UBND TPHCM bahrau hu harak payua ka Bộ Nội vụ, Jabat Rajaei ka bruk ba tabiak panuac peih praong parabha pakat khik ramik kanja di dom gah ka TPHCM peih ngak Sarak ka 98 di Quốc hội ka bruk ngak iek dom jalan ngak, sarak karei piah cak rok patagok UBND TPHCM ba tabiak hu payua tagok HĐND TPHCM brei ka jalan ngak buh jien tame ka abih tih dom danak dak buh jien tame tui jalan pambuak gauk di công - tư (PPP) di gah ilamo, thể thao. Ban raya daok likau hu pasang iek, brei trun jien pah taneh njauk kak tame ngan haong dom gah gaok kan kandah di bala langik tasik, jit ruak di dalam ban raya. 

UBND tỉnh Đồng Tháp brei thau, kuhria ta-eng dalam thun ini, abih tih cuah di tỉnh pabak brei ka bruk ngak jalan nduac samar di Trung ương lac 4 triệu m3. Piah lang talaih kan kandahh, tỉnh Đồng Tháp hu panuac ieu Mintri Tài nguyên saong Môi trường brei pasang iek, peih bruk taong yaom abih tih sản lượng cuah saong bruk pambak tal alam langik tasik di dom labik kraong Tiền saong kraong Hậu; tacei pato cambaih laih jalan ngak, bruk kuac raok mbeik veik jalan ia nduac di dom bãi bồi, kaoh pulao piah patrun patakik bruk glut jaleih… Gam haong nan, hu panuac ieu Mintri Tài nguyên saong Môi trường pok tagok Rajaei pasang iek, brei pandar sarak karei dalam bruk pabak pandap ngak ngan saong Danak dak jalan nduac samar Cao Lãnh – An Hữu saong Mỹ An - Cao Lãnh.

Urak ini urang nong di bhum Đồng Tháp Mười di huyện Tân Phước, tỉnh Tiền Giang biak chreih chrai kayua yaom baoh manaih meng 10-11 ribau đồng/kg. Tui yaom ini, yaok kg manaih, urang pala laba hu labaih 5.000 đồng. Gam haong bai khoai mỡ, padai, thanh long ye manaih lac janih baoh kayau hu pala rilo di urang nong dalam bhum. Kayua yau nan ye, jalan ngak di huyện Tân Phước lac patui veik khik tani tanat saong peih praong mblang pala manaih pablei baoh tui jalan paglaong năng suất, chất lượng, tagok kein laba ka urang bala manaih.

Tukvak tapa, ruak pandik meta bhong meriah tamuh khang di tỉnh Cà Mau. Kuhria meng akaok bilan 10 tal ini, dalam tỉnh hu labaih 25.000 mbang urang njauk ruak pandik meta bhong meriah, ta-eng huyện U Minh hu labaih 2.300 urang, rilo meng lac anek saih saong hu mboh dalam sang bac. Jabat chức năng palei daok ba tabiak dom jalan ngak piah patrun patakik bruk njaom mbak di ruak, abih di nyu lac dalam dom labik pato bac. Anak bruk ini, UBND tỉnh Cà Mau hu tacei pato gah y tế pambuak bruk haong gah pambuak tal, patagok bruk pacang ruak, abih di nyu lac dalam sang bac. 

Dom harei tapa, mikva bangsa Khmer di tỉnh Sóc Trăng daok jar var caga uan raok harei Sene Dolta dalam bui sambai tuk padai hu yaom, rilo sang mikva kan kathaot hu daong sang danaok, ba bruk tani tanat mbang ngui. Sóc Trăng lac tinh hu mikva bangsa Khmer rilo abih dalam taneh ia, lac labaih 400.000 urang, meblah labaih 30% rahra dalam tỉnh. Dalam 5 thun tapa, tỉnh Sóc Trăng hu daong ka jaik 26.900 sang kan kathaot lac bangsa takik cak rok patagok kinh tế; jak ba urang ngak pahla daong padang ngak hu jaik  3.500 baoh sang ka urang kan kathaot, dalam nan hu labaih  1.200 baoh sang ka mikva bangsa Khmer. Kayua yau nan ye, dom baoh sang kan kathaot lac urang bangsa Khmer trun daok labaih 4,5% sa thun.

Dalam sa kham merat piah cakak trun bruk blei xăng menyek meng negar langiu tame saong piah patrun dom khí thải nerak tachauk, Rajaei Lào daok jhul khang bruk pachreih bhap bini pandar dom radaih nduac meng điện. Dalam nan hu ba tabiak dom jalan ngak piah jhul tagok bruk pandar radaih điện, yau bruk pachreih ngak tabiak dom janih gah radaih điện saong ắc quy radaih điện, meda pabak hu siam. Rajaei Lào caong lac tal thun 2025, dom radaih điện hu 1% dom radaih dalam taneh ia Lào saong hu takik di abih lac 30% di thun 2030.

Harei ini (12/10), Urang pan akaok negar Triều Tiên ong Kim Jong-un saong Tổng thống Nga Putin hu ndem mayai nao mai di harei uan salam pahadar 75 thun harei padang talei pambuak gauk di dua taneh ia. Dalam mbang ndem mayai nao mai piah uan salam, Tổng thống Nga Putin hu payua panuac tadhau ayuh, gam tui di nan jeng caong maong ka sanya di dua gah ngak hu dalam mbang nao rivang negar Nga di ong Kim Jong-un bahrau blaoh meda rik tame bruk tani tanat an ninh saong tani tanat bhum. Bilan dahlau, ong Kim Jong-un hu nao rivang negar Nga saong dua urang pan akaok negar hu ginum biai ka rilo bruk ngak pambuak tal talei pambuak gauk di dua gah jang yau bruk jhul patagok di taong abih gah bruk pambuak gauk di gah kinh te saong pablei salih.

Gah Y tế dunya (WHO) brei thau lac di thun 2024, dom menuac umo mangaok 65 thun di châu Âu meda hu rilo jang menuac umo mala 15 thun. Piah patrun patakik kan kandah di bruk menuac sia taha nao, WHO hu panuac ieu dom jalan ngak piah daong urang taha khik ramik saong pasiam prein yava, rup saik, paglaong siam mekre raidiuk. Dalam dom panuac ieu nan, hu sarak patagok bruk pasram pahat rup saong ilamu ka urang praong thun. Tui WHO, bruk hu mbaok tame dom bruk pasram pahat rup di tanut glaong jang meda patrun hu 35% bruk mbuan matai kayua yaok makna ba tal./.