Dah page ini, di Labik Bến Nhà Rồng – Miuyim Hồ Chí Minh, dhar TPHCM, dalam dom bruk ngak di Danak dak Xuan palei negar thun 2024, Akaok negar Võ Văn Thưởng, diuk di ong haong kapul dom urang lambaok 100 urang negar VN daok pak negar langiu hu angan je hu mai cuh gilau, pok bingu pahadar Chủ tịch Hồ Chí Minh, pahadar Chủ tịch Tôn Đức Thắng saong peih ngak adat palao ilan di harei palao ong Cong ong Tao mai langik. Di pabah lamnge Nhà Rồng, Akaok negar Võ Văn Thưởng haong diuk di ong jeng hu taom gaok, sua tangi payua panuac pachreih ba saong tadhau ayuh Tet tal mikva VN daok pak negar langiu angan je mai palei negar dalam tukvak ini.

Bahrau ini, Trung Quốc brei blei tame tui jalan chính ngạch durian caik la-an di Việt Nam. Ini lac kadha bui sambai ka urang pala durian di taneh ia drei, kayua hu labik pablei rilo jang saong patrun hu trak damak bruk tal bilan paik baoh oh pablei tapa negar langiu hu. Kayua lac hadei di tuk paik baoh blaoh, durian oh ka samu pablei tapa negar langiu, meda ba tame kho la-an khik piah saong pablei hadei. Tui nan jalan pablei baoh durian tapa negar langiu hu peih praong, min jeng caik tabiak dom cuang kandah oh sit nan lac bruk dut iek durian caik la-an di Việt Nam piah pablei tapa Trung Quốc. Meyah oh ngak siam bruk dut iek, meda ngak kan kandah praong tal bruk pablei tapa negar langiu.

Dự thảo ramik ngak tỉnh Đồng Nai tukvak 2021-2030, pamaong tal thun 2050 ba tabiak jalan ngak khik tani tanat saong padang ngak 6 labik khik ramik alam langik tasik, bein negar. dalam nan hu Bein negar Cát Tiên praong jaik 41 ribau ha meda hu ngak pasiam, peih praong; Labik Khik ramik sinh quyển Đồng Nai praong jaik 970 ribau ha saong Labik khik ramik alam langik tasik – ilamo Đồng Nai praong labaih 100 ribau ha jeng hu khik tamo. Tinh kuhria padang ngak 3 labik khik ramik bahrau lac: Labik khik caga janih – mbaok mata glai ceik Chứa Chan praong labaih 2 ribau ha, Labik khik caga janih glai – mbaok mata glai Long Thành - Nhơn Trạch praong labaih 10 ribau ha saong Labik khik caga Bein negar Tân Phú praong labaih 13 ribau ha.

Jaik Tết, dom tỉnh daok ngak catang bruk dut iek menuac peih nduac radaih hu menyum alak mbia dahlau di nan. Nan ye, piah oh njauk phạt, tok hu sa jalan nan lac menyum alak mbia blaoh, oh peih nduac radaih. Di tỉnh Bạc Liêu daok hu bruk pajeng ba menuac menyum alak mbia mebuk mai sang. Amuk Đỗ Ái Lanh – akaok jabat Du lịch ban Bạc Liêu, tỉnh Bạc Liêu brei thau, dom menuac nduac radaih ba tuai mai, meda yaih khan ka Bạc Liêu, dom labik me-in sambai, labik mekre di ban. Tapa nan hu daong yaih khan thaot binguk di ban.

Công an huyện Đức Hòa, tỉnh Long An bahrau padang ngak harak gar cap khik jaik 50 tấn jru ngak gheih oh hu asal di nyu di sa labik caik pandap pak ini. Dahlau di nan, jala pandiak harei 31/1, tuk pasang iek sa labik caik pandap praong 1.000m2 di puk Rừng Sến, xã Mỹ Hạnh Bắc, huyện Đức Hòa, Kapul Cảnh sát kinh tế Công an huyện Đức Hòa hu duah mboh dalam labik hu caik labaih 49 tấn pandap panda janih jru ngak gheih, ngan haong 1.644.000 janih pandap. Dom janih jru ngak gheih ini, rilo janih hu caik dalam kadung carton. Po pandap oh hu ba tabiak harak gar brei thau asal di nyu hu pambuak tal pandap panda ini.

Bak sa bilan kuhria meng hadei di harei megei baoh taneh biak khang di pulao Noto, tỉnh Ishikawa, Nhật Bản, yaom lac jalan điện saong jalan ieu phone taom gaok hu pasiam veik jaik abih, min bruk lahik ia jeng oh ka ngak pasiam hu abih, ngak brei kan kandah tal bruk samar tani tanat raidiuk saong jalan ngak mbang duah jien di menuac sia labik gaok trak damak kayua bala. Urak ini, di tỉnh Ishikawa hu jaik 40.000 sang oh ka hu ia pandar. Langiu di nan, bruk iek glang gah y tế jeng gaok kan kandah kayua lahik ia dui atah.

 Hội đồng Phúc lợi uranaih Philippines bahrau kakei dom amaik ame njauk caik hatai dalam bruk khan brei rilo urang thau dom thaot binguk atau video di anek bik di drei, kayua dom thaot binguk atau dom video nan meda njauk dom kol kanjak jhak pandar kong nghe Trí tuệ nhân tạo (AI) ngak tabiak dom kadha khiêu dâm uranaih. Gah pasang iek Internet hu duah mboh jaik 3.000 thaot binguk khiêu dâm kayua AI ngak tabiak. Tui gah ini brei thau, dom thaot binguk ini di dom urang daok pak langiu hu ba tame  AI, hadei di nan meng ngak tabiak phiên bản bahrau. Urak ini, di rilo taneh ia hu ba tabiak dom adat ka bruk pandar AI biak salamat saong hu kein lagaih.

Gah Y tế dunya WHO kuhria mboh dahlau lac tal thun 2050, dom menuac ruak ung thư di dunya meda tagok rilo jang 75%. Bruk njuk pakao, menyum alak saong lamek labaih kilo lac dom jalan ba tal njauk ruak ung thư dak harei dak rilo, taphia nan daok hu gam bruk lac kayua menuac daok taha nao. Dalam nan dom taneh ia hu jien mek tame glaong meda hu 4 triệu 800 rabau menuac njauk ruak di thun 2050. Dom taneh ia hu jien mek tame takik, meda hu menuac njauk ruak bahrau praong abih. Dom menuac matai kayua ung thư di dom taneh ia hu jien mek tame takik meda tagok rilo jang 2 mbang./.