Tui Mintri Lao động - Thương binh saong Xã hội (LĐ-TB&XH) dalam bilan 2 meng blaoh, hu abih tih 10.553 urang ngak nao ngak bruk di negar langiu. Darak pasa Nhật Bản hu manuac nao ngak bruk rilo abih, lac 8.212 urang ngak; patui di nan lac Đài Loan (Trung Quốc); Hàn Quốc; Thái Lan saong dom darak pasa karei. Thun ini, Mintri LĐ-TB&XH ba tabiak jalan ngak lac ba meng 125.000 urang ngak pak Việt Nam nao ngak bruk pak negar langiu tui harak pambuak gauk ngak bruk. Tui kuhria yaok thun dalam taneh ia hu labaih 120.000 - 143.000 urang nao ngak bruk di negar langiu.

Mintri Pato Megru brei thau, meng thun 2025, dom anek saih oh ka tamat THPT thun 2024 saong dom thun dahlau di nan hu pakacah karei tui njauk danak dak hu bac blaoh. Bruk ini hu makna lac anek saih bac danak dak pato megru halei hu pakacah bac tamat THPT tui njauk danak dak pato megru phổ thông nan, piah khik ginup quyền lợi ka dom adei. Thun 2024 lac thun puac abih anek saih hu pakacah tamat THPT tui danak dak klak. Meng thun 2025, mbang pakacah hu ramik veik tui danak dak pato pakai phổ thông bahrau.

Di tỉnh Trà Vinh urak ini, bruk pato akhar haruh bangsa ka mikva Khmer hu peih ngak rilo. Urak ini gah pato magru hu ba tabiak danak dak pato akhar Khmer ba tame labik pato magru di dalam ban. Tui kuhria yaok thun bac, dalam tinh hu labaih 100 labik pato magru phổ thông peih tal pato akhar haruh Khmer ngan haong labaih 800 tal saong 19.000 anek saih. Taeng thun bac ini, hu 125 sang bac pato sap Khmer ka jaik 36.000 anek saih.

Harei ini, Toà án TP.HCM peih langyah bruk amuk Trương Mỹ Lan haong 85 urang pambuak tal dom bruk ngak suan di Tập đoàn Vạn Thịnh Phát, Gilang pariak TMCP Sài Gòn (SCB) saong dom gah pambuak tal. Tòa án  TP.HCM brei ieu pataom labaih 2.400 menuac pambuak tal. Langiu di nan, daok hu jaik 200 luật sư tame kamlah ka dom bị cáo saong khik caga quyền lợi ka menuac bị hại, haong dom menuac lang sap kayua hu dom bị cáo lac urang negar langiu. 

Công an huyện Bàu Bàng, tỉnh Bình Dương tabiak panuac ieu rahra khan brei thau ka kol blah mek drap ar rahtabiak di tiem ameh dalam ban sit Lai Uyên. Hu thau, kol blah mek drap ar pak tiem ameh B.Q hu 4 urang, lac 3 likei, 1 kumei. Dom urang nan ndik dua sruh radaih mac. Hadei di tuk mek hu biak rilo ameh ye klak nduac tabiak nao dauk tui jalan roya 13. Công an huyện Bàu Bàng ieu rahra mayah mboh dom urang medil hu pambuak tal bruk blah nan, khan brei công an labik jaik abih thau. Dahlau di nan, rayo sap ndem VN hu ba khau tin, di maong 12 jala pandiak harei 3/3, 4 urang ndik radaih mac tame tiem ameh B.Q. hadei di tuk sua pablei ameh, kol nyu ba tabiak sa janih dreih yau mbaik phao kateik greik po tiem ameh saong mek kapăc jan tame tu kreih, mek biak rilo ameh blaoh nduac tabiak nao.

Harei bầu cử “harei ngar praong abih” harei ini lac bruk hu makna praong dalam pilih ruah ứng cử viên Tổng thống Mỹ thun 2024. "Harei ngar praong abih" lac harei dom cử tri di 15 tiểu bang saong 1 bhum taneh di Mỹ peih bruk “bầu cử sơ bộ” 2 đảng dalam sa harei haong gauk. Thun ini, dalam bruk pakacah di Đảng Cộng hòa, bruk buh phiếu hu pilih ruah tabiak 874 dalam 2.429 urang, samu 36%. Tui nan, sa urang hu pilih ruah piah tabiak ngak ứng cử viên Tổng thống Mỹ brei hu takik di abih lac 1.215 dalam abih tih 2.429 đại cử tri meyah khin mek hu bruk pok angan di Đảng Cộng hòa piah jeng menuac lambaok pakacah tame ngak Tong thong.

Rahra Cuba daok taha nao saong mboh trun dalam thun 2023. Kaoh pulao Caribe ini tok mboh labaih 90.300 uranaih manek dalam thun tapa, lac bier abih dalam 6 piluh thun. Tui Thủ tướng Cuba, dom bruk patakik ka jien padai saong pandap panda ngak brei oh siam bruk peih ngak sarak jhul patagok urang manek dalam sang pak negar Cuba, saong jabat chức năng njauk langyah biak tantu cambaih laih makna, jang yau dom paka oh siam pambak khang tal rahra.

Takik di abih lac 36 urang matai saong 41 urang karei njauk rambus dalam dom mbang hajan ia sua praong rah tabiak dalam luac adit blaoh di Pakistan. Hajan praong jeng ngak khut atau tayah 500 baoh sang, khut yaok pluh hécta njam patam di rahra. Ini lac mbang hajan ia sua khang ka 2 di Pakistan dalam 2 thun tapa. Thun 2022, dom mbang hajan ia sua jeng ngak ka labaih 1 rabau menuac di taneh ia ini matai./.