Pahadar 20 thun dak padang tỉnh (1/1/2004 - 1/1/2024), tỉnh Hậu Giang peih bruk jao brei 1.400 baoh sang “Jum pataom” ka urang kathaot. Hadei di 20 thun padang tabiak, yaom lac mek hu rilo jak jeng cak rok patagok kinh te - xa hoi, min Hậu Giang jeng daok hu baoh sang kathaot jaik 3,50% kuhria tal puac thun 2023, sumu haong labaih 7.000 baoh sang. Nan ye, meng bilan 9 thun 2023, tỉnh peih bruk jak ba dom kapol nyaom, urang dalam saong langiu tỉnh rik jien tame daong padang ngak sang Jum pataom ka dom baoh sang sarak karja, urang hu buh prein yawa tame ngak bruk daong taneh ia, baoh sang kathaot, baoh sang jaik kathaot, baoh sang hu raidiuk kan kandah oh hu sang daok dalam tỉnh saong mbiah tal ini hu ngak salah 1.400 baoh sang kuhria tabiak yaom jien lac 70 tỷ đồng.

Urak ini di dom sang bein pak tỉnh Tiền Giang daok jar var haong bruk sangka bein phun mbang baoh, piah paik baoh pablei tuk Tết nguyên đán 2024. Bilan baoh kayau akaok thun ini, langik lagaih, kraong ribaong dalam mbang hamu hu pabak ia taba gam gam nan ye phun tamuh siam, brei năng suất glaong. Tỉnh Tiền Giang hu taneh bein phun mbang baoh praong abih dalam taneh ia lac jaik 83.000 ha, brei baoh yaok thun labaih 1 trieu 600 tan ngan haong 11 janih baoh kayau hu yaom pablei tabiak negar langiu glaong. Tal urak ini, dalam tinh hu labaih 20.300 ha phun mbang baoh hu pabak mã số bhum pala, labaih 300 labik papaok hu pabak mã số labik papaok pabak ka bruk pablei tabiak negar langiu.

Cà Mau hu angan lac “pasak hadang” di taneh ia, ngan haong taneh praong 280.000 ha, hadang mek hu 220.000 tấn sa thun. Thau ini lac bruk praong, lagaih di tinh, Sở Ngak nong saong Patagok palei pala tỉnh Cà Mau hu pataom tame patagok bruk ngak mbang tui jalan birau, khang kajap piah paglong kein laba gah raong hadang. Tui nan, parilo janih raong saong jalan raong, peih bruk ngak mbang tui chuoi; patagok taneh raong, hadang, paglong yaom hadang Cà Mau.

UBND tỉnh Trà Vinh bahrau brei thau bruk samar drah di bala glut jaleih takai kraong di huyện Cầu Ngang. Dalam nan hu dom labik glut jaleih mbang dalam tame labaih 20m, ngak kan kandah biak trak tal bruk ngak mbang, pala drak saong raidiuk di rahra. Piah patrun tal tanut biar di abih dom khat lahik, urang pan akaok UBND tỉnh Trà Vinh hu pato tacei karja palei klauk papar brei thau dom labik glut jaleih ka rahra thau piah pacang caga, plaih nyaik dom pala. Gam haong nan, brei menuac tui iek catang bruk glut jaleih, bhian pathau khan tagok Sở Ngak nong saong Patagok palei pala.

Meng harei ini 2/1 mbiah tal harei 6/1, Ban raya HCM hu peih jaik 300 labik klauk jru vaccine 5 dalam 1 di 22 quận, huyện saong Ban Thủ Đức hadei di sa tukvak padeih. Uranaih umo meng 2 bilan tal 18 bilan daok dalam ban raya oh ka hu klauk ginup mbang jru vaccine 5 dalam 1. Vaccine 5 dalam 1 lac vaccine pacang caga dom ruak tui Mentri Y te ba tabiak lac: bạch hầu, ho gà, uốn ván, viêm gan B, viêm phổi saong viêm màng não mủ kayau virus Hib.

Dalam thun ini, Rajaei Thái Lan ba tabiak jalan ngak lac mek hu 3.500 tỷ Baht (labaih 100 tỷ USD) ka kinh te tapa gah du lịch. Gam tui di nan, Rajaei Thái Lan ba tabiak jalan ngak lac mayaih khan thaot binguk taneh ia ini yau sa labik mai du lich luac thun. Piah ngak hu bruk ini, dom urang jakar Thái Lan daok peih ngak danak dak yaih khan Thái Lan yau sa labik tal biak gheih makre dalam luac thun. Danak dak ini meda pataom prein tame yaih khan dom labik du lịch bahrau, pambuak gam haong dom labik danei angan tal tuai damuai.

Patui khaw tin ka bruk megei baoh taneh khang 7,6 độ rah tabiak harei 1/1 di Ishikawa - Nhật Bản, kuhria tal page ini 2/1 taneh ia hu 13 urang metai saong yaok pluh urang njauk rambuac, rilo sang glong tal, ô tô saong kapal gilai tayak atau khut trak. Apui khuah dalam tuk megei baoh taneh mbang labaih 200 danak dak kien truc di tỉnh Ishikawa. Thu tuong Nhật Bản Fumio Kishida mboh lac “ khat lahik biak ralo, tuk hu urang metai, rilo sang danaok glut jaleih saong apui khuah”. Rajaei brei ba 1.000 urang lin mai tal labik daong bruk duah urang gaok bala saong ramik pasiam bruk hadei bala rah tabiak.

Cục duah thau bruk hình sự di Malaysia daok peih ngak sa danak dak biak karei, pasang iek 70 labik ma-in di dalam taneh ia saong cap khik 104 urang dalam palei, 373 urang negar langiu ngan haong dom duas karei di gauk, abih di nyu nan pambuak tal ma túy saong ngak bruk oh hu harak adat. Bruk njauk mayai nan lac, dalam jaik 400 urang negar langiu njauk cap khik, hu labaih 250 urang kumei meng dom taneh ia Đông Nam Á. Urang lambaok di Cục pasang iek hình sự negar ini brei thau lac, dom mbang pasang iek kol toi pham meda ba mai dom bruk siam lagaih ngan haong rahra, gam tui di nan jeng ieu rahra khan brei thau tuk mboh dom bruk ngak suan.