Dom Phó Thủ tướng rajaei, urang pan akaok dom gah hu pambuak tal jeng hu mbaok tame javap jaloi, langyah dom bruk hu pambuak tal. 2 nyaom kadha hu pilih ruah piah ndem biai nao mai lac asal hu makna saong lagaih haong panuac ieu kakei di anak mata ba tabiak, hu cử tri saong rahra biak caik hatai sangka, abih di nyu nan lac nyaom kadha di gah jien padai.

Brei panuac pataom iek veik Harei pataom báo pakat negar harei kabroi, ong Nguyễn Đức Lợi, Phaok akaok Thường trực Hội Nhà báo Việt Nam, akaok mban Tổ chức brei thau lac harei pataom pakat negar thun 2024 mbang camereip abih hu peih tabiak di gah meraong saong hu ngak praong abih kuhria meng dahlau mai, hu 120 labik parang dom ấn phẩm báo chí praong di 63 Hội Nhà báo tỉnh, ban, labaih 300 jabat báo chí Trung ương saong tinh ban, dom labik pato pakai báo chí praong dalam taneh ia. Dom jabat hu parang tabiak, yaih khan thaot binguk saong dom janih, dom kadha báo chí hadah krah, pandap kong nghệ bahrau, ilamu ngak báo bahrau, dom asal kadha pato pakai, pasram megru, paglaong ilamu ngak báo. Ini biak lac bruk pataom ilamu, hatai sahneng hadah krah di urang ngak báo dalam taneh ia.

Công ty cổ phần pabak ia Bến Tre daok kham marat luac harei melam peih ngak dom jalan langyah piah ba ia taba mai pabak ka urang pandar. Dalam tuk ia pak ini daok njom mbak glaong, Công ty njauk pah sà lan pajeng 7 mbang ba ia taba mai sang mac pak huyện Chợ Lách ngan haong yaok mbang lac 700 mét khối ia. Taphia di nan, công ty khik dom gilai njuk ia piah tuk ia dalam kraong Ba Lai hu do mbak brei adat njuk tame khik piah dalam ribaong mblang hamu pabak ka 2 sang mac praong lac Xuân Đông saong Hữu Định. 

Caga pacang ia mbak njaom tame, taong abih dom cống tapen kraong Chợ Gạo, tỉnh Tiền Giang jeng hu gum sre. Karja dom puk palei brei sraong mek njam baok, ngak brei ia nduac samar, ba ia meng ban Mỹ Tho mai. Nan ye ia taba angaok dom ribaong thủy lợi jeng daok hu rilo piah pruh ka phun pala. Ong Lưu Văn Thảo, akaok UBND xã Tân Thuận Bình, huyện Chợ Gạo, brei thau, dalam xã hu 700ha pala phun thanh long chuyên canh. Tukvak ini, yaom lac ia di ribaong dalam mblang hamu trun meneing min jeng ginup pruh ka phun pala.

Urang pan akaok UBND haong dom urang lambaok dom gah chức năng di ban Vũng Tàu, tỉnh Bà Rịa - Vũng Tàu harei kabroi hu nao pasang iek bruk tachrauk nerak alam di binek Bàu Sen. Binek Bàu Sen lac binek hu yaom glaong di ban Vũng Tàu, praong labaih 19 ha. Ong Hoàng Vũ Thảnh, Akaok UBND ban Vũng Tàu brei thau, yaom lac dom bhum labik dalam binek daok kadaong gluh baok tapan saong tanut ia trun bier, min ia mala binek oh daok sambo hijao saong oh daok mbau bruk yau dahlau deih.

Harei kabroi lac harei ka 3 di bruk pilih ruah pok ngak Tổng thống Nga, jaik abih dom labik buh phiếu kreik pabah mbang tuk mon 8 melam, tui mon Moscow. Bhum Kaliningrad kreik pabah mbang suai jang abih, di mon 9 melam. Dom labik buh phiếu di dom taneh ia jeng daok peih tabiak. Tapa yaok pataom oh ka ginup abih di UB bầu cử Trung ương Nga: hadei di tuk langyah labaih 30%, mboh lac Tổng thống urak ini lac ong  Putin dang akaok haong labaih 87% phiếu bầu. Ini lac bruk buh phiếu brei glaong abih oh ka bhian mboh dalam sajarah taneh ia Nga. 

Mintri Dầu mỏ Iran saong dom Kong ty dalam taneh ia hu tut mbaoh tangin  tame dom harak pambuak bruk yaom tagok tal labaih 13 tỷ USD. Dom harak pambuak bruk ini hu taong yaom lac praong abih di Iran dalam sa piluh thun tapa dalam gah menyek saong hu caong lac meda pabak 350.000 kadung yaok harei tame dom najek yaok harei di negar ini. Iran caik tabiak jalan patagok dom najek tagok 4 triệu kadung yaok harei dalam thun ini. Tui Mintri Dầu mỏ Iran, negar ini meda pamaong tame ilamo di dalam taneh ia piah jhul khang bruk ngak manjek di dom mỏ gah pai saong gah Tây Nam, bhum labik pataom rilo mỏ manjek praong.

Yaom ca cao tagok glaong di dunya daok ngak kan tal dom labik pablei sô cô la, abih di nyu lac dom labik pablei di negar Prang, ngak brei dom labik ngak sôcôla daok dak harei dak ba dom sahui nan tapa urang blei mbang. Yaom ca cao tagok glaong lac kayua pandiak bhang di Tây Phi, labik pala ngak labaih 70% ca cao di dunya. Piah patak pataom sahui, dom Kong ty brei ngak sit veik min jeng daok khik tamo yaom./.