Piah sangka kuhria brei baoh sang halei jeng hu mbang tet, Akok HĐ bhap bini tỉnh Long An Nguyễn Văn Được saong urang ngak praong dom sở, dom gah hu nao rivang, alin hadiah paok pandap Tet ka urang hu buh prein yawa daong taneh ia saong uranaih sang kathaot di huyen Bến Lức. Kapol urang jakar hu alin brei paoh pandap ka 100 uranaih  hu raidiuk biak kan kandah saong uranaih mbuan gaok rilo kan kandah,  yaok paok pandap yaom 700 ribau đồng. Mbang ini, tỉnh Long An hu padang 13 kapol urang jakar nao tadhau ayuh  urang taha umo, alin pandap Tet  ka urang hu buh prein yawa daong taneh ia saong labaih 1.500 uranaih hu  raidiuk bika kan kandah  di 15 bhum palei dalam tỉnh.

Sở Du lịch TPHCM saong Kapul ilamu mbang huak Việt Nam bahrau peih mbaok harei pataom Tết Việt năm 2024. Harei pataom hu angan ieu lac “Tết Việt, Tết meng kan di bangsa – Pok meyaom ilamu meng kan, dak padang harei hadei” saong 5 kapul ngak bruk praong lac “Iek Tết – Me-in Tết -Sambai Tết - Mbang Tết – Darak pasar Tết,” abih di nyu lac brei mboh veik ilamu meng kan di harei Tết, daong ka rahra, tuai damuai hu thau ka  ilamu Tết 3 bhum taneh. Harei pataom hu peih tabiak meng ini tal harei 21/1, hu ba mai ka rahra, tuai damuai rilo bruk ilamu, mbang huak saong pablei salih karei di Việt Nam.

Kuhria abih tih taneh pala phun mbang baoh dalam tỉnh Tiền Giang pablei di darak pasar Tet  thun sak Ine Girai ini lac 7.000 ha, kuhria mboh dahlau  hu labaih 83.000 tấn. Bilan baoh kayau tet thun ini urang nong kan ngak jang dom thun dahlau  kayua langik oh lagaih. Ong Võ Văn Men, Aok Chi cục Pala drak saong Khik caga phun pala tỉnh kakei lac, urak ini dom janih phun kayau mbang baoh daok jaik brei paik baoh nan ye mikva pruh ia saong tui iek harak halin ruak kik, juai buh khak, kayua tukvak paik baoh daok katut. Abih di nyu, oh pandar dom jru ngak brei praong drah kayua baoh samar bruk.

Jaik 10 thun ini mai, baoh kayau mbeik jeng thaot binguk hu maong lac pandap alin hadiah harei Tết pablei biak nduac biak laik di bhum ĐBSCL. Yaom lac oh daok hatai sahneng ngak sa bilan mbang abih thun, min dom po bein di miền Tây jeng daok kham merat ba tabiak darak pasar rilo janih di abih, piah pabak ka hatai takre di tuai damuai. Di Hậu Giang, baoh la-u hồ lô hu sarak akhar ndaong hu yaom pablei 250.000 đồng, kruac bung hồ lô yaom 1 triệu đồng sa gu. Daok baoh đào tiên hồ lô hu yaom pablei meng 300.000 - 700.000 đồng sa baoh. Dom bein di huyện Lai Vung, Đồng Tháp daok iek glang labaih 700 phein quýt hồng. Yapm pablei meng 1 triệu tal 5 triệu đồng sa phein.

Pamabuak tal bruk 3 urang lahik hadei di mbang patuh khang di Cà Mau, tui panuac khan di gauk gar dalam sang, dom urang nan ba mbom nao kagaik. UB bhap bini huyen Năm Căn brei thau, tui duah thau camereip tapa urang dalam sang, dom harei dahlau di tuk bala rah tabiak, ong Nguyễn Ngọc Tư (ndih tapui thun 1982, di ban sit Năm Căn) mbeik hu sa baoh mbom ba mai caik jaik sang. Ong Tư sahaneng kagaik mbom nan pablei  min gauk gar dalam sang ghak oh brei. Hadei  di nan, ong Tư haong 2 urang karei  pajeng mbom meng ghe nao jaik glai gah diah kraong Cửa Lớn, pandar kagaik điện kagaik mbom, ba tal bruk pandik pandua ini. Jabat chức năng bhum palei  mboh lac, 3 urang nan metai paje.

Hãng tin Kyodo brei thau, pablei salih nao mai di Trung Quốc haong Triều Tiên dalam thun 2023 hu tagok veik khang, mek hu labaih 82% duk haong dahlau di jit praong COVID-19. Hu yau nan meng hu pambuak veik bruk pajeng ba pandap panda nao mai di dua gah meng jalan pasei saong jalan radaih, yaom lac Triều Tiên jeng oh ka talaih klaak abih dom bruk brei takik ngak pambuak tal jit COVID-19. Abih tih jien mek tame meng pablei salih di Trung Quốc saong Triều Tiên thun 2023 tagok jang labaih 2 mbang duk haong thun dahlau, hu 2 tỷ 300 triệu USD.

Hu takik di nyu 12 urang metai dalam mbang tableik gilai di gah Pei Ấn Độ di harei 18/1. Bala rah tabiak tuk sa sruh gilai tableik angaok danao praong hu pajeng 27 urang, ralo meng lac anek saih nao rivang ma-in. Dahlau di nan thun 2023, hu sa gilai dulich tableik di  bang Kerala, gah Meraong Ấn Độ, ba tal takik abih lac 22 urang metai. Dom urang daok diuk brei thau tukvak nan, rilo tuai damuai  angaok gilai oh hu cuh ao caluai ia.

Canada saong Tây Bắc taneh ia Mỹ daok rah tapa sa mbang rabuk tuyết bahrau. Di Canada, rilo sang bac brei kreik pabah mbang, jalan mbak kan nao mai. Di Mỹ rilo labik tuyết laik kapal tal 30cm. Di bang New York tuyết laik mbong patih langik tasik, oh maong mboh hagait saong ngin khang biak jhak. Tui kuhria mboh, tuyết daok laik kapal dalam dom harei tal. Dahlau di nan, harei 13/1 meng blaoh, rilo labik di taneh ia Mỹ jeng hu sa mbang rabuk tuyết biak khang ngak brei labaih 120 rabau sang di ban Portlan lahik điện./.