Tui nan, bruk pamong tal lac padang ngak gah pato pakai salih birau, hu jeng pasak pato - megru asar siam glong di taneh ia saong bhum chau A, khik brei lagaih bruk patagok gah pato megru saong asar pato padar. Tui nan, padang xa hoi bac megru, pachreih ba saong ngak brei sumu gauk, lagaih piah bhap bini hu bac megru luac rai, pato pakai urang ngak pabak sumu bruk patagok kinh te - ilamu - xa hoi saong yam tame dunya.

Uan Tết Nguyên đán thun sak ine girai 2024, Bộ đội Biên phòng tỉnh Cà Mau ieu pataom rilo gah piah ngak rilo bruk daong ka bhap bini bhum taphia negar tasik di tỉnh bui sambai taduan raok Tết aval jang dalam chreih chrai, bak talei jum pataom urang lin saong bol bhap rahra. Nao gam haong bruk sangka daong ka bhap bini bhum taphia negar tasik mbang Tết dahlau, dom kapul di Đồn Biên phòng daok hu peih tabiak mbang tabung glaong pacang caga kol tội phạm, jru phien, kol pablei salih menuac, pablei salih pandap pakauk, bleik saleik dalam pablei salih saong pandap ja di tapen negar tasik di tuk dahlau, dalam saong hadei Tết thun ini. 

Di huyen Mỹ Tú, tỉnh Sóc Trăng gah bol pan phao kraong di huyen birau peih ngak dom bruk Tết bol lin - bhap bini thun 2024 piah sang ka daong ka baoh sang sarak karja, mikva sang kathaot. Dalam mbang ini, gah bol lin bol pan phao kraong meda pambuak bruk daong puk palei ramik ngak pasiam danak dak ka bhap bini pandar, padang sang bol lin, sang jum pataom; rivang, alin pandap ka baoh sang kathaot, baoh sang sarak karja; alin paok jien bac, radaih juah ka anek saih sang kathaot bac da-a naih joi…Tapa nan piah ka gah bol lin brei mboh hatung hatian thau dhar phol ngan haong dom baoh sang hu buh prein yawa ngak bruk cách mạng, meng nan pambuak kajap jang bruk jum pataom bol lin haong bhap bini.

Urang ngak nong tỉnh Trà Vinh urak ini daok yuak padai bilan Thu Đông 2023. Tui kuhria mboh, padai pala njauk, hu rilo jang saong padai that mek hu tanut pablei tabiak negar langiu daok hu urang blei salih mai blei di mblang hamu haong yaom 9.800 đồng/kg, glaong jang 500 đồng/kg duk haong adit dahlau. Urak ini, urang ngak nong jeng daok tam drak padai bilan Đông Xuân 2023 - 2024. Gah ngak nong kakei mikva pambuak bruk haong dom HTX ngak nong saong doanh nghiệp meng bruk blei pandap tame ngak tal bruk pablei padai tabiak, khik siam asar brah, pabak ka bruk pablei tabiak negar langiu, tagok jien laba ka urang ngak padai.

Urang raong la-nung di tỉnh Bà Rịa - Vũng Tàu daok khat lahik trak tuk yaom lanung daok meng 65.000 - 75.000 đồng sa kilo. Di huyen Xuyên Mộc hu labaih 30 baoh sang raong lanung pablei. Dom thun jiak di ini, yaom pandap mbang tagok, yaom pablei lanung trun ngak brei urang raong gaok rilo kan kandah. Tukvak jaik ini, Kapol urang ngak nong dom pakat peih bruk pasram, jao brei ilamu ky thuat  ka urang raong lanung. Kapol daok jak ba urang padang dom kapol nyaom  pambuak bruk, yam tal mbaoh harak pambuak bruk haong dom doanh nghiep piah tani tanat bruk pablei lanung.

Tui yaok pataom bahrau abih hu khan brei thau di harei kabroi  mboh lac, menuac sia Trung Quốc daok partui jalan trun  labaih 2 triệu menuac dalam thun 2023. Dalam tuk nan, tui pathau khan patagok di taneh ia ini, menuac sia Trung Quốc gam gam trun dalam tukvak anak tal. Thun 2023, hu labaih 9 triệu uranaih hu ndih tapui tabiak, samu 6,39 phần nghìn; dalam tuk nan, hu 11 trieu 100 rabau menuac metai, lac 7,87 phần nghìn. Tapa nan mboh lac bruk patagok menuac sia di tanreh ia ini lac âm 1,48 phần nghìn. Dahlau di nan, di thun 2023, menuac sia Trung Quốc trun 850.000 urang di jhung thun 2022, tui nan taneh ia ini daok yam tame tukvak menuac sia tagok tui jalan âm.  

Rajaei Nhật Bản brei patagok dua mbang  kadung jien daong bruk njauk bala meng langik tasik  saong dom bruk karei rah tabiak kan thau dahlau meng 3,4 tỷ USD tagok 6,8 tỷ USD. Pho Chánh Văn phòng Rajaei Nhật Bản brei panuac lac bruk hu makna praong brei khik bruk daong piah pasiam veik dom bhum gaok kan kandah kayua bala rah tabiak. Mbang megei baoh taneh khang 7,8 độ richte  rah tabiak di harei 1/1 meng blaoh ngak takik di nyu 222 urang metai, ngak khut tayak rilo sang danaok saong jalan mbak karei karei.

Dom mbang rabuk bilan barak haong tuyết laik kapal, hajan praong saong ngin khang di bhum kreh saong gah timur negar Mỹ dalam adit blaoh ngak brei takik di nyu 33 urang matai saong yaok pluh urang karei njauk rambus, rilo meng lac kayua bala angaok jalan hu tuyết laik kapan. Langiu di nan, yaok pluh urang njauk bala kayua dom bruk pambuak tal hajan. Yaok ratuh sang lahik điện, rilo labik ngak bruk di karja, rilo sang bac brei kreik pabah mbang. Tal urak ini, jaik abih dom bang di Mỹ brei tabiak bruk samar drah atau tabiak panuac brei thau ka bruk langik tasik kan kandah./.