Ngan haong kadha “Dam dara ba akaok halain hatain ka raidiuk di rahra”, TP.HCM daok peih Bilan dam dara meng urak ini tal abih harei 31/3. Thành Đoàn TP.HCM daok peih ngak 5 bruk praong di urang doan, dam dara dalam ban raya salam uan pahadar 50 thun Harei peih paha gah maraong negar, yasa taneh ia (30/4/1975 - 30/4/2025). Taphia di nan, Thành đoàn saong kapul dam dara dom pakat daok peih ngak 8 danak dak praong yau ye danak dak “Kraong Sài Gòn – baoh kraong di dan raya drei”, danak dak ngak pasiam veik Labik inem mek sajarah ceik Dinh di xã Tân Hòa, huyện Tân Thành, tỉnh Bà Rịa - Vũng Tàu…

Yaom padai di ĐBSCL daok trun khang, rilo menuac blei salih klaak jien caik takai kayua huac khat. Rilo mblang hamu padai Đông Xuân di huyện Mộc Hóa, tỉnh Long An padai tasak abih, daok 5 harei gac lac tal harei yuak min oh ka hu menuac bayar njauk yaom. Duk haong dahlau Tết,, kuhria rah tapa yaom padai trun meng 900 đồng tal 1.500 đồng/kg tui janih. Nan ye, menuac blei klaak jien caik takai kayua blei yaom glaong, saong hu panuac caong ginum biai veik haong urang ngak padai piah trun yaom, meyah oh ginum biai hu, ye klaak jien caik takai. Dalam tỉnh Long An daok hu 170.000 ha padai Đông Xuân 2023 - 2024 ka oh yuak, urak ini urang ngak padai daok cang yaom tapa yaok harei. 

Gah chức năng di tỉnh Sóc Trăng daok pambuak gauk peih ngak dom jalan ngak samar drah piah duah mboh, pathau khan jak ba dom urang klak nduac dauk samar drah mai veik labik klak njil may túy. Kuhria tal abih harei 25/2, Công an tỉnh Sóc Trăng hu ba 75 urang klak nduac dauk mai gilac labik klak njil. Dahlau di nan, harei 24/2, jaik 200 urang pak labik klak njil Sóc Trăng hu yah anek gai, yah pabah mbang praong nduac tabiak langiu, nduac rah nao tui rilo jalan piah nduac dauk. Dalam tuk nao, rilo urang ini hu taong tayah, ngak sarau kadau gah dalam labik. Makna hu brei thau tuk camriep lac kayua bruk kandah gauk di dom urang daok klak njil di labik ini.

Pandiak bhang daok ngak ka ia dalam glai glam U Minh Hạ, tỉnh Cà Mau thu samar. Urak ini hu labaih 20.000ha glai mbuan si khuah, dalam nan hu labaih 2.000 ha glai biak mbuan si khuah. Ong Huỳnh Quốc Việt, Chủ tịch UBND tỉnh Cà Mau hu mai pasang iek bruk pacang khuah padam khuah glai glam U Minh hạ, kakei kapul khik iek brei paglaong hatai sangka, tuk halei jeng caga kayua bilan thu thun ini tui kuhria mboh lac daok dui atah saong khang jang dalam dom bilan anak tal. 

Nam Bộ urak ini daok dalam tukvak tabung glaong di bilan thu. Bruk njom ia mbak meda glaong jang rilo thun. Tui kuhria, bruk njom ia mbak meda mbang dalam abih dalam harei ini (26/2). Tanut njom ia mbak lac 4 gam/lít meda mbang dalam meng 38 - 65km di yaok baoh kraong. Ini lac tanut ia mbak oh mek hu ia piah pandar atau ia piah pala drak. Dalam nan, di kraong Vàm Cỏ Đông, ia mbak meda mbang tame tal bilai Bến Lức, Long An. Di kraong Vàm Cỏ Tây, ia mbak meda mbang tame tal Phú Ngãi Trị, Châu Thành. Di kraong Cổ Chiên, ia mbak mbang dalam tal bilai Đức Mỹ, Càng Long, Trà Vinh. Daok di kraong Hậu, ia mbak meda mbang tal xã An Lạc Tây, Kế Sách, Sóc Trăng.

Campuchia bahrau peih bruk pilih ruah urang ka Thượng viện mbang 5. Hu 125 urang Quốc hội saong labaih 11.000 urang jakar xã, phường lac menuac lambaok ka cử tri piah buh phiếu. Hu 4 đảng hu menuac di drei tame pakacah lac Đảng bhap bini Campuchia pan karja, Đảng Bảo hoàng Funcinpec, Đảng Ý chí Khmer saong Đảng Prein khang Bnagsa. Thượng viện Campuchia mbang 5 hu 62 urang, dalam nan hu 2 urang di Patao saong 2 urang hu Quốc hội pilih ruah, daok 58 urang kayua dom urang jakar xã, phường saong dom nghị sĩ Quốc hội pilih ruah. 

Dom mbang buh phieu aval piah pilih ruah Tổng thống Nga hu peih tabiak sa labik biak joa manuac, kan nao tal di negar Nga. Tukvak buh phieu praong dalam mbang pilih ruah Tổng thống Nga thun 2024 hu peih tabiak dalam dom harei 15 tal harei 17/3. Ini lac mbang camriep kuhria meng kan mai, sa mbang pilih ruah tổng thống hu peih tabiak dalam rilo harei di Nga. Dahlau di nan, dalam mbang pilih ruah thun 2018, labaih 180.000 urang hu mbaok tame buh phieu aval saong 31.000 urang buh phieu di dom labik buh phieu di dom sruh gilai di tasik.

Dom urang roh duah Đức bahrau duah mboh sa daning patau hu meng 11.000 thun dahlau daok di labik dalam 21 mét di tasik Baltic. Meng bruk dut sap sring, dom urang ilamu Đức hu ngak veik labik vil val daning patau di dom tukvak karei di gauk. Jaik 8.500 thun dahlau, labik vil val daning lac glai ram. Tapa roh duah mboh lac, daning hu anek menuac padang ngak paga pacang tapon tuần lộc, meng nan, dui pachreih tapon tuần lộc tal labik di dom urang man pateok saman đồ đá./.