UBND tỉnh Đắk Lắk bahrau ginum biai peih ngak dom bruk pamaong tal pahadar 120 thun harei padang tỉnh (22/11/1904 - 22/11/2024). Tui jalan ngak, dom bruk praong, dom harei pahadar hu danak dak ilamo uan salam saong cuh iek phao bingu cuh bier; gam haong nan lac mbang nyaom biai ilamo “Đắk Lắk - 120 thun padang tabiak saong cak rok patagok”; Parang iek dom jak jeng di gah kinh tế - xã hội; mbang darak parang tabiak pablei pandar hu chat luong glaong saong mayaih khan pandap panda OCOP; danak dak Lễ hội hóa trang, dom mbang pakacah thaot binguk saong pakacah duah thau sajarah 120 thun dak padang, cak rok patagok tỉnh Đắk Lắk. Dom bruk ngak hu peih tabiak meng bilan 3 anak tal saong pataom tame tabung glaong dalam 3 bilan puac thun ini.

HĐ bhap bini tỉnh Đắk Nông bahrau tabiak Sarak pandar kadung jien karja palei piah daong padang ngak sang daok tui danak dak bruk ngak negar ka patagok KTXH bhum urang bangsa takik saong bhum ceik vaktu 2021-2025 di dalam tỉnh. Tui nan, tỉnh Đắk Nông pandar kadung jien karja tỉnh saong dom pok jien karei, daong pabak tame 30 triệu đồng ka yaok baoh sang hu padang ngak tui danak bruk ngak negar piah khik ka baoh sang hu padang ngak njauk tui adat cambat di palei, saong khik kajap bruk "3 khang" lac takai  khang, daning khang saong tabung khang.

Thun ini, tỉnh Hậu Giang kuhria ba 749 urang nao ngak bruk hu tuvak pak negar langiu. Peih ngak hu bruk ini, Pasak Jit vu bruk ngak daok jhul khang bruk pathau khan di mangaok dom  jalan khau tin, facebook, zalo ka bruk ngak daok pilih ruah, yaom jien bilan tuk nao ngak bruk hu tukvak pak di negar langiu; Pambuak haong dom bhum palei peih rilo mbang jao jit bruk ngak; Pambuak haong Gilang paraik kanja dhar Hậu Giang saong dom kapul hu pambuak tal pathau khan ka Sarak 23 di HĐND tỉnh brei bruk daong urang ngak di dalam tinh nao ngak bruk di negar langiu.

Mintri Ilamu, Thể thao saong Du lịch brei ba bruk ngak “tapung brah Sa Đéc” di xã Tân Phú Đông saong Phường 2, ban Sa Đéc, tỉnh Đồng Tháp tame Harak angan inem krung ilamu phi vật thể pakat negar. Bruk ngak tapung brah Sa Đéc hu meng labaih 100 thun ini mai saong daok cakrok. Ban Sa Đéc urak ini hu 350 sang haong 2.000 urang ngak tapung saong dom pandap hadei tapung yau ye hủ tiếu, bánh canh, nui, phở, pacuk, bánh tằm, nding njuk ngak meng tapung brah… Darak pasar piah pablei rilo meng lac dalam taneh ia saong pablei tabiak negar langiu. Palei khik bruk ngak hu siam lagaih 1 labik du lịch bhap bini di palei ngak saong parang iek, yaih khan pandap hadei tapung saong dom pandap ngak meng tapung brah.

Harei rija paha Ong, di puk Nhị Hòa, xã Hiệp Hòa, ban Biên Hòa, tỉnh Đồng Nai bahrau hu peih tabiak. Thun ini, Harei rija hu raok rilo kapul tuai  dunya mai meng dom taneh ia, yau ye Trung Quốc, Malaysia, Singapore, Thái Lan, Đài Loan (Trung Quốc), Indonesia saong dom kapul dalam taneh ia mai hu mbaok tame. Paha Ông hu padang ngak di thun 1684, jaik taphia kraong Đồng Nai. Ini lac sa baoh Paha hu umo thun aval abih pak Nam Bộ, brei mboh yaom sajarah jalan diukrai di urang Việt saong urang Low dalam bruk peih taneh bahrau, padang mbang ngui, khik caga bhum taneh Biên Hòa - Đồng Nai.

Mintri ngak nong Nga bahrau ini brei thau, taneh ia ini hu ngak salah bruk pajeng ba 200.000 tấn ngũ cốc oh mek jien tal 6 taneh ia châu Âu yau panuac sanya di Tổng thống Vladimia Putin ba tabiak di bilan 7 thun dahlau. Tui nan, Nga hu pajeng ba tal Somalia saong Cộng hòa Trung Phi yaok taneh ia 50.000 tấn; saong 25.000 tấn tal yaok taneh ia Mali, Burkina Faso, Zimbabwe saong Eritrea. Nga jeng kuhria pablei tabiak negar langiu 70 triệu tấn ngũ công dalam thun ngak nong 2023-2024, tagok rilo jang thun blaoh jaik 4 triệu tấn.

Jabat Yaok pataom negar Tây Ban Nha bahrau brei thau, tok hu labaih 322.000 anek kamar hu pabak tame rahra 48,6 triệu urang di negar ini dalam thun 2023. Urak ini Tây Ban Nha lac taneh ia hu bruk manek bier ka dua dalam Liên minh châu Âu, dang hadei Malta. Rilo urang roh duah ilamo brei thau lac, bruk sarau kadau di kinh tế, oh hu bruk ngak, bruk ngak oh siam saong yaom sang danaok, taneh riya tagok glaong lac makna ngak ka urang Tây Ban Nha matain suai jang, atau menek takik anek jang tui kuhria tuk camriep. Yaom lac Tây Ban Nha hu caik hatai sangka tal bruk manek, min dom jalan ngak ini jeng ka oh ginup prein pachreih patagok bruk manek.

Meng tuk jit Covid-19 patuh tabiak, ngak bruk di sang daok jeng jalan ngak di rilo taneh ia angaok dunya, dalam nan hu Australia. Ngak bruk di sang hu rilo kein lagaih min jeng hu dom kandah kandaiy caik tabiak ka dom Cty. Tui Jabat yaok pataom di Australia, 37% menuac ngak di taneh ia ini, samu 2,2 triệu menuac bhian ngak bruk di sang , tagok jang 5% duk haong tuk dahlau jit praong. Ngak bruk di sang jeng bhian randap min bruk khik jalan ngak ini, daok kayua rilo gah, dalam nan hu urang ngak saong menuac pandar urang ngak./.