UB bhap bini tỉnh Đồng Nai birau brei padang Tổ rami ramik, tacei ba di tỉnh Đồng Nai piah peih ngak dom bruk rami ramik, tacei ba bhum Đông Nam Bộ. Tổ ini hu brei bruk roh duah, pok tagok Akok UB bhap bini tỉnh ka jalan ngak, jalan langyah peih ngak dom bruk ba tabiak, bruk ngak tui Sarak 24 di Mentri Chính trị ka cak rok patagok kinh te-xa hoi saong khik kajap an ninh quoc phong bhum Đông Nam Bộ; Sarak 46 di Akok Kapol rami ramik, tacei ba bhum Đông Nam Bộ…

Meng harei 15 tal harei 21-1, kapul urang lambaok rilo tỉnh ban gah meraong, jabat, doanh nghiệp nao ravang, pachreih ba saong alin hadiah pandap Tết ka urang jakar, urang lin saong bhap bini daok di rilo kaoh pulao dalam bhum tasik Tây Nam di tuk Tết Nguyên đán nek sak ine girai 2024. Ngan saong kadha "baoh taneh pamaong nao pulao atah", gam haong nan pachreih tui bruk jak ba "kayua tasik pulao palei negar - Kayua labik tapen negar taneh ia", dom kapul hu klah rabha kan kandah haong labik tapen negar, kaoh pulao saong daong padang ngak yaok pluh danak dak, dom pandap panda pabak ka raidiuk ilamu di urang jakar, urang lin Bộ Tư lệnh Bhum 5 Hải quân, yaom jaik 30 tỉ đồng. Dalam nan, Agribank alin hadiah pandap saong tadhau ayuh Tết pok jien 795 triệu. 

Tỉnh Ninh Thuận urak hu jaik 52.000 urang ngak nong hu mbaok dalam 65 labik di Kapul urang ngak nong. Dom pakat Kapol  hu pambuak bruk saong gah ngak nong jhul pakhang bruk tacei pato, ba brei bruk pandar KHKT tame ngak mbang; daong urang ngak nong  salih janih phun pala, athun raong tui jalan paglong kein laba bruk ngak mbang kinh te. Gam daong pato bruk ngak, brei mesre jien laba lap ka urang ngak nong patagok bruk pala drak, pablei salih saong daong bruk pablei salih, peih praong darak pasar  pablei pandap panda. Meng nan mbaok meta palei pala hu ralo salih birau, raidiuk mbang nguidi urang ngak nong hu patagok mboh di anak meta.

Dom palei bingu di dom tỉnh Đồng Nai, Bình Dương saong Bà Rịa - Vũng Tàu daok jar var haong bruk buh khak, pruh ia, ngak hareik ka bilan bingu tết thun 2024. Yaom lac bingu thun ini hu pala takik veik min rilo po bein jeng daok huac lac pablei takik hu kayua bruk ngak mbang kan kandah, darak pasar sit veik. Nan ye rilo puk palei, rilo labik hu ieu dom jabat, menuac sia kakei blei bingu tết, daong ka urang pala bingu plaih di bruk buac klaak bingu, ba phein saoh nao sang.

Tui kuhria mboh dahlau di Pasak tui iek bruk Langik tasik pakat negar, urak ini El Nino daok hu veik labaih 90%. Meng bilan 3 anak tal bruk pandiak  meng hu trun takik. Di bhum taneran kraong Cuu Long mbuan rah tabiak pandiak bhang, kurang ia, njom ia mbak. Nan ye, bruk njom ia mbak akok thun 2024 tui kuhria mboh dahlau meda biak catang; ia mbak  meda lih tame dalam bhum tapen tasik. Dom tỉnh tapen kraong Tiền, kraong Hậu yau Vĩnh  Long,  Cần Thơ, Bến Tre,...meda rah tabiak bruk njom ia mbak ngak kan kandah tal bruk ngak nong pala drak di bhap bini  yau ngak padai, phun mbang baoh.

Jabat Quốc vụ viện Trung Quốc hu khan brei thau harak “Jalan sahneng ka patagok kinh tế pariak piah pasiam kein laba ka urang taha, praong thun”, tuk Trung Quốc urak ini lac sa taneh ia angaok dunya hu menuac taha labaih 100 triệu urang. Dom asal kadha njauk caik hatai ieu peih praong bruk daong var mbang huak ka urang taha, praong thun, saong daong dom bruk kinh tế pariak, ngak brei ginup meda jang, cakrok jang dom pandap jien padai hưu trí.

Truyen thong Mỹ kuhria mboh lac Tong thong Donald Trump dahlau diah meda mek hu jayah dalam mbang pilih ruah di bang Iowa. Tui kenh CNN, dalam mbang palih ruah  di bang Iowa, kuhria tal maong 9 harei 16/1 (tukvak di Việt Nam), ong Trump hu 3.676 phiếu njauk hatai, klak atah dom urang karei dalam đảng Cộng hòa. Tapa nan, mboh lac ong Trump dang akok hu jaik meteh dom phieu hu palih ruah.

Bruk tamuh tabiak di jamaok Aedes albifasciatus, daok ngak ka dom urang jakar ngak praong di Argentina ba tabiak panuac kakei brei sangka prein yava hadei di tuk taneh ia ini hu dom urang njauk ruak thần kinh ba tal metai menuac kayua jamaok ini kaik. Dom urang ilmu brei thau, jamaok ini hu prein kaik tapa tal kalik kapal di athur raong atau khan ao di anek menuac. Labik kaik di jamaok biak jhak ka athur raong saong ka anek menuac, kayua nyu hu virus laka glo akaok saih phương Tây - sa ruak thần kinh matai manuac bhian mboh di anek saih./.