Urak ini bruk peih ngak danak dak thành phần di jalan Vành đai 3 TP.HCM jeng daok khik tani tanat. Dom labik di TP.HCM biyar hu jaik 2.600 tỷ đồng ka 612 urang, mek hu labaih 63% mbaok taneh. Di tỉnh Bình Dương, yaom jien biyar ka danak dak thành phần 6 jeng hu brei tapa saong di dom labik di dalam tỉnh daok ngak dom harak adat piah biyar jien. Tỉnh Bình Dương kuhria lac meda peih ngak danak dak dahlau di harei 30/6 anak tal. Langiu di nan, po buh jien tame danak dak thành phần di tỉnh Long An pathau khan lac tui kuhria hu peih ngak dahlau di harei 30/6. Yau nan, tukvak peih ngak di dom danak dak jeng daok pabak hu tui dom jalan ba tabiak.

UBND tỉnh Đồng Nai bahrau pasang iek, mbaoh tangin brei ngak bruk patagok sang daok ka urang ngak, sang daok xã hội tukvak meng ini tal thun 2025. Dalam nan, tỉnh Đồng Nai kuhria caik tabiak 10.155 tỷ đồng piah padang ngak 66 danak dak sang daok ka urang ngak, sang daok xã hội di mangaok taneh praong labaih 700ha . Ini lac dom danak dak oh kuhria gam taneh caik ka sang daok xã hội dalam dom danak dak pablei salih. Dom puk palei oh ka hu danak dak sang daok xã hội hu caik brei rilo taneh jang piah patagok janih sang daok yau ini. Jalan ngak tal thun 2030, Đồng Nai padang 37 danak dak haong labaih 40.000 sang.

Thun ini, tui kuhria dom anek saih tut angan tame pakacah tamat trung học phổ thông (THPT) di Đồng Tháp lac labaih 15.600.  Piah ka mbang pakacah hu peih tabiak dalam salamat, biak cati catang saong hu siam jang, UBND tỉnh Đồng Tháp  pato tacei ka So pato magru pambuak haong dom kapul hu pambuak tal pato taceu saong rami ramik dom labik pakacah hu tani tanat dom bruk hu siam lagaih ka jalan mbak, labik mbang huak, padeih padei ka anek saih; tani tanat sacih saat pandap mbang… gam tui di nan jeng daong  ka dom anek saih lac anek mbik di sang sarak kanja, sang kan kathaot, sang gaok kan kandah hu mbaok tame pakacah; oh caik ka anek saih klaak pakacah kayua oh hu jien padai atau kayua nao mai kan kandah, abih di nyu nan lac anek saih daok di dom xã pulao.

Urak ini 6 klaok jru Botulinum giải độc kayua Gah Y tế dunya daong hu mai tal TPHCM bloh, Sở y tế TP hu ngak salah dom harak gar taduan mek chip. Min biak damen lac hu sa urang ruak umo 45 thun kayua njauk jru mek trak saong tapa tukvak pandar jru giải độc nan ye oh tapa truh hu. Tui panuac khan meng Sang iek ruak Chợ Rẫy, 2 adei sa-ai pajeng (umo 18 saong umo 26 thun) daok taong ruak pak ini jeng tapa tukvak ameh pandar jru giải độc. Dom chuyên gia pacang jru mek brei thau, “tukvak ameh” pandar jru ka urang njauk jru mek Botulinum, daong ka urang tabiak truh bruk mbuan metai rup pabhap atau suak yava meng mac jamriak lac meng 48-72 mon

Meng harei 21 - 24/5, di dalam tỉnh An Giang hu rahtabiak rilo bruk glut jaleih taneh tapen kraong, ribaong, danao ngak khat lahik biak rilo ka rahra. Makna tuk camereip hu brei thau lac kayua ia tagok glaong saong hu dom mbang hajan akao bilan ngak tayah tayaic mbaok taneh, gam haong bruk ia nduac khang, dom sruh gilai nao mai di mangaok ia ngak glut jaleih. Anak bruk nan, jabat chuc nang hu nao pasang iek labik glut jaleih, daong taoh talaih sang danaok, panduan ba drap ar saong dom baoh sang nao tal labik salamat. Gam tui di nan, peih bruk pacang talei, klauk tapal kakei di labik glut jaleih, patakik dom sruh radaih nao mai di mangaok jalan mbak saong rahra nao mai labik nan.

Ukraine oh meda tame hu Kapul Hiệp ước Bắc Đại Tây Dương (NATO) tuk halei bruk mesruh gauk di taneh ia ini jeng daok rah tabiak. Ini lac panuac di Tổng Thư ký NATO Jens Stoltenberg ba tabiak di harei 24/5. Langiu kan kandah ka tukvak, bruk Ukraine tame NATO jeng lac kadha daok ngak brei kamlah gauk di dom taneh ia châu Âu. Tổng thống Zelensky brei thau, Ukraine thau lac drei oh tame hu NATO tuk oh ka abih bruk mesruh gauk haong Nga.

Tổng thống Mỹ hu pan akaok bruk pahadar di Nhà Trắng pahadar sa thun rahtabiak bruk cuh phao di sang bac di ban sit Uvalde, bang Texas. Dalam harei pahadar ini, Tổng thống Mỹ hu ndom veik lac daok tui bruk ieu quốc hội negar ini saong kanja dom bang brei tapa hukum pakauk pandar janih phao AR-15 saong dom janaih phao, siu praong. Ong Biden brei thau lac, phao siu lac makna ba tal metai glaong abih ngan haong uranaih, gam tui di nan jeng hu brei thau lac dom bala biak trak damak meda daok rahtabiak tal tuk halei bo Quốc hội Mỹ ka oh brei tapa sa paok hukum salamat phao siu, daong khik kajap bruk lac phao ndao oh daok mbuan hu mboh di mangaok jalan mbak.

Gah Y tế Dunya (WHO) hu brei tapa dự thảo sarak ieu Israel brei khik kajap bruk iek glang prein yava, y tế ka menuac sia daok di bhum taneh di urang Palestine. Tui nan, WHO ieu Israel padeih bruk oh taduan urang ruak Palestine saong tian prein gauk gar di urang ruak, gam haong nan, jhul patagok bruk nao mai tự do di urang Palestine mangaok dom bhum taneh daok njauk meblah mek.  WHO jeng ieu Israel khik kajap bruk lac amaik ame brei hu nao gam haong anek bhik di urang saong breuk brei adat nao mai ka urang Palestine brei samar drah tui bruk njauk ngak chip gah y tế, hu kuhria tal harei pagun sanya di sang iek ruak.