Tui kuhria, tỉnh Đồng Nai hu jaik 80.000 urang ngak meng tỉnh karei mai ngak, oh nao palei mbang Tết. Dom pakat công đoàn Đồng Nai hu buh tabiak jaik 450 tỷ đồng piah blei 102.000 pok pandap brei ka đoàn viên, urang ngak. Langiu di nan, dom pakat công đoàn daok hu 55 sruh radaih ba labaih 1.800 urang ngak nao palei. Ta-eng LĐLĐ tỉnh hu 35 sruh radaih, ba jaik 1.400 đoàn viên, urang ngak saong gauk gar nao palei di dom tỉnh ban lac: Đà Nẵng, Quảng Bình, Nghệ An, Thanh Hóa saong Hà Nội. 

Dalam dom harei jaik Tết ini hu rilo janih baoh kayau angan je di tỉnh Tiền Giang tagok yaom, takik hu. Urak ini, kruac bhung hu yaom meng 22 tal 28 ribau đồng/kg. Thanh long ralow mbon yaom meng 26-28 ribau đồng/kg; thanh long ralow bhong yaom labaih 22 ribau đồng/kg. Rilo janih baoh kayau karei, yau ye pa-aok cuah Hòa Lộc, vú sữa Lò Rèn, baoh ma-mbat, tamekai, dưa lưới, mận… yaom tagok meng 5-10%. Dalam tỉnh Tiền Giang urak ini hu labaih 83 ribau ha bein phun mbang baoh. Meng caga hu dahlau ia pruh, ngak siam dom jalan pandar ilamo sangka ka iek glang ka phun, nan ye brei baoh biak rilo, hu labik pablei mbaun lagaih, daong ka urang ngak nong hu jien mbang Tết dalam bui sambai.

Huyện Chợ Lách, tỉnh Bến Tre hu bruk pala bingu kiểng praong baih di bhum ĐBSCL. Min bingu kiểng thun ini pablei suai jang dom thun dahlau, urak ini bahrau pablei hu jaik 20%, dom janih kiểng, bon sai hu yaom yau ye: mai kanyik, bingu ba-ar, kiểng mbeik thaik… takik hu menuac blei. Meng dom kan kandah nan, huyện Chợ Lách daok kham merat ba mbuan lagaih piah daong ka urang ngak nong, dom menuac pala bingu, phun kiểng hu mbaok tame dom nyaom darak, hlabik pataom bingu Xuân, brei ka urang pala bingu, kiểng thau samar drah ka darak pasar.

Jalan Vành đai 3 TP.HCM atah abih tih labaih 64 km. Urak ini daok 14 km di 4 labik karei di gauk oh ka hu pambuak tame, dalam nan hu mateh daok dalam ban Thủ Đức. UBND TP. Thủ Đức kham marat tal harei 30/11/2024 meda jao 70% mbaok taneh piah padang ngak danak dak di bilan 12/2024. Bahrau ini, UBND TP. Thủ Đức hu jao alin pandap ka 128 baoh sang rahra njauk pataom mek taneh dalam danak dak jalan Vành đai 3 saong hu pasang iek brei daong veik ka 17 baoh sang gaok biak kan kandah ngak siam bruk jao mbaok taneh, ngan haong phun jien abih tih lac labaih 1 ty 100 trieu.

Cục khik ramik darak pasar tỉnh Bình Dương bahrau mboh saong cap mek labaih 15.800 klaok alak blei lậu di angaok 3 sruh radaih pajeng pandap daok pataok dalam labik joa di Bình Dương. Dom alak ini hu ba tame meng negar langiu, oh hu tem alak blei tame tui adat. Di tukvak pasang iek, dom urang peih nduac radaih oh hu harak gar hagait brei thau ka asal di taong abih dom klaok alak nan. Tui kuhria oh ka ginup abih, dom alak blei tame meng negar langiu oh njauk adat hukum nan, yaom labaih 15 tỷ đồng. Gah chức năng brei khik veik taong baih pandap nan, haong dom sruh radaih pajeng piah duah thau, ngak brei cambaih laih, langyah tui adat. 

27 taneh ia dalam Liên minh châu Âu (EU) hu brei tapa dom adat hu brei thau lac bahrau abih ka bruk sanya gauk dalam khik ramik trí tuệ nhân tạo (AI). Dom taneh ia saong gah padang ngak hukum EU hu njauk gauk ka dom paok adat dalam dự thảo di bilan 12/2023, hu brei thau lac hukum abih gah camriep abih di dunya piah khik ramik AI. Urang iek gah darak pasa dalam Liên minh châu Âu (EU) Thierry Breton brei thau lac, bruk brei tapa dom adat AI hu makna sajarah. ChatGPT hu brei thau ka dom kreih camin patagok biak samar di AI saong brei mboh lac, kong nghe ini hu bruk duah jalan ngak bahrau, yaom lac daok caik tabiak rilo kanjak jhak min jeng peih tabiak sa jalan kein lagaih bahrau.

129 yau (gu) hu mbaok tame ngak lakhah haong gauk di bang Gujarat, gah pai Ấn Độ. Dom yau (gu) nan ngak lakhah tui hukum Islam. Tui mbang peih bruk, bruk ngak lakhah ini brei ka dom yau (gu) gaok kan kandah dalam raidiuk, oh hu jien piah ngak lakah. Dom pandap panda yau ye pandap ngak mekre dalam sang saong pandap piah pandar yaok harei dalam sang jeng hu alin hadiah ka dom yau, dom gu diuk pasang ini. 

Dom menuac metai kayua khuah glai pak Chilê takik di nyu lac 64 urang saong dom urang metai daok hu rilo jang tapa yaok harei. Yaok rituh urang hu brei thau lac lahik. Labaih 1.000 baoh sang khut. Harei 3-2, urang jakar brei thau lac hu labaih 90 mbang khuah glai daok rahtabiak di grauk labik pak Chilê. Kanja Chile hu ba tabiak adat pacang cakak dom labik njauk khuah khang di abih saong brei bol lin nao daong ka lin padam pui pacang cakak pui pambak praong, dalam tuk trực thăng pacang caga khuah hu mbaok tame padam paui meng mangaok langik.