Mintri jalan mbak pajeng ba bahrau patabiak danak dak “Xuân di labik padang ngak” piah ngak bruk luac tukvak Tết Nguyên đán sak inegirai thun 2024, jhul samar bruk ngak salah danak dak jalan nduac samar Cần Thơ - Cà Mau. Tui nan, Mban khik ramik danak dak Mỹ Thuận paglaong bruk peih ngak danak dak Jalan nduac samar Cần Thơ – Cà Mau jeng "3 ca 4 kíp" piah pabak ka dom bruk ngak suai di thun 2023. Langiu di nan, pambak tame dom siam lagaih di langik thu lagu piah ngak tagok maong di abih tih dom labik padang ngak. Jalan nduac samar drah Cần Thơ - Cà Mau atah jaik 111 km hu ngak haong yaom jien abih tih labaih 27.520 tỷ đồng. Danak dak nao tapa ban Cần Thơ saong 4 tỉnh Hậu Giang, Bạc Liêu, Kiên Giang, Cà Mau.

Thun ini, TP.HCM hu Rajaei brei pilih ruah, ieu rahra tame ngak lin saong ngak bruk công an bhap bini lac 4.900 urang. Kan kandah dalam bruk pilih ruah lin di TP.HCM lac hu rilo rahra njauk ruak gah mata maong iek, dom urang hu angan dalam hộ khẩu min oh hu mbaok tagok tal labaih 12% duk haong dom menuac dalam umo ieu tame ngak lin. Nan ye Akaok UBND TP.HCM Phan Văn Mãi hu panuac ieu dom gah pataom tame ngak siam bruk di drei piah jao – taduan urang nao ngak lin, oh ngak meng ngak ka nyu salah bruk.

Dua jalan di ban Thủ Dầu Một, tỉnh Bình Dương hu ngak iek bruk caik camera phạt nguội lac jalan Phạm Ngọc Thạch saong jalan Hùng Vương. Hadei di 1 bilan ngak iek, dom camera pasang iek mboh hu 190 urang ngak suan ngan haong paok jien phat lac 396 triệu đồng. Dom duas ngak suan rilo meng lac, nduac samar, peih radaih oh njauk jalan. Meng dom siam lagaih ba mai, Công an ban Thủ Dầu Một daok hu panuac ka UBND ban peih praong bruk ngak ini tal dom jalan saong “labik sup palup” mbuan hu bala.. Tui kuhria, dalam thun ini meda peih bruk caik camera di dom jalan, labik ngak kong.

UBND tỉnh Đồng Nai bahrau mbaoh tangin brei tapa danak dak du lịch sinh thái, padeih padei, me-in sambai di labik khik ramik langik tasik - ilamu Đồng Nai, vaktu 2021 - 2030. Bruk ngak di danak dak lac ba pandar, patagok prein khang, siam lagaih gah kaya pandap meng langik tasik, ilamu, sajarah di labik khik ramik langik tasik - ilamu Đồng Nai tui jalan khik ramik, patagok khang kajap saong ieu pataom yaok prein khang dalam rahra piah khik iek, patagok glai, khik caga langik tasik saong cakrok du lịch. Khik ramik saong patagok dom yaom glaong gah ilamu, abih di nyu lac inem mek sajarah saong ilamu bhap bini bangsa Chơro. 

UBND tỉnh Cà Mau bahrau hu jalan ngak piah pacang khuah, padam khuah glai di bilan thu anak tal. Dalam nan, Akaok UBND tỉnh ieu kakei dom po glai bhum U Minh Hạ saong glai bhum kaoh pulao Hòn Khoai pasang iek, rami ramik kapul ngak bruk, sruh radaih, pandap panda piah khik iek bruk pacang khuah, padam khuah glai; peih ngak dom jalan langyah piah pacang caga samar drah, hu siam lagaih tuk hu bruk khuah glai. Gam tui di nan, paglaong bruk pathau khan, pato pakai ilamo ka rahra daok dalam bhum glai saong ka taong abih rahra ngak njauk, ngak catang dom adat di kanja ka bruk daong khik iek glai saong pacang khuah padam khuah glai. Tỉnh Cà Mau hu taneh glai mbuah khuah lac labaih 45.600 ha, lac glai U Minh Hạ praong labaih 45.000 ha saong glai di bhum kaoh pulao praong 570 ha.

Dom urang gah lập pháp dang akaok Mỹ bahrau ginum biai njauk gauk ka yaom cai pandar abih tih lac 1 rabau 600 tỷ đôla ka thun jien padai 2024. Ini lac sa takai yam praong meda daong ka rajaei plaih kreik meneing pabah mbang di puac bilan ini. Njauk caik hatai lac, dalam pok jien nan, hu caik tabiak labaih meteh brei ka gah quốc phòng, tagok tal mangaok 886 tỷ đôla. Tổng thống Mỹ hu pok meyaom ini lac sa takai yam nao jiak jang bruk pacang cakak kreik pabah mbang rajaei saong khik caga dom bruk praong njauk ngak dahlau di taneh ia.

Thủ tướng Nhật Bản Fumio Kishida brei thau lac, tal urak ini, dom urang metai dalam mbang magei baoh taneh di tỉnh Ishikawa lac labaih 160 urang. Thủ tướng Nhật Bản daok hu panuac ieu dom bruk kham marat pambuak haong dom palei njauk pacang cakak, meng jalan radaih saong jalan tasik. Gam haong nan jeng ieu kakei dom kapul daong duah urang njauk bala njauk samar drah duah dom urang lahik hadei di 1 adit rahtabiak bala magei baoh taneh, oh kuhria hagait tal bruk langik hu tuyết laar saong hajan patao. Urak ini rilo danak dak rik jien tame Kadung jeng daok hu jhul samar di taneh ia ini piah daong hu siam jang ka dom urang njauk kan kandah di mbang magei baoh taneh.

Hajan praong ba tal ia sua ia dauk, jaleih taneh di rilo labik dalam tỉnh Tây Java, Indonesia dom harei tapa ngak brei yaok rabau menuac di 5 palei lahik abih sang danaok. Jaik 100 ha taneh ngak nong jeng dauk dalam ia. Bol lin, cảnh sát taneh ia Indonesia saong dom urang halan hatian daok parabha pandap panda, padang dom labik daok ka rahra saong peih jalan nao tal dom labik njauk pacang cakak kayua ia dauk, jaleih taneh. Labik tahanek lisei, labik iek ruak hu padang tagok piah pabak pandap mbang, pasang iek prein yava ka bhap bini saong gah daong duah urang gaok bala./.