Patui veik danak dak di mbang nyaom 27, dah page ini, Ủy ban Thường vụ Quốc hội (TVQH) brei panuac ka Harak pathau khan di Rajaei ka dom bruk ngak hu, dom kan kandah tavak tavaiy dalam bruk peih ngak 3 danak dak bruk ngak negar tukvak 2021-2023 saong ba tabiak jalan langyah piah taoh talaih dom kan kandah, tavak tavaiy, jhul khang bruk peih ngak danak dak dalam tukvak anak tal. Tui pathau khan di Mintri jien padai, tal puac bilan 8 thun ini, dom bruk brei masaiy phun jien buh tame piah cak rok patagok bruk dui atah di 3 Danak dak mek hu labaih 58% tui jalan ba tabiak. Yaom lac yau nan, rilo danak dak, danak dak sit ka oh hu peih ngak atau ka oh patagok dom yaom glaong hu siam lagaih; cơ sở hạ tầng kinh tế - xã hội, tanut raidiuk di rahra ka oh ngak hu yau hatai caong. Bruk trun kan kathaot ka oh ngak hu di jalan ba tabiak parilo gah, khang kajap, ka patakik hu bruk kan kathaot gilac veik, tamuh tabiak kan kathaot di abih lac bhum mikva bangsa takik saong bhum ceik.

Di tuk pahadar Harei Doanh nhân Việt Nam (13/10), Hiệp hội Doanh nghiệp TP.HCM bahrau pok meyaom 100 pandap, bruk ngak gheih di Ban raya thun 2023. Ini lac dom pandap, bruk ngak di dom doanh nghiệp hu rilo sahneng duah bahrau, pandar ilamu công nghệ dalam khik iek bruk ngak, khik hu siam mekre ka urang ngak, labik ngak saong bruk ngak ka bol bhap rahra. Ong Võ Văn Hoan, Phaok akaok UB bhap bini TPHCM ndom lac, piah daong prein ka doanh nghiệp, Ban raya daok brei peih tabiak dom pok jien daong di rajaei. Gam haong nan, patagok dom jalan ngak pasiam bruk suai damuai, jhul bruk nao mai di dom jabat karja saong yam takai nao gam, daong ka doanh nghiệp.  

Urang pan akaok tỉnh Hậu Giang bahrau hu mbang taom gaok, ndem mayai nao mai haong mikva bangsa Khmer, Lo, daok di xã Xà Phiên saong ban sit Vĩnh Viễn, huyện Long Mỹ. Di mbang ndem mayai, rahra hu panuac khan likau ka bruk padang ngak, ngak pasiam veik dom gah jalan puk palei; daong ka dom urang gaok kan kandah padang ngak sang danaok, daong phun jien piah padang ngak ghe gilai saong phlieng ngũ âm ka dom labik pataom mbaok di rahra Khmer; daong pajaih, pasram ilamo piah salih janih phun pala, athur raong hu siam lagaih. Bí thư Tỉnh ủy Hậu Giang ieu kakei dom bhum palei samar drah langyah dom panuac likau di rahra, njauk ba brei bruk ngak, paglaong jien mek tame ka rahra.

Dom thun jaik di ini, bruk urang nong pala drak, ngak mbang naih joi di tỉnh Bến Tre oh padeih patagok, hu ba mai kein laba kinh tế glaong, daong ka urang ngak nong yam tagok ngak kaya mada. Tapa pilih ruah meng puk palei, dalam tỉnh hu labaih 79.400 urang nong pala drak naih joi dom pakat. Min kaya pandap di urang nong oh ka biak hu yaom glaong, chất lượng oh ka tani tanat, bruk pambuak gauk oh ka khang kajap. Kayua yau nan ye, bruk “pambuak 5 gah” lac: "urang nong, karja, urang ilamu, doanh nghiệp haong urang vak” hu tỉnh padang tagok meda ngak pasiam bruk pambuak gauk piah daong gauk, ngak jeng chuỗi giá trị gah gah pandap panda kaya nong. 

Lambaok dom pakat urang pan akaok tỉnh Trà Vinh hu padang rilo kapul nao rivang, alin pandap di tuk uan Sen Đôn ta di mikva bangsa Khmer thun ini. Di dom labik nao rivang, dom kapul hu sua tangi prein yava saong tadhau ayuh ka dom ong mbik, ong car, mikva phật tử bangsa Khmer uan raok harei Sen Đôn ta meng kan biak bui sambai, salamat, jumpataom saong patak pataom. Gam tui di nan jeng hu alin pandap ka 203 sang sarak kanja, urang jakar padeih huu hu angan je saong alin ka 26 paha Phật giáo Nam tông Khmer angan je. Tukvak ini, hu 404urang hu angan je lac urang bangsa Khmer jang yau taduan hu dom paok pandap lac 500 ribau đồng jien mbaok saong pandap panda. 

Labik bhum kraong Chao Phraya, kraong Noi saong dom ribaong nduac tapa ban klak Ayuthaya, ndaoh di ban ine Bangkok, Thái Lan 80 km nao gah barak jeng hu ia tagok glaong, ngak ka yaok rabau sang daok jaik ar pacang ia sua jeng dauk ia abih. Rilo taneh ngak nong jeng dauk dalam. Jaik abih dom baoh sang di labik tapen kraong tỉnh Ayuthaya jeng lac sang tual meng kan, min ia tagok glaong lo ngak ka bruk ngak mbang ngak huak nao mai yaok harei di bhap bini gaok kan kandah trak. Rilo bhap bini nao bac ta-a, nao ngak bruk meng ghe. 

Mintri Pato magru Hàn Quốc (MOE) brei thau lac, dom Mbang pakacah Prein ndem sap Hàn (TOPIK) di negar langiu meda tagok jang dua mbang di thun 2024. Urak ini, dom mbang pakacah TOPIK hu peih tabiak 4 mbang sa thun, min dalam thun 2024 meda tagok jang 8 mbang. Ini lac sa dalam dom jalan ngak di “Danak dak 300K Urang negar langiu mai bac pak Hàn Quốc” di MOE, dalam nan, negar ini ba tabiak jalan lac dui pachreih 300.000 sinh viên negar langiu tui bac di dom sang bac pak Hàn Quốc di thun 2027. Tui MOE piah dui pachreih urang ngak negar langiu hu ilamo di dom gah kong nghe glaong saong paglaong prein maraik gauk di dunya pak Hàn Quốc.

Quốc hội Israel hu brei tapa rajaei jum pataom samar drah di Thủ tướng Benjamin Netanyahu, dalam nan hu dom urang lập pháp đối lập ôn hòa, piah brei mboh hatai khang dalam bruk mesruh haong Hamas di dải Gaza. Rajaei brei tapa hadei di mbang taong tame di Hamas harei 7-10 hu adat brei padeih ngak dom bruk chính trị thông thường di tukvak srau kadau trak dalam sajarah Israel. Labaih 1.200 urang Israel matai dalam mbang taong. Urang jakar ngak praong di Israel ndom lac lah gah tình báo saong quân sự ba tal bruk yaok ratuh menuac pan phao di Hamas yam tapa paga an ninh biak khang kajap vil val Gaza./.