaih 194 triệu đôla). Yaom lac daok dalam bilan du lich oh njauk tabung glaong, dom tuai kakei bilik daok khách sạn di kaoh pulao mek hu labaih 80% prein di nyu. Tapa pasang iek labaih 2.000 mẫu khách sạn, yaok tuai daok kuhria rah tapa lac 5 melam. Dalam dom nyaom tuai dunya mai tal Phuket, tuai mai meng Nga lac  rilo abih haong 5.000 mbang tuai yaok harei, patui di nan, lac tuai Trung Quốc labaih 2.000 mbang tuai yaok harei.

Taong abih dom paha di Campuchia meda pakauk dom bruk ma-in sambai meda ba tal bala yau thaic ia, glam tabung, ma-in mbia atau pandar dom janih patuh… dalam tuk Chol Chnam Thmey di rahra dalam taneh ia Campuchia. Dom bruk ngak ini meda ngak brei srau kadau atau ba tal bala ka rup drei saong ka urang karei. Kayua yau nan ye Mintri adat cambat saong agama Campuchia ieu kakei taong abih dom paha di dalam taneh ia pakauk dom bruk nan saong saliih tame nan lac dom bruk ma-in meng kan di urang Campuchia. Urang halei ngak suan meda njauk phat buh guk meng 1 tal 3 thun saong phat jien meng 200.000 Riel tal 6 triệu Riel.

Jit ruak pandiak tabiak darah di Achentina daok rahtabiak sarau kadhau tuk dom urang njauk ruak tagok samar drah dalam dom harei jaik di ini tuk negar Nam Mỹ ini hu mboh labaih 120 ribau urang njauk ruak saong 79 urang metai. Bruk rahtabiak sarau kadau di jit ruak ngak ka dom sang iek ruak di negar ini tapa prein taduan urang ruak. Dom urang roh duah ilamo gah y te brei thau lac, dom kanjak jhak dak harei dak tagok di bruk pandiak tagok di dalam dunya kayua BDKH ngak ka jamaok pambak ruak pandiak tabiak darah pan tal dom bhum labik bahrau bo dahlau deih nyu ka oh bhian diuk, dalam nan hu gam bhum phi nhiệt đới yau ye Nam Mỹ atau châu Âu./.