Dalam bilan 4 anak tal, Tổng cục yaok pataom meda peih bruk pasang iek rahra saong sang danaok di kreih tukvak. Bruk pasang iek ini piah pataom mek khau tin piah taong yaom kein lagaih di Jalan ngak cak rok patagok saong pasang iek bruk peih ngak dom Jalan ngak cak rok patagok khang kajap di Liên Hợp Quốc bo Rajaei Việt Nam hu sanya tal. Bruk pasang iek meda hu 7 asal kadha praong: khau tin ka dom urang dalam sang; bruk sang danaok saong bruk mbang ngui; khau tin ka bruk di cư; pato magru; took gauk; bruk manek di urang kumei dalam umo thun meng 10 tal 49 thun saong khau tin di urang lahik blaoh dalam sang.

Tui Viện Roh duah Patagok TP.HCM, quý I ini, KT-XH ban raya hu tani tanat, kayua TP.HCM hu caga dahlau, kham merat dalam bruk đầu tư công, blei pandar dalam taneh ia, pablei tabiak saong blei tame meng negar langiu. TP hu ba tabiak ngak bruk pachreih blei, pandar abih gah, meng pablei salih, dịch vụ tal du lịch, meng gah langiu tal mangaok mạng, pablei salih điện tử tagok khang, ngak jeng hatai sahneng siam ka darak pasar. Bruk ini hu makna biak praong tal hatai caong, tal bruk kuhri kuhria di dom urang đầu tư pagam pambak tame bruk ngak saong oh ngak di TP. 

Harei pataom dom urang ngak mbao ngan haong asal kadha “Báo chí Việt Nam – Ba akaok nao dahlau, salih bahrau kayua Bruk ngak cách mạng di Ndang saong rahra”, meda hu peih tabiak dalam 3 harei meng harei 15 tal harei 17-3 anak tal di TPHCM. Ini lac harei pataom hu peih ngak praong abih meng nan mai, pataom hu labaih 100 jabat báo chí, dom pakat Kapul urang ngak mbao Việt Nam di 63 tỉnh, ban dalam taneh ia. Harei pataom dom urang ngak mbao meda lac sa kadha praong gah ilamo, bahrau di gah ngak mbao, brei mboh cambaih chat luong, bruk praong glaong di dom bruk ngak ilamo dalam bruk ngak, bruk parang iek, jang yau dom danak dak ilamo siam gheih.

Anak bruk langik tasik kan kandah dalam bilan pandiak thu thun ini, tỉnh Tiền Giang daok ba tabiak rilo jalan ngak piah pacang caga pandiak bhang saong ia mbak njom tame, khik ginup ia pruh, khik caga dom bhum pala phun mbang baoh, dalam nan hu labaih 20.000 ha durian pablei tapa negar langiu. Di huyện Cai Lậy hu bhum pala phun mbang baoh praong labaih 11.000 ha, rilo meng pala durian pablei tapa negar langiu hu yaom kinh tế glaong. UBND huyện pataom tame pathau khan, jak ba bhap bini khik piah ia taba pala drak pambuak haong ngak dom ar pacang ia mbak saong ia ndik di dom labik mbuan gaok kan kandah. 

Urak ini, bruk mbuan khuah glai di huyện Bác Ái saong Ninh Sơn (tỉnh Ninh Thuận) mboh tagok tal pakat 4. Dom huyen karei dalam tỉnh Ninh Thuận jeng daok dalam tanut kuhria tagok jang pakat 3. Meng di akaok bilan thu, gah ngak nong di tinh jeng hu jak ba kapul peih ngak tui asal kadha “pak di labik” piah caga dahlau bruk pacang khuah, padam khuah di dalam tỉnh. Mban khik ramik glai pacang caga dua binek Sông Sắt - Sông Trâu hu patagok ginup 100% rahra, pambuak haong dom kapul rahra taduan bruk khik iek glai, padang ngak dom kathaop di dom labik jaik taphia piah pacang caga khuah glai saong pacang caga bruk yah tak glai.

Thế vận hội Olympic bilan hè Paris 2024 hu peih tabiak di jhung bilan 7 tal di negar Prang. Dalam nan hu jaik 326 rabau menuac hu mbaok tuk peih pakak, trun jaik meteh duk haong kuhria dahlau di nan. Piah khik salamat ka bruk peih pakak, ban Paris brei parabha jeng dua saong bhap bini oh brei nao tapa dom mbaik tatua pambuak dua gah takai kraong Seine. Karja jeng oh brei par dom sruh kapal haoh dalam bán kính 150 km vil val ban ine Paris mbiah tal tuk bruk ngak adat peih pakak hu tamat, salah. Thế vận hội Olympic bilan hè Paris 2024 meda lac mbang camereip dalam sajarah hu bruk peih pakak hu ngak di gah langiu sân vận động.  

Ấn Độ bahrau peih pakah gilai điện ngầm mala ia camriep di ban Kolkata, bang Tây Bengal. Hu padang ngak ngan haong phun jien jaik 600 triệu USD, labik jalan atah 4,8 km nini lac jit vu gilai điện ngầm mala ia camriep di Ấn Độ, nduac tapa kraong Hooghly. Taphia di nan, gilai điện ngầm nduac di hành lang Đông Tây bahrau tabiak mbaok ini jeng hu ga gilai điện ngầm dalam abih di Ấn Độ pak Howrah, atah mbaok haluk 30m. 

Takik di abih 8.565 urang matai angaok dom jalan “di cư” di dunya dalam thun 2023. Tui gah Di cư dunya (IOM), tapa nan brei mboh thun 2023 lac thun hu menuac di cư matai rilo abih kuhria meng di tuk dom dữ liệu peih bruk yaok pataom meng 10 thun dahlau. IOM brei thau, kayua hu takik dom jalan di cư salamat, nan ye yaok ratuh rabau menuac jeng daok nao tapa dom jalan oh njauk adat hukum, saong kurang siam mekre, salamat./.