Urang pan akaok tỉnh Hậu Giang bahrau peih bruk nao ravang hamu akaok thun di mblang hamu padai pak puk 2, xã Vị Bình, huyện Vị Thủy. Mblang hamu padai ini hu rahra pandar jalan pala drak tui Danak dak sa triệu ha padai chat luong glaong di Rajaei. Ong Nghiêm Xuân Thành, Bí thư Tỉnh ủy Hậu Giang kakei gah ngak nong saong dom bhum palei hu bhum taneh dalam tinh patui veik peih praong bruk pala drak padai hu chat luong glaong piah rik tame paglaong yaom kaom padai brah saong patagok jien mek tame ka urang ngak nong pala padai dalam tỉnh, gam haong nan, jeng khik caga alam moi truong, patrun bruk tathuak nerak tachrauk sang kreih camin.

Dalam dom harei akaok thun, hu jaik 700 doanh nghiệp di dom labik ngak kong di tỉnh Bình Dương hu ngak bruk veik. Doanh nghiệp hu urang ngak mai ngak bruk veik rilo abih lac di labik ngak kong VSIP, mboh hu 75% dom menuac ngak. Piah pachreih ba dom urang ngak mai ngak bruk veik njauk tukvak ba tabiak, urang pan akaok dom doanh nghiệp hu trun tal labik urang daok ngak, tadhau ayuh thun bahrau, brei jien lì xì ka yaok urang meng 100.000 tal 300.000 đồng.

Tuk Tết Nguyên đán meng blaoh, hu rilo tuai pilih ruah Bà Rịa - Vũng Tàu piah padeih padai, manei tasik, kayua yau nan ye bo jien mek tame di gah du lich hu tagok. Tui Sở Du lịch tỉnh Bà Rịa - Vũng Tàu, meng harei 1 bingun tal harei 5 bingun Tet, dalam tỉnh hu raok jaik 685 ribau mbang tuai, tagok 2,23% dut saong tukvak tet thun blaoh. Jien mek tame labaih 558 tỷ đồng. Dom bilik hu tuai daok lac meng 80 - 85%. Dom mblang tasik manei di TP. Vũng Tàu saong dom labik du lich pakat glaong di huyện Xuyên Mộc hu tuai pilih ruah rilo abih tuk mai ma-in di Bà Rịa - Vũng Tàu  tuk Tết.

Tui Mintri Y tế, dom menuac tame iek ruak, tame cấp cứu kayua pháo patuh, phao bingu tuk Tết thun ini rilo jang labaih 50% duk haong Tết thun blaoh. Njauk biai nan lac dom urang njauk bala ini jeng mai meng bruk pandar phao ngak eng. Pandik harao jang lac dalam dom harei tapa, hu 3 urang matai kayua phao ngak eng. Tui panuac di Mintri Công an, 5 tỉnh hu bala meng phao ngak eng, meng pandar phao dalam dom harei Tết rilo abih lac Hà Tĩnh, Đắk Lắk, Bình Dương, Đồng Nai, Quảng Nam, kuhria rah tapa yaok tỉnh hu  25 bruk. 

Di tỉnh Đồng Nai rahtabiak veik bruk rahra parak klak pabui, manuk, ada metai meng dom labik raong glang palao trun kraong Bình Lộc, TP. Long Khánh ngak ka kraong ia njauk tachrauk nerak biak trak damak. Dahlau di nan, di dom huyện: Thống Nhất, Trảng Bom, Cẩm Mỹ… bruk dom labik var raong glaong parak klak pabui, manuk metai trun dom kraong ia ngak tachrauk nerak halau ia hu rilo mbang rahtabiak. Tỉnh Đồng Nai hu pato tacei njauk samar drah ba dom baoh sang raong glang sit sot, labik raong oh hu jamraik ngak hacih ia nerak atau bruk rami ramik ngak hacih ia oh ngak njauk tui tanut chuan palao tame dom labik raong glang pataom gauk piah plaih nyaih bruk tachrauk nerak alam labik daok.

Yaom lac tuk halei jeng hu maong lac sa dalam dom bruk ngak tani tanat di Trung Quốc, min kayua daok dang anak bruk ndih tapui takik saong menuac sia trun, yaok triệu gru pato di taneh ia ini daok dang anak bruk mbuan si lahik bruk dalam 10 thun tal. Trung Quốc daok rah tapa tukvak salih nhân khẩu học pambak tabiak praong dalam, haong dom menuac padeih hưu tagok samar saong dom anek kamar ndih tapui tabiak trun khang. Rilo tinh ban daok pataom tame rami ramik veik menuac ngak gah pato megru. Meng akaok thun 2023, gah khau tin Trung Quốc hu khan brei thau lac, kayua menuac sia daok trun, dom sang bac tiểu học di taneh ia ini meda trun daok meteh dalam 12 thun tal.

Tuai negar langiu mai tal Thái Lan meda hu mbang bảo hiểm y tế tagok tal 500.000 baht, samu 14.000 USD mayah rahtabiak bala di Thái Lan saong biyar jien tagok tal 1 triệu baht, samu 28.000 USD meyah metai lahik. Min, tuai du lịch meda oh hu taduan jien bảo hiểm mayah bala rahtabiak meng bruk oh caik hatai di drei, atau eng drei hu mbaok tame dom bruk ngak kanjak jhak atau dom bruk ngak suan adat hukum di taneh ia Thái Lan. Ini lac sa danak dak, jalan ngak bahrau di Rajaei negar ini piah khik salamat ka tuai mai ma-in di pak negar paha ameh ini.

Hy Lạp hu jeng taneh ia Cơ đốc giáo Chính thống camereip abih brei adat ka bruk likei tok likei, kumei khin kamei. Dom gu đồng giới urak ini jeng hu adat  taduan anek raong. Thủ tướng Hy Lạp Kyriakos Mitsotakis brei thau, hukum bahrau khang tangin brei klaak bruk likei kamei oh samu gauk biak trak damak di taneh ia ini. Min hukum ini jeng ba tal bruk klamlah gauk dalam taneh ia saong gaok bruk cagar veik khang di  Giáo hội Cơ đốc Giáo Chính thống Hy Lạp./.