Dah page ini, di jabat Trung ương Đảng, Tổng Bí thư Nguyễn Phú Trọng, Akaok Tiểu ban văn kiện nyaom roya 14 di Ndang dang akaok mbang nyaom ka sa di Tiểu ban. Brei panuac di mbang nyaom, Tổng Bí thư Nguyễn Phú Trọng ndem lac, nyaom roya pakat negar mbang ka 14 di Ndang lac sa bruk chinh tri biak hu yaom glaong, meda lac sa bruk taong yaom hu makna di jalan cak rok patagok di taneh ia, hu makna kuhria ka harei hadei; dui pachreih, daong prein dalam Ndang, dalam rahra, dalam bol lin drei patui veik khang hatai di jalan nao tagok chủ nghĩa xã hội, brei thau ini lac bruk pilih ruah njauk, duah jalan ngak bahrau, lagaih haong bruk di anak mata pak Việt Nam saong bruk kuhria gam cak rok patagok di zaman. Tổng Bí thư Nguyễn Phú Trọng ndem lac, bruk caga dom asal kadha sarak ka Mbang nyaom roya ka 14 di Ndang, dalam nan hu bruk pathau khan chinh tri lac pathau khan hu makna praong, hu prein kuhria ka dom sarak karei di  nyaom roya.

Kapul ngak bruk di Mintri ngak nong saong patagok palei pala kayua Thứ trưởng Phùng Đức Tiến dang akaok harei kabroi hu mai ngak bruk haong UBND tỉnh Bạc Liêu ka patagok bruk raong kaya ikan saong bruk pacang taong cap suan hukum, oh pathau khan saong oh tui adat (IUU). Tal urak ini, mbaok taneh raong kaya ikan di tỉnh Bạc Liêu hu labaih 136 rabau ha. Dalam nan, mbaok taneh raong hadang jaik 133 rabau ha. Sản lượng kaya ikan pablei tapa negar langiu thun 2023 hu labaih 96.980 tấn, yaom jien mek tame hu 1 tỷ 030 triệu USD. Tỉnh Bạc Liêu kham merat tal thun 2025, hadang pablei tabiak negar langiu mek hu 1 tỷ 300 triệu USD saong tal thun 2030 hu 1 tỷ 700 triệu USD. 

Bilan padai Đông Xuân thun ini pak tỉnh Bến Tre kayua langik tasik lagaih, ginup ia taba saong yaom kaom tani tanat nan ye urang nong pala padai hu laba rilo. Urang ngak nong pak tỉnh Bến Tre daok tame bilan yuak padai Đông Xuân ngan haong hatai bui sambai pala njauk saong plaih nyaih hu bruk njom ia mbak. Di dom huyện Giồng Trôm, Ba Tri rilo mblang taneh pala padai Đông Xuân samar mek hu nang suat meng  5 - 6 tấn/ha, glaong jang thun blaoh jaik 1 tấn/ha. Tui mikva urang nong, bilan padai Đông Xuân thun ini takik njauk halak halieng, dom khak drak pandar jeng trun jang dut saong dom thun dahlau. Tal tukvak urak ini, ka oh hu mblang taneh ngak padai halei njauk kan kandah kayua njom ia mbak, saong ia taba dalam ribaong dalam mblang hamu jeng daok biak rilo.

Tui panuac di Công an TP.HCM, bala radaih dalam tuk Tết Nguyên đán di ban raya yaom lac rilo jang thun blaoh min takik jang jaik meteh dom menuac matai. Công an TP hu tacei pato gah cảnh sát giao thông brei peih rilo jang bruk pasang iek, langyah urang ngak suan, dalam nan bruk menyum alak mbia blaoh peih nduac radaih hu langyah gam gam, oh lac menuac halei, ngak bruk hagait, piah ngak jeng bruk bhian randap dalam bhap bini lac “menyum alak mbia blaoh, oh peih nduac radaih”. Bruk khang hatai langyah nan dalam tukvak tapa taduan hu rilo panuac njauk hatai di bol bhap rahra.

Pasak pasang iek ruak kik tỉnh Bình Thuận brei thau, di dalam tinh bahrau mboh sa urang metai medil lac kayua ruak maruai. Urang metai lac ranaih kumei angan T.T.H.T, umo 4 thun, daok di palei Phò Trì, xã Tân Thắng, huyện Hàm Tân. Tapa pasang iek ruak mboh lac, harei 7/2, ranaih kumei ini njauk anek asau sit di sang jaik taphia kaik rilo mbang, kaik dalam tame labik mbaok, dhei, vil val mata, mbaok. Urang dalam sang hu ba kamuan nao taong ruak tui jalan meng kan di bangsa saong tame Sang iek ruak Đa khoa labik La Gi, hadei di nan ba tagok Sang iek ruak Nhiệt đới TP. Hồ Chí Minh. Kamuan hu brei thau lac ruak maruai saong brei mboh tapa bruk lac pandiak, preo ieu, oh khin gaok mac kandik hangin. Harei 15/2, urang ruak metai.

Hàn Quốc harei ini brei tagok cảnh báo y tế tal tanut glaong abih, lac tanut trak damak, hadei di tuk yaok rabau bác sĩ thực tập sinh taneh ia ini padeih bruk piah đình công. Tui khau tin meng Hàn Quốc, labaih 8.400 bác sĩ, samu 2/3 dom bác sĩ daok ranaih di taneh ia ini padeih bruk, piah cagar veik bruk kuhria pilih ruah rilo anek saih tame dom sang bac y khoa, kayua mboh lac Hàn Quốc hu ginup bác sĩ ye, saong bruk njauk ngak urak ini, lac tagok jien bilan saong pasiam labik ngak bruk dalam gah y tế. Tui kuhria, sa bruk trun jalan praong gah y tế meda peih tabiak di ban ine Seoul harei 25/2 tal.. Thủ tướng Hàn Quốc Han Duck-soo tabiak panuac lac halan hatian ginum biai saong ieu dom bác sĩ samar drah mai ngak bruk veik.

Dah page ini, sa bala rilo sruh radaih ô tô ginuh tame gauk rahtabuak di labik tatua nduac samar di ban Tô Châu, tỉnh Giang Tô, Trung Quốc. Labaih 100 sruh radaih ginuh tame gauk ngak ka 9 urang njauk rambuac. Makna bala kayua jalan laar jeng ia patau ngak janar. Gah timu saong gah kreih negar Trung Quốc daok rah tapa mbang hajan, tuyết saong jeng ia patau biak kan kandah. Tui kuhria, dalam sa adit anak, nhiet do trun bier daok hu mboh di rilo bhum taneh pak Trung Quốc.  

Australia daok tabiak panuac ieu nao labik karei ngan haong yaok pluh ban sit bhum palei pala bang Victoria tuk khuah glai pambak praong. Tok dalam harei kabroi, labaih 2.000 menuac hu ba tabiak truh dom ban sit gah pai bang ini. Jaik 1.000 lin padam pui daok hu mbaok tame padam dom labik glai khuah, meng bruk daong di jaik 50 sruh kapal haoh padam pui. Kuhria tal urak ini, 11.000 héc-ta glai njauk pui mbang, 2 sang bac brei kreik pabah mbang, 5.000 baoh sang dalam bang Victoria lahik điện. Dom mbang khuah di bang Victoria ngak khat lahik biak trak damak gah drap ar saong athur raong di rilo labik raong praong./.