Tui Mentri LĐTB &XH, dom baoh sang kathaot tui tanut chuan kathaot rilo gah thun 2023 dalam negar trun 1,1%; baoh sang kathaot di dom huyen kathaot trun 5,62%, baoh sang urang bangsa takik kathaot trun 3,2%, mek hu tanut QH saong Rajaei ba tabiak. Hu veik 9 xã ngak salah bruk padang ngak palei pala birau di dom huyen kathaot. Rilo bruk ngak mbang pala drak, pablei salih hu kien laba di bhum urang bangsa takik hu padang ngak saong pambak praong. Langiu di nan, dom danak dak, srak an sinh hu rik tame sangka kuhria, tani tanat raidiuk ka rilo baoh sang lac baoh sang sarak karja, baoh sang kathaot khat lahik kayua bala meng langik tasik, jit ruak.

Urak ini, Mintri Pato magru hu peih ngak salah bruk ngak tapuk pato bac saong harak tacei jalan pato bac sap bangsa takik dom tal bac 1, 2, 3, 4. Dom bản mẫu tapuk pato bac saong harak tacei jalan pato bac sap bangsa takik dom tal bac 1, 2, 3, 4 hu pasang iek, taong yaom, brei pandar. Min, tal tukvak ini, bruk in ấn, xuất bản, patabiak jeng ka oh hu peih ngak piah ka dom bhum palei peih bruk pato saong bac meng sap bangsa takik tui Hukum pato magru thun 2019.

Kadung jien bac “Vừ A Dính” saong Kalup kapol “ Daong Hoàng Sa – Trường Sa anit ranam” pambuak haong Tỉnh đoàn Trà Vinh birau jao paok jien bac brei ka 55 adei anek saih bangsa takik saong anek saih lac anek di urang nao ngak mbang di tasik kaoh pulao hu raidiuk kan kandah, yaok paok jien bac 1 trieu dong. Tapa nan, muk Trương Mỹ Hoa, dahlau diah lac Pho akaok negar, Akaok Kadung jien bac “Vừ A Dính”, hu alin brei blah laoh 20 paok jien bac ka anek di urang jakar, urang lin Bộ đội Biên phòng tỉnh, saong Báo Thiếu niên Tiền phong haong Nhi đồng alin brei 15 sruh radaih juah ka dom anek saih kham merat yam tapa kan kandah bac ta-a naih joi.

Akaok UBND tỉnh Bình Phước bahrau hu panuac ieu dom gah, dom puk palei dalam tinh patagok dom jalan ngak piah pacang caga jit ruak. Gam haong nan, dom puk palei, dom gah brei paglaong jang prein khik ramik hành chính saong kaong nghe pabak ka bruk pacang caga jit ruak; patagok dom prein khang jumpataom gauk, pasiam veik dom kan kandah di jit ruak, tani tanat raidiuk ka rahra, abih di nyu nan lac dom urang gaok kan kandah meng COVID-19, dalam nan hu uranaih matui, oh caik ka dom kamuan njauk kan kandah saong kurang pandap panda.

Kapol urang Kumei huyen Mỹ Xuyên, tỉnh Sóc Trăng urak ini hu labaih 28.000 urang, dalam nan hu jaik 50% lac urang kumei bangsa Khmer. Piah daong ka urang dalam kapul ngak mbang patagok raidiuk, yam tapa truh kan kathaot, Kapol urang Kumei huyện hu padang 11 bruk pak dom pandap pandar dalam sang ngan haong labaih 750 urang kumei, jien mek tame kuhria sa adit hu meng 6 rituh tal 1 trieu dong sa urang. Tal puac thun 2023, huyện Mỹ Xuyên hu 24 kapol pambuak bruk kayua urang kumei khik iek ngan haong 488 urang yau urang raong limo ia tasau, pala njam patam, raong hadang haong ngak padai, pablei salih sit, pak yot…daok patagok siam.

Tổng thống Nga Vladimir Putin hu mbaoh tangin tame sarak peih ngak thun ilamo di Nga saong Trung Quốc 2024-2025. Tui sarak ini, bruk peih ngak thun ilamo Nga - Trung piah patagok jang talei pambuak gauk di dua taneh ia dalam gah ilamo. Dahlau di nan, harei 31/12/2023, dalam harak taduau ayuh Akaok negar Trung Quốc Tập Cận Bình uan salam thun bahrau 2024, Tổng thống Putin hu ndem lac, thun ilamo Nga saong Trung Quốc hu makna praong dalam tuk jaik peih tabiak harei pahadar 75 thun padang talei pambuak gauk di dua taneh ia.

Jabat jalan mbak pajeng ba Nhật Bản daok peih bruk pasang iek taong abih gah ka bruk ba tal bala di kapal haok gah Cảnh sát tasik Nhật Bản saong kapal haok pajeng tuai di hãng kapal haok Japan Airlines rah tabiak di melam 2/1. Tui panuac khan tuk camereip, kapal haok pajeng tuai hu brei adat par trun mblang kapal haok, min kapal haok di gah Cảnh sát tasik oh ka hu adat par tagok. Dom urang jakar oh ka thau cambaic laic ka dom bruk pambuak tal bala nan, dalam nan hu bruk dua kapal haok peih nduac hasa jalan haong gauk.

Thổ Nhĩ Kỳ hu peih phiên tòa camriep pambuak tal bruk padang ngak dom baoh sang njauk jaleih tayah dalam dua mbang magei baoh taneh khang di bilan 2/2023 ngak ka labaih 50.000 urang metai. 11 urang hu mbaok di tòa ngan haong duas “oh caik hatai tal” dalam bruk pasang iek padang ngak khách sạn Isias. 5 dalam 11 urang, dalam nan hu gam po khách sạn, njauk cap khik saong kaoh duas ngan haong dom duas meda ngak ka dom urang ini njauk daok guk labaih 20 thun. Bruk jaleih khách sạn Isias ngak brei 72 urang matai, 39 urang dalam dom urang nan mai meng Bắc Cyprus. Ini lac bala praong abih dalam sajarah Thổ Nhĩ Kỳ.