Tukvak ini, di TP.HCM, darak pasa bingu, pandap alin ka Harei gru pato Việt Nam 20/11 hu chreih chrai jang saong rilo janih. Bingu that jeng lac pandap hu rilo urang takre piah alin ka gru pato. Di darak bingu Hồ Thị Kỷ, Quận 10 dom bingu blei tame tagok 30%. Yaom bingu jeng tok tagok labaih 20% dut saong yaok harei. Thun ini, bingu hồng, bingu hướng dương hu urang blei pilih ruah rillo abih, yaom kaom jeng tagok hasit. Di dom siêu thị, cửa hàng, rilo pandap panda alin karei, yau ye pandap khik piah, khan aw ngui cuk, pandap ngak gheih, jru tavao jeng hu ngak karei ka harei 20/11 ngan haong rilo danak dak khuyến mãi.

Dalam dom harei ini, di grauk dom puk palei, labik daok di bhap bini tỉnh Vĩnh Long daok peih ngak Harei roya jum pataom bangsa. Ini lac tuk piah ka dom agama, dom bangsa dalam tỉnh hadar veik bruk jum pataom di bangsa Việt Nam, gam haong nan, klah rabha ilamu ngak mbang, daong gauk cakrok. Vĩnh Long hu 752 labik dân cư, puk palei jeng hu peih harei jum pataom bangsa. Tapa nan, Vĩnh Long daok brei patagok bruk jum pataom bangsa dalam rahra saong brei mboh labik dang di rahra dalam bruk peih ngak sarak di Đảng, hukum di Karja.

Dah page ini (17/11), di tuk peih bruk pahadar 41 thun Harei gru pato Việt Nam, Sở pato magru TP.HCM saong Mbao Sài gòn giải phóng hu jao jai thuong Võ Trường Toản ka 50 gru pato, urang jakar hu angan je dalam gah pato magru pak TP.HCM. Bruk bahrau di Jai thuong thun ini lac bruk jao jai. Yaok tal bac meng pakat mầm non, tiểu học, THCS, THPT hu pilih ruah tabiak 10 gru pato angan je hu urang jakar ngak gah khik ramik, gru pato piah pilih ruah, pasang iek alin jai thuong.

Tapa bilan 10 saka ia bulan ini, lac tame bilan ikan di urang taong ikan tỉnh Bình Thuận. Ini jeng lac bilan taong ikan praong dalam thun, yaom lac kaya ikan oh rilo yau bilan ikan dahlau, min cap mek hu rilo janih ikan hu yaom glaong nan ye jien mek tame di urang ngak ikan jeng hu glaong jang. Kuhria rah tapa yaok mbang nao tasik meng 10 - 15 harei njauk ilan, mek hu 3 - 4 tấn, urang taong ikan duah hu meng 300 - 400 triệu đồng. Min dom thun jaik ini, kaya ikan daok takik nao, yaom xang menyek tagaok, nan ye urang taong ikan njauk kuhri kuhria biak tani tanat saong nao tui kapul jum pataom. Urak ini, abih tih dom kapal gilai ikan di Bình Thuận lac 5.940 sruh. Thun ini, taong cap mbuan lagaih nan ye abih tih kaya ikan cap mek hu dalam thun di Bình Thuận kuhria mboh hu 233.000 tấn.

Urak ini, danak dak Ngak pasiam kraong Chợ Gạo tukvak ka 2 takai kraong gah maraong jalan ia tỉnh Tiền Giang daok hu ngak pasiam samar drah. Danak dak Pasiam veik Kraong Chợ Gạo tukvak ka 2 bahrau hu Mintri Jalan mbak pajeng ba pabak tame bruk ngak ar atah labaih 316 mét piah khik caga takai kraong pambuak haong gang patok gilai dalam tuk samar drah di ar gah barak di gah binek ini di dalam ban sit Chợ Gạo. Phun jien buh tame pabak brei jaik 35 tỷ đồng saong danak dak ini daok hu peih ngak samar drah. Danak dak ini daok dalam tukvak ngak salah saong tui kuhria ngak salah di puac thun ini. Kraong Chợ Gạo lac jalan ia praong di bhum ĐBSCL pambuak haong Ban raya Hồ Chí Minh.

Tui kuhria mboh dahlau ka kinh tế mùa thu di UB châu Âu, bruk kinh tế di Liên minh châu Âu (EU) lahik prein tagok dalam thun 2023. Min bruk tagok veik hasit jeng daok hu caong lac di thun 2024 tal. UB châu Âu bahrau trun kuhria dahlau bruk patagok kinh tế di abih khối EU saong bhum pandar jien euro dalam thun ini meng 0,8% trun 0,6%. Tui UB ini, abih tih kaya pandap dalam taneh ia (GDP) di EU meda lac oh tagok dalam 3 quý di thun 2023. Yaom lac lạm phát nyu trun duk haong tanut glaong di abih, min jeng daok di tanut glaong. Sarak jien padai kak catang daok ngak khat lahik trak damak jang. Tui kuhria, kinh tế mùa thu di UB châu Âu, GDP di EU meda tagok 1,3% di thun 2024.

Thaong gop kayau geta lac sa dalam dom pandap cuk meng kan di urang Japon. Di sa quan sit di gah pai negar ini, hu sa quan hu dom thaong gop kayau geta hu umo thun tagok tal 100 thun. Urang Japon biak iek praong ilamo meng kan nan ye jeng daok juak dom janih gop takhaok yaom lac nyu hu meng yaok ribau thun. Dom urang japon jeng daok pilih ruah dom khan aw ngui cuk meng kan, meng Yukata tal dom blah Kimono biak hu yaom glaong, iek praong. Dom quan dep takhaok Hagioka Shoten, hu ngak bruk 120 thun, di Nabari, tỉnh Mie. Di pak ini hu parang tabiak 500 thaong geta saong dom pandap panda karei, meda lac hu ngak meng thun 1868 tal thun 1989 saong dui pachreih hu rilo urang Japon mai maong iek.

Vẹm hijao, lac janih mbuan duah mboh di dom bhum tasik angaok dunya. Dalam rup nyu hu biak rilo vitamin B12 saong axit béo omega-3. Tui sa roh duah bahrau ka dom kaya tasik di Hong Kong (Trung Quốc), dom urang ilamu mboh lac vẹm meda eng drei siam veik hu hadei di yaok mbang pandiak meng bruk ramik veik nhịp tim saong dom chức năng dalam rup, meda diuk veik hu siam dalam tuk baoh taneh pandiak tagok. Tui dom urang roh duah kaya tasik, Vẹm lac sa “anh hùng” joa kandang. Langiu di bruk pabak labik daok ndam angaok nyu, vẹm daok ngak brei hacih ia dalam tuk duah mbang, daong halang klaak janih nerak tachauk tabiak truh bhum ia nyu daok./.