Ngak bruk haong Mban thuong vu Tinh uy Tay Ninh page ini 3/1, akok Quoc hoi Vương Đình Huệ ndom lac, Tây Ninh njauk brei patui ngak siam bruk dak dang đảng, padang he thong chinh tri khang kajap, ini lac bruk praong ngak jeng bruk jak jeng di Tây Ninh; brei caik hatai saong ngak siam bruk an ninh quoc phong; pambuak bruk đối ngoại, đối nội haong bhum palei tui rilo gah Đảng, karja, Hoi dong bhap bini saong taom gaok ndem bai haong bhap bini; dak padang jalan taphia negar tani tanat, pambuak gauk saong cak rok patagok; pacang cakak kol tội phạm tapa negar.

UBND TPHCM payua tagok Thủ tướng Rajaei pathau khan ka bruk pasang iek, taong yaom tanut kan kathaot rilo gah di TPHCM tukvak 2021-2025. Tui UBND TPHCM, tanut kan kathaot rilo gah di TPHCM tukvak 2021-2025 karei di tanut chuan kan kathaot rilo gah di negar tukvak 2021-2025 ka asal kadha dut iek kan kathaot rilo gah saong jalan brei thau lac sang kan kathaot, sang jaik kathaot. Mayah salih tanut chuan kan kathaot rilo gah, TPHCM meda hu labaih 10.000 sang kan kathaot salih tapa sang jaik kathaot, labaih 600 sang kurang rilo gah oh hu dalam danak dak patrun kan kathaot khang kajap TPHCM. Kayua yau nan ye, UBND TPHCM likau Thủ tướng brei patui veik peih ngak danak dak bruk ngak negar patrun kan kathaot khang kajap tui tanut chuan rilo gah di TPHCM tukvak 2021-2025 tal abih thun 2025.

Tỉnh Ninh Thuận daok peih ngak jalan tacei ba brei parilo bruk ngak, bruk pato pakai pambuak haong duah bruk ngak; kham merat pambuak bruk, pambuak haong dom labik pato pakai hu angan je, yam tagok paglong bruk pato pakai. Gah pato bruk ngak peih praong tui jalan XHH; pandap panda saong mac moc piah pato bruk ngak hu pabak veik. Dalam 3 thun tapa, tỉnh pato bruk ngak ka labaih 27.100 urang ngak; yaok thun hu labaih 60-70% urang ngak duah hu bruk ngak hadei di tuk bac bruk ngak blaoh.

Tukvak padeih Tết Dương lịch thun 2024, dom labik du lịch di dalam ban Cần Thơ ngak bruk jaik abih prein piah duh ka tuai mai rivang iek, padeih padei. Abih tih jien mek tame meng bruk du lich tui kuhria hu 133 tỷ đồng. Hu thau, langiu di bruk salih bahrau jalan ngak gah du lich, piah jien mek tame glaong, Ban Cần Thơ hu ieu kakei dom labik du lich ramik ngak pasiam veik mbaok mata, ngak gheih phun kayau, haci hacih alam moi truong, salamat pandap mbang, khik siam makre bhum palei, pacang caga khuah patuh, iek glaong hatai pabak; gam tui di nan, dom pabah lamnge du lịch jeng rami ramik, pasiam veik mbaok mata pabak ka tuai damuai, ngak catang tui dom adat hukum dalam bruk pablei salih, pablei tui njauk yaom hu tauk tagok.

Daok di tỉnh Cà Mau dalam 3 harei padeih Tet Duong lich thun 2024, tỉnh taduan raok labaih 21.300 tuai mai rivang ma-in. Yau nan tuai mai Cà Mau rivang ma-in di dom labik tagok 42% dut saong tukvak ini thun 2023. Tuai mai rivang ma-in ralo abih di Labik yulit Mũi Cà Mau, labik yulit sinh thái Thư Duy; Labik yulit sinh thái ECO Cà Mau saong Labik yulit Hòn Đá Bạc. Thun ini, tuai damuai mai Cà Mau ralo kayua tỉnh peih ngak hu rilo bruk ilamu, nyaom darak pasar dui atah meng dahlau tuk padeih Tet Duong lich.

Kuhria tal maong 9 dah page harei 3/1 (tui maong Việt Nam), dom urang metai dalam bala magei baoh taneh di tỉnh Ishikawa, Nhật Bản lac 62 urang. Tui kuhria, dom urang metai daok tagok kayua hu rilo urang daok gar dalam yaok rabau baoh sang jaleih. Tui pathau khan di Kapul dom urang roh duah ilamo di Rajaei Nhật Bản, labik mbaih mbaoh taneh kayua magei baoh taneh ini atah labaih 150 km mala kaoh pulao Noto saong dom bruk pambuak tal magei baoh taneh meda patui veik rahtabiak dalam tukvak ini. Kayua yau nan ye rahra njauk caik hatai anak bruk mbuan rahtabiak dom mbang magei baoh taneh patui veik.

Cục khi tuong Hàn Quốc brei thau, thun 2023 lac thun ấm abih dalam sajarah Hàn Quốc, pandiak kuhria rah tapa 13,7 độ C. Yau nan min, bruk langik pandiak oh lac di ta-eng Hàn Quốc bo daok lac di dunya. Dahlau di nan, Jabat Pasang iek bruk BĐKH Copernicus di Liên minh châu Âu hu kakei thun 2023 meda lac thun pandiak abih dalam sajarah hadei bilan 11 hu bilan ka 6 patui gam dalm thun pandiak glong catang.

Urang jakar Mexico daok duah 31 urang di cư njauk cap mek tuk daok di jalan nao tal abik tapen negar di negar ini saong Mỹ meng radaih buýt. Urang peih radaih buýt brei thau lac, sruh radaih njauk 5 sruh radaih karei pacang gilac saong 31 urang di cư negar langiu njauk cap mek, tok hu 5 urang negar Mexico hu daok veik di radaih. Tổng thống Mexico brei thau lac gah chức năng hu peih bruk pasang iek saong duah dom urang di cu meng di tuk dom urang nan njauk cap mek. Cảnh sát Mỹ brei thau lac, dalam dom adit jaik di ini, hu labaih 10.000 urang di cu meng Mexico tapa negar ini yaok harei./.