Harei ini, di Sang Quốc hội, peih mbaok mbang Nyaom ka 29 di Ủy ban Thường vụ Quốc hội. DI Mbang nyaom ini,  Ủy ban Thường vụ Quốc hội caik rilo tukvak piah brei panuac ka bruk langyah, taduan mek panuac, ramik veik dự thảo Hukum taneh riya (pasiam veik); brei panuac ka bruk langyah, taduan panuac, ramik veik dự thảo Hukum dom kapul brei masaiy jien (pasiam veik); pasang iek bruk langyah di khoản 1 paka 6 di Hukum Đầu tư công. Di Mbang nyaom ini, Ủy ban Thường vụ Quốc hội jeng meda brei panuac ka bruk caga ka mbang nyaom oh kuhria dahlau mbang ka 5, Quốc hội mbang 15; pasang iek bruk urang ngak tui njauk thẩm quyền.

TPHCM bahrau tabiak mbaok peih bruk Xuân halan hatian 2024. Bruk nan hu peih tabaik meng harei 7/1 tal harei 7/2, hu dom bruk ngak lac nao ravang, alin hadiah pandap brei ka 15 ký túc xá SV, 51 labik daok ilamu, labik sang trọ dam dara urang ngak; pasang iek prein yava, brei jru ka 3.000 rahra, uranaih, dam dara saong rilo bruk ngak hu makna karei karei. Tapa nan, hu daong jhul khang bruk jak ba "Ban raya HCM – Ban raya dahlak anit ranam", saong bruk pato pakai ilamu meng kan” Menyum ia hadar halau ia"; peih ngak dom bruk daong ka dom urang kan kandah dalam tuk Tết thun sak inegirai 2024.  

Di tỉnh Bình Dương, Kapul dam dara pakat negar hu pambuak bruk peih ngak danak dak "Tết klah rabha – Thun sak inegirai hadah hadai” piah jao labaih 10.000 paok pandap Tết ka dom urang ngak gaok kan kandah kayua cakak trun bruk ngak hadei di jit praong, dom urang taong cap ikan saong bol lin biên phòng. Di Danak dak, 400 urang ngak hu taduan paok pandap yaom 700.000 đồng sa paok dalam nan hu kadung lì xì hu 300.000 jien mbaok saong dom pandap panda pandar yaok harei dalam dom harei Tết piah pambak praong hatai krah rabha, anit ranam gauk, payua dom panuac tadhau ayuh, caong maong ka sa thun kaya mada khang kajap jang, siam makre saong tani tanat jang.

Mikva urang raong nghêu di tỉnh Tiền Giang daok chreih chrai kayua nghêu hu urang blei salih mai blei hu yaom, meng 30.000 tal 35.000 đồng/kg, tagok jang tukvak ini thun blaoh 10.000 đồng/kg. Meng năng suất 15 tấn/ha mbaok ia saong meng yaom pablei yau urak ini, urang raong nghêu hu jien mek tame meng 400 - 450 triệu đồng/ha. Tui Sở Ngak nong saong Patagok palei pala tỉnh Tiền Giang, thun 2023, bruk raong nghêu tagok hu tani tanat, mbaok ia raong jaik 2.320 ha. Sản lượng nghêu raong hu di tỉnh thun 2023 labaih 18.000 tấn, lac labaih 97 % duk haong tukvak ini thun 2022.

Công an dua huyện Lộc Ninh saong Bù Đốp, tỉnh Bình Phước daok pasang iek, langyah dua bruk pajeng ba yaok ratuh kg pháo lậu piah ba nao pablei. Dom harei puac thun bruk pablei salih phao daok rahtabiak di rilo labik. Công an tỉnh Bình Phước duah mboh rilo mbang pajeng ba phao lau tapa jalan tapen negar Campuchia ba mai tal Bình Phước blaoh pajeng nao pablei ka dom tinh, ban. Piah pacang cakak bruk pajeng ba, pablei salih phao lau, công an dom bhum palei dalam tỉnh Bình Phước saong gah biên phòng daok patagok bruk pasang iek rah tui jalan tapen negar saong dom jalan praong dalam tỉnh.  

Dalam thun 2023, Campuchia mek hu labaih 37 triệu đô la Mỹ meng bruk pablei harak tame ravang iek Angkor ka tuai negar langiu, rilo jang labaih 200% duk haong thun 2022. mBan khik ramik Angkor jeng brei thau lac, dalam thun 2023, Campuchia hu taduan raok labaih 14.800 mbang tuai negar langiu mai ravang kandi Koh Ker, mek jien tame hu labaih 222.000 USD. Hu thau, Angkor yaok klak lac labik pilih ruah dang akaok ka tuai damuai tuk mai tal Campuchia. Tuai mai tal ini piah maong mbaoh dom văng patao, dom kandi praong gheih mekre, labik hu UNESCO pok brei angan lac  1 dalam 7 labik mekre abih di dunya, lac labik ginreih saong praong abih di dom saman patao Khmer caik veik.

Bruk kurang tuyết biak khang dalam bilan laar dui atah dalam luac dua thun tapa di ban ine New York (Mỹ) meda daok rahtabiak. Kuhria meng harei 13/2/2022, ban ine New York hu rah tapa 692 harei mboh dom tuyết mala tanut 2,54 cm. Dom urang roh duah ilamo brei thau lac, bruk tuyết laik trun takik di New York lac sa dalam dom kan kandah di bruk biến đổi khí hậu. Dalam tuk nan, bruk pandiak bhang, thu lagu biak trak dui atah di bhum Tây Nam negar Mỹ di bilan pandiak thun 2023.

Thủ tướng Anh Rishi Sunak brei thau, 5 tỷ 200 triệu bảng Anh (samu 6,6 tỷ đôla) hu buh tame bruk pacang caga ia dauk ia sua saong labaih 1.000 menuac di Jabat Môi trường daok daong dom puk palei. Panuac khan nan hu ba tabiak dalam tuk taneh ia Anh daok pacang caga dom kan kandah di ia dauk ia sua. Tui jabat Môi trường Anh, dom mbang rabuk gam gam dalam dom adit jaik ini ngak brei ia di dom baoh kraong tagok glaong, sraiy tapa ar di grauk labik dalam negar Anh saong xứ Wales, ngak kan kandah khang tal raidiuk di rahra./.