Di tuk taom gaok 67 urang angan je dalam taneh ia ka bruk “Bac megru saong ngak tui jalan hadah krah siam mekre di Ho Chi Minh thun 2023” hu peih tabiak tuk dah page ini di Hà Nội, Tổng Bí thư Nguyễn Phú Trọng ndom lac, hatai saong jalan ngak di Ho Chi Minh lac sa kho báu ka jalan sahneng cách mạng biak hu yaom glaong, pataom veik dom yaom glaong siam mekre, jeng tanut chuan piah padang ngak, pasiam veik ilamo, ngak jeng anek manuac Việt Nam zaman bahrau. Tổng Bí thư jia lac dalam tukvak anak tal, meda dak harei dak hu rilo kreih camin angan je rik tame ngak tui hatai saong jalan ngak di Wa daok veik miat miat gam haong bangsa Việt Nam văn hiến saong anh hùng.

Dalam tuk kinh tế dunya gaok rilo kan kandah, min tỉnh Tiền Giang jeng daok dui pachreih hu rilo urang buh jien tame ngak mbang haong phun jien tut angan tame biak praong. Meng akaok thun tal ini, tỉnh pachreih hu 15 danak dak, haong yaom phun jien tut angan buh tame ngak lac labaih 7.770 tỷ đồng, rilo jang labaih 75% duk haong tukvak ini thun blaoh. Jaik di ini, Tiền Giang biak caik hatai tal gah dui pachreih urang buh jien tame ngak mbang, pataom tame ngak pasiam bruk đầu tư, pablei salih tapa bruk salih bahrau adat ngak harak gar, patagok bruk taom gaok ndom biai nao mai saong daong ka doanh nghiệp piah samar lang talaih kan kandah, tavak tavaity. Gam haong nan, peih dom bruk ngak dui pachreih urang buh jien tame ngak mbang, yaih khan, brei thau dom prein khang di tỉnh piah ieu ta-a urang buh jien tame ngak mbang. 

UBND tỉnh Đồng Nai brei thau lac, hu 144 danak dak caong pataom mek taneh, danak dak hu pandar taneh ngak padai, taneh glai pacang caga, taneh glai đặc dụng thun 2024 oh ginup kein piah payua tagok Hội đồng bhap bini tỉnh pasang iek brei tapa. Phó Akaok UBND tỉnh Đồng Nai Võ Văn Phi ieu kakei dom po buh jien tame danak dak oh ginup kein piah payua tagok HĐND tỉnh, likau UBND tỉnh pasang iek, njauk hu harak gar langyah payua ka Sở Tài nguyên - Môi trường dahlau di harei 6/11 anak tal. Sở Tài nguyên - Môi trường pataom veik, pathau khan haong UBND tỉnh pasang iek, njauk gauk ka dom bruk ngak di dalam danak dak piah payua tagok HĐND tỉnh di harei 11/11.

Dom harei tapa di tỉnh Vĩnh Long hu ia ndik tagok glaong ngak brei dauk jalan, ngak khut padai saong njam patam. Tui kuhria meng ini tal jhung thun ia ndik daok tagok rilo mbang. Piah caga pacang, patrun patakik khat lahik, UBND tỉnh Vĩnh Long tacei pato dom pakat, dom gah, dom puk palei, brei paglaong hatai sahneng ka bruk ngak di drei, ngak siam bruk pacang caga. Gam haong nan, peih ngak siam bruk pacang caga tui jalan “4 di labik”, khik kajap salamat ka menuac urang saong drap ar, khik caga bruk pala drak. 

Hajan, hangin khang di melam 31/10 di dom labik dalam dom huyện Phú Tân, An Phú saong ban sit Tân Châu di tỉnh An Giang ngak ka 104 baoh sang jaleih saong par tabung sang. Hajan khang gam haong hangin rabuk daok ngak jaleih 640 ha padai, ndiuk saong ngak khut tal 10 ha njam patam. Urak ini kanja dom bhum palei hu daong ka rahra puh ramik saong pasiam veik dom khut tayah meng bala; samar drah pacang ia dauk khik caga bruk pala drak, samar drah brei buh dahlau phun jien daong ka dom baoh sang gaok kan kandah, sang sarak kanja, urang daok sa drei piah tani tanat raidiuk ka rahra. Gam haong nan jeng pasang iek, yaok pataom dom khat lahik piah ka rahra samar tani tanat bruk ngak mbang saong raidiuk.

Karja Tổng thống Mỹ Joe Biden hu pasang iek, brei tapa danak dak padang ngak điện hangin langiu tasik praong abih kuhria meng dahlau mai. Tui nan, danak dak điện hangin langiu tasik di bang Virginia hu prein khang abih tih 2,6 GW meda pabak điện brei ka jaik 660 rabau sang. Ini lac danak dak điện hangin langiu tasik ka 5 hu karja Tổng thống Biden brei ngak. Mỹ daok pamaong tal bruk lac ngak hu 30 GW công suất điện hangin di thun 2030. Ini lac sa caong khin praong dalam padang ngak  di gah năng lượng oh tathuak nerak carbon di thun 2035 saong bruk oh hu carbon di thun 2050.

Rajaei Canada khan lac meda khik tamo bruk brei tame negar dalam 2 thun anak tal saong padeih patagok dom urang tame negar meng di thun 2026, dalam tuk negar ini daok jar var haong dom bruk lạm phát glaong saong bruk sarau kadau gah sang danaok. Gilang paraik negar Canada brei thau, yaom lac bruk brei padeih tagok tanut tame negar piah langyah dom cuang kandah di sang danaok saong bruk lạm phát, min suai lavik, taneh ia ini jeng caong patagok dom urang tame negar. Jabat yaok pataom negar ini brei thau bruk tame negar biak rilo hu daong ka rahra negar ini patagok samar drah di abih dalam thun blaoh, pabak dom kan kandah di rahra taha daok padeih huu saong pok jien sangka iek glang prein yava glaong.

Jaik 50 ong taha Noel bac tamat blaoh sang bac Santa di Rio de Janeiro. Meng bilau kang mbong patih, dom taha Noel urang Brazil daoh takơ angaok jalan nao meng radaih điện tapa khu phố Santa Tereza saong yar tangin salam menuac tapa jalan. Dom urang likei bui sambai chreih chrai ini, mek hu blaoh bằng tốt nghiệp saong hu ginup paka piah jeng ong taha Noel chính thức. Urang jeng hu jao brei anek so ameh yau brei mboh ka bruk peih mbaok bilan Noel. Dalam var ngak adat bac tamat thun ini, dom ong taha Noel tadhau ayuh ka hòa bình – sron mbon angaok dunya./.