Meng akaok bilan 2 tal urak ini, dom tinh, ban gah Tây Nam bộ daok kham marat pacang caga haong bruk pandiak bhang, njom ia mbak, glut jaleih taneh biak trak damak dalam bilan thu. Di tỉnh Hậu Giang, labik hu ia mbak mbang dalam meng tasik Biển Đông saong tasik Biển Tây, daok samar drah kareik dom binek pacang ia mbak. Huyện Long Mỹ jaik taphia haong Bạc Liêu saong Kiên Giang lac labik gaok kan kandah abih di ia mbak. Urak ini ia mbak di kraong Ngan Dừa saong kraong Nước Trong yam tapa tanut 3 mangaok ribau, mbang dalam tame mblang hamu. Di rilo tinh, ban karei di gah pai negar yau ye Tiền Giang, Bến Tre, Sóc Trăng, Trà Vinh, Kiên Giang... jeng daok kurang ia taba biak trak damak ka bruk ngak mbang, pala drak di urang ngak nong.

Nao tapa dom palei Cam di An Giang dalam bilan eik Ramadan tuk harei mboh joa kandang jang bilan karei. Kayua ini lac bilan urang Cam Islam eik tui rukun Islam. Bilan eik Ramadan thun ini (thun 1445 saka Islam) meng harei 11/3 saong dui atah dalam 30 harei, taong abih likei kumei umo meng 15 thun tagok, brei eik mbang menyum saong oh brei hagait tame rup. Langiu di nan, yaok harei, urang Islam samen 5 vactu lac tuk saboh, jala pandiak, biar harei, langik laik sup saong malam, ieu lac samen isha. Bilan Ramadan, urang Islam daok hu pataom gauk samen Tarawaih hadei di samen vactu Isha.

Sở Ilamo, Thể thao saong Du lịch tỉnh Đắk Lắk pambuak haong Jabat Ilamo saong khau tin huyện Krông Bông bahrau peih mbaok tal pato ilamo paoh chieng ka ranaih di Sang bac Phổ thông bangsa gam bac gam daok Trung học cơ sở huyện Krông Bông. Tal bac hu 20 urang bac lac anek saih bangsa takik anit ranam ilamo paoh chieng saong dom alak ragam bangsa. Tal bac pato paoh chieng piah daong ka anek saih bangsa takik patui veik, khik ramik saong patagok dom yaom glaong ilamo di bangsa; pamadeih hatai anit ranam dom alak ragam bangsa ka rai ranaih. Gam tui di nan, duah mboh saong pasram pato ka dom urang naih pachreih paoh chieng, tamia rik tame khik ramik, saong patagok dom yaom glaong ilamo meng kan di bangsa takik pak ini.

Mban tacei pato pakat negar ka pacang caga bala meng langik tasik bharau hu harak ieu mBan tacei jalan pacang caga bala meng langik tasik saong daong duah urang gaok bala dom tinh ban tapen tasik meng Quảng Ninh tal Cà Mau saong Kiên Giang hu dom jalan ngak piah caga pacang ngin khang angaok tasik, khan brei thuyền trưởng, po dom kapal gilai daok ngak bruk angaok tasik thau piah pacang plaih saong hu jalan ngak bruk ka nyu lagaih, khik siam mekre salamat menuac sia saong drap ar, khik kajap jalan phone piah langyah samar drah dom bruk jhak meda rah tabiak. Caga menuac, pandap piah daong tuk hu bruk oh siam rah tabiak.

Công ty Cổ phần pajeng ba jalan pasei Sài Gòn peih bruk pablei harak ve ka dom sruh radaih pui nduac yaok harei dalam tuk padeih Lễ 30/4, 1/5 saong patui veik peih bruk pablei harak ve tal harei 14/5/2024 ka dom sruh radaih pui nduac meng TP. Hồ Chí Minh nao Hà Nội, Đà Nẵng, Nha Trang saong gilac veik. Tukvak ini, gah jalan pasei jeng pandar danak dak trun yaom yaok mbang ka dom urang sarak kanja. Trun yaom 90% harak vak ka amaik Việt Nam Anh hùng; trun 30% harak ve ka thương binh, urang njauk jru mek hóa học, urang jaoh jo trak; trun 15% harak ve ka rahra Việt Nam meng umo 60 thun tagok. Ngan haong nyaom uranaih mala 6 thun jeng oh mek jien, meng umo 6 thun tagok tal umo 10 thun hu trun 25% harak ve saong trun 10% harak ve ka sinh viên; trun 5% yaom harak ve ka tuai nao radaih pui dalam harei uan harei manek.

Harei ini, mbang camereip hadei di sa thun,  thur kanjik me-om bak jaik abih dom labik di Hàn Quốc. Cục Khí tượng Hàn Quốc brei thau, thur kanyik hu mboh di gah pai pulao Baengnyeong di tuk mesup ini. Hadei di nan, nyu me-om bak langik Seoul saong dom labik jaik taphia. Kuhria   atal mon 11 jala ini, nồng độ kuhria rah tapa yaok mon di dom thur  praong labaih 10 micromet, hu ieu lac PM 10, nyu tgaok 162 saong 112 microgam di yaok mét khối di Seoul saong Sokcho. (VOV)

Sa kapul urang roh duah ilamo negar Thái Lan bahrau ngak tabiak sa danak dak pandar trí tuệ nhân tạo (AI) daong duah mboh samar urang njauk ruak trầm cảm atau caong pametai rup eng. Dom urang roh duah ilamo hu padang ngak danak dak ini tui bruk pandar kong nghe AI piah langyah sap ndem hu vak gilac saong khik piah dalam cơ sở dữ liệu ka prein yava gilo akaok di jabat prein yava tâm thần. Danak dak ini brei adat taong yaom chip prein yava gilo akaok di urang pandar jit vu. Thun blaoh, hu tal 1,5 triệu urang meng umo 15 thun tagok pak Thái Lan hu brei thau lac njauk ruak trầm cảm.

Tui Cục Pasang iek saong Pacang caga jit ruak pakat negar Trung Quốc, dom uranaih saong dam dara cận thị di taneh ia ini tagok tal 52%. Jeng tui panuac khan di jabat ini, bruk cận thị trak di dom anek saih daok trun meneing, brei mboh Trung Quốc ngak hu siam bruk pacang caga cận thị. Brei tui iek bruk thị lực di anek saih yaok thun, dom sang bac brei hu tukvak ka anek saih padeih padei, brei me-in langiu langiu takik di abih lac 30 minit piah trun glaih glar ka mata di anek saih./.