Mban peih bruk dom harei hu makna praong di tinh Tien Giang bahrau padang ngak jalan peih dom bruk ma-in sambai, pabak ka rahra dalam tuk Tet Nguyen dan sak anek ula thun 2025 ngan haong rilo bruk ngak. Abih di nyu nan lac, darak pasa bingu bilan Pataih sak ula ranaih thun 2025 meda hu peih tabiak meng harei 18-1 (lac harei 19 bilan mat thun sak Ine Girai) tal harei 28-1 (lac harei 29 bilan Mat thun Sak Ine Girai) di Labik Mblang main Hung Vuong, ban My Tho bo oh peih ngak di ar takai kraong Tien yau kuhria dahlau di nan. Taeng di darak pasa bingu bilan Pataih ban My Tho hu 500 labik pablei bingu kieng, tagok 50 labik dut saong thun blaoh, daong ka rahra lagaih jang dalam bruk pablei tabiak phun bingu.

Uy mban MT negar Viet Nam tinh An Giang hu jao 145 baoh sang Jum pataom gauk ka dom sang kan kathaot gaok kan kandah ka sang danaok di dalam huyen Chau Phu, An Phu saong ban sit Tinh Bien. Yaok baoh sang praong takik di nyu lac 32 m2, mblang taneh praong abih lac 50 m2, khik tani tanat 3 khang lac njauk tui adat; hu ginup sang nao hanjul drei, ndien, ia pandar. Phun jien padang ngak dom baoh sang tui kuhria meng 60-80 trieu dong sa baoh, abih tih phun jien buh tame labaih 10 ty dong. Thun ini, Kadung jien “daong ka urang kan kathaot” tinh An Giang hu taduan bruk rik tame di dom kapul nyaom, dom manuac urang ngak pahla ngan haong paok jien abih tih lac labaih 222 ty dong.

Ngan haong 3 bangsa lac urang Yuan, Cam, Raglai gam raidiuk, xa Phong Phu, tinh Binh Thuan daok dak harei dak salih bahrau yaok harei tuk bruk ngak nong hu cak rok patagok, dom co so ha tang hu caik hatai sangka buh jien tame ngak khang kadang, peih ngak gam gam. Tal urak ini, xa Phong Phu mek hu 17/19 asal kadha palei pala bahrau. Xa Phong Phu ngak dahlau abih bruk pasiam veik hanh chinh, jhul khang bruk pandar kong nghe khau tin saong salih so, khik ramik biak catang bruk quy hoach, taneh riya, gam tui di nan jeng padang ngak bruk pambuak gauk ngak mbang ngan haong duah jalan pablei tabiak pandap panda kaya nong pala ngak rilo piah cak rok patagok samar drah.

Akaok UB Bhap bini tinh Dong Nai hu kakei dom so, dom gah pasang ieik bruk peih ngak to yaom quyen pandar taneh, piah khik tani tanat njauk tui hukum, peih ngak tantu cambaih laih, samar drah duah mboh, langyah biak catang dom bruk ngak suan tui adat hukum dalam bruk to yaom quyen pandar taneh. Urang pan akaok tinh Dong Nai jeng ieu kakei UB Bhap bini dom huyen, dom labik gam haong dom kapul hu pambuak tal peih bruk pasang ieik, ngak cambaih dom makna ngak tabiak bruk sarau kadau yaom kaom di yaok janih taneh riya, sang danaok, caga dahlau bruk ba tabiak jalan langyah piah tani tanat yaom kaom di darak pasa, siam makre, khang kajap.

Kraong Phu An lac sa dalam dom labik jalan ia hu makna praong di gah pai di tinh Tien Giang. Jaik di ini, bruk glut jaleih 2 ar kraong rahtabiak biak trak damak. Kanja, rahra bhum palei kham marat peih ngak dom jalan langyah piah pacang caga haong bruk glut jaleih, tani tanat jalan mbak nao mai saong khik salamat ka rahra pak ini. Meng kadung jien kanja lac labaih 4 tỷ đồng, bhum palei hu peih bruk klauk ghang, ngak kè rọ patao, ngak pakhang ar kraong salah danak dak. Rahra bhum labik glut jaleih biak chreih chrai kayua oh njauk panduan ba nao daok di labik karei bo daok hu jalan mbak nao mai ngak bahrau hu khang kadang.

Tinh Chiet Giang, gah timun negar Cina hu peih ngak danak dak pandar kreim la-a yau sa pandap salih ka dom pandap meng katak dalam jabat ngak bruk, di dom mbang nyaom atau labik mbang di dom jabat, labik doanh nghiep kanja. Tinh Chiet Giang pilih ruah dom pandap kreim la-a salih ka dom pandap katak dalam labik karei di yau, brei blei dahlau pandap “kreim salih ka katak” tuk salih bahrau. Dahlau di nan, Uy mban pasiam veik saong cak rok patagok negar Cina hu pathau khan ka jalan ngak bruk di 3 thun piah jhul khang bruk pandar kreim ngak pandap salih ka katak.

Ban ine Athens, Hy Lap peih ngak bilan ngak Noel hoi thun ini ngan haong bruk truac hadah phun thong Noel di quang truong praong di harei kabroi. Thun ini, harei Noel hu ramik ngak gheih tui asal kadha dom baoh patuk saong kep asal dẻ. Bruk njauk caik hatai di harei ini nan lac phun thong glaong 20 mét hu asal meng gah barak negar Hy Lap. Harei Noel meda hu peih tabiak luac bilan 11 anak tal ngan haong rilo bruk ngak yau ye darak pasa Noel, parang ma-in ragu ragam saong tamat meng mbang cuh phao bingu di melam palao thun klak raok thun bahrau.

Bahrau ini, sa khach san biak karei hu angan “Manok ni Cano” (manuk di Cano) hu Gah Ky luc Guinness pok brei angan lac baoh sang praong abih di dunya hu thaot anek manuk. Khach san daok di mbuan ceik di labik padeih padei Campuestohan Highland di Philippines, glaong jaik 35m, hu 15 bilik ginup hu mac ngak laar, dom bilik oh hu pabah pambang tho. Danak dak ini hu padang ngak piah pok mayaom gah raong glang manuk, ada, abih di nyu nan lac drei manuk – lac janih athur raong hu daong ka yaok piluh ribau rahra pak Philippines hu bruk ngak tani tanat.