Pahadar 79 thun harei padang Bol lin bhap bini Việt Nam (22/12/1944 - 22/12/2023) saong 34 thun harei quốc phòng bhap bini, Bộ Chỉ huy quân sự (CHQS) tỉnh Kiên Giang hu padang rilo kapul urang jakar nao jao brei "baoh sang ayut sahabat" di huyện Vĩnh Thuận saong huyện Hòn Đất. Bruk daong saong jao brei baoh sang ayut sahabat dalam tuk ini, lac sa bruk ngak bak makna di Bộ CHQS tỉnh Kiên Giang, tapa nan hu rik daong haong pakat ủy, karja palei sangka daong ka raidiuk di urang jakar, urang lin daok ngak bruk di dom labik dalam tapon nyaom bol pan phao kraong saong urang jakar, urang lin tapa dom saman urak ini padeih hưu, phục viên, xuất ngũ gaok kan kandah ka sang daok.

Mban pan akaok tacei ba bol lin huyện Tri Tôn, tỉnh An Giang bahrau peih bruk “Tết quân dân – Xuân biên giới” thun 2024 di 2 xã tapen negar lac Lạc Quới saong Vĩnh Gia. Ong Trần Minh Giang – Phaok akaok UBND huyện Tri Tôn brei thau, bruk ngak ini brei mboh ilamu menyum ia hadar halau ia, ba bui sambai chreih chrai, kak kajap talei rohim jum pataom urang lin haong rahra. Urak ini abih tih yaom jien jak ba peih ngak danak dak lac 880 triệu đồng, gam haong 2 tấn brah saong 100 pok pandap. Langiu di nan, mBan peih bruk jeng hu alin hadiah 30 paok pandap ka sang kan kathaot saong 10 pok pandap brei ka anek saih sang kan kandah.

Mesup ini di tỉnh Bình Thuận, 87 urang lac urang hu angan je di abih lambaok ka labaih 100.000 bhap bini bangsa takik dalam tỉnh hu mbaok tame Nyaom biai pok meyaom urang hadah krah naih gheih di abih lac urang bangsa takik tỉnh Bình Thuận. Tukvak tapa, bhum bhap bini bangsa takik mek hu dom jak jeng praong di dom gah dalam raidiuk. Dom jak jeng mek hu nan hu bruk rik daong prein yava, akaok sahneng di dom urang hu angan je dalam bhap bini bangsa takik dalam tỉnh Tapa bruk ini, akaok UBND tỉnh Bình Thuận hu alin harak meyaom brei 7 urang hu angan je hadah krah di abih.

TP.HCM bahrau peih jalan tapuk di TP.Thủ Đức. Ini lac jalan tapuk ka 2 di TP.HCM hadei di jalan tapuk camereip angaok jalan Nguyễn Văn Bình (Quận 1) hu peih tabiak meng thun 2016. Ong Hoàng Tùng, akaok UBND TP.Thủ Đức brei thau, jalan tapuk TP.Thủ Đức hu caong lac labik nao tal praong ka bol bhap rahra. Ini oh lac labik puac tapuk bo daok lac labik ilamu, labik taom gaok, ndom biai nao mai. TP.Thủ Đức brei patagok dom bruk ngak yaok thun, yaok bilan, yaok quý piah dui pachreih urang puac tapuk mai tal jalan tapuk.

Pasak Y te Ban Bien Hòa, tỉnh Đồng Nai khan lac, pak ban ini birau hu sa urang njaom ruak đậu mùa khỉ ka 2. Urang ruak ndau mua khi angan N.C.M.P (umo 26 thun, palei daok di TP Bạc Liêu) urak ini daok trọ di Ban Biên Hòa. Dahlau tuk ruak, urang hu nao palei saong taom gaok ayut sahabat. Mboh kalik tamuh baoh hu laneh labik sinh dục, hadei di nan trun tal takai. Urang ruak mboh patuk, katan, pandik talang, lagaih, la-ar, caik ia hauk, tagok baoh plak pha. Harei 14/12, P nao dut iek rua di Sang iek ruak Da liễu TPHCM dut iek mboh ruak giang mai sinh dục, saluak. Mbiah tal harei 15/12, panuac tamat iek ruak lac dương tính virus đậu mùa khỉ.

Jabat yaok pataom Philippines brei thau lac dom menuac kan kathaot di taneh ia ini trun meng 23,7% dalam 6 bilan akaok thun 2021 daok 22,4% dalam 6 bilan akaok thun ini, samu 25 triệu 240 rabau menuac. Rajaei Philippines hu buh jien tabiak ngak jalan mbak, cơ sở hạ tầng saong dui pachreih urang negar langiu buh jien tame ngak mbang piah ba bruk ngak saong jhul patagok kinh tế. Philippines daok caga ka thun 2024 bak cuang kandah tuk bruk langik tasik El Nino meda ngak brei blait jalan di bruk mesruh pacang lạm phát di taneh ia ini.

Ban Luân Đôn di negar Anh birau ini peih bruk “ABBA Voyage”, var parang iek ky thuat so di kapol nyaom daoh pop Thụy Điển ABBA. Var nan hu ginup 4 urang di nyaom. Ini lac piah urang takre payua panuac tal 4 urang likei dam, kumei dara. Gam haong nan sa nyaom ma-in alat ragam, dom urang ABBA hu labaih 20 kadha daoh dalam danak dak dui atah 90 minit. Piah ngak jeng dom melam yau nan, ABBA hu ngak bruk haong sa kapol hu 850 urang meng urang ilamu ky thuat gah gom menyek hadah, sambo mau, thaot binguk so.

Liên hợp quốc brei thau, bruk mesruh gauk di bol lin Sudan saong dom kapul daong drah samar (RSF) patuh tabiak meng bilan 4/2023 mbiah tal urak ini ngak brei labaih 7 triệu menuac nduac nao daok di labik karei, ba tal bruk srau kadau “di tản” praong abih di dunya. Dalam nan hu 1 triệu 500 rabau menuac nduac tapa dom taneh ia jaik taphia./.