Thu tuong Rajaei birau hu sarak 73/QĐ-TTg kayua Pho Thủ tướng Trần Hồng Hà mbaoh tangin ka bruk taduan 29 drap ar pakat negar di 15 tỉnh, ban. Dalam nan hu dom drap ar  Duah pataom mũi khoan patau Thác Hai, hu  meng 4.000 - 3.000 thun dahlau; urak ini daok khik piah di Muyim tỉnh Dak Lak. Jeik ban  Kính Hoa II, abap III-II dahlau Công nguyên; urak ini daok khik piah  di Muyim tỉnh Khánh Hòa; Rup patau Shiva Mỹ Sơn C1, abap VIII; urak ini daok khik piah di Muyim Sarak Cam  Đà Nẵng  saong rilo drap ar karei karei. Yau nan, tal urak ini Thu tuong Rajaei hu taduan 294 pandap, nyaom pandap lac drap ar pakat negar.  

Patui jalan patagok bruk “Abih gauk dalam taneh ia daong ka urang kan kathaot” saong salam uan thun bharau anek sak ine girai, harei 30/01/2024 anak tal, di palei ilamu- yulit dom bangsa Việt Nam (Đồng Mô, Sơn Tây, Hà Nội), mBan khik ramik palei ilamu yulit dom bangsa Việt Nam peih bruk padang phun nêu saong danak dak “papaok ahar bánh chưng xanh-Tết daong ka urang kan kathaot” thun 2024, brei pandap ka mikva sang kan kandah. Ini lac bruk ngak yaok thun piah yaih khan haong tuai damuai dalam saong langiu taneh ia ka ilamu hadah krah dalam taduan raok Tết meng kan di bangsa Việt Nam, abih di nyu lac dalam rai ranaih saong bhap bini bangsa, rik daong khik ramik saong patagok dom yaom glaong ilamu meng kan mai di dom bangsa Việt Nam.

Patui danak dak alin brei pandap Tet, biar harei kabroi, Kapol urang Quoc hoi tỉnh Gia Lai kayua ong Đinh Ngọc Qúy, UVTT UB Xa hoi di Quoc hoi ba akaok kapol pambuak haong Kadung jien Thiện Tâm, Kapol Vingroup mai rivang saong alin pandap  di huyen Chư Păh. Yaok paok yaom 600 ribau đồng. Ini lac bruk ngak yaok thun di Kadung jien Thiện Tâm yaok thun tuk Tet tal. Hu thau, mbang ini Kadung jien Thiện Tâm hu alin brei 3.000 paok pandap di 6 huyện dalam tỉnh Gia Lai, nan lac: Ia Grai, Chư Păh, Ia Pa, Phú Thiện, Đak Đoa saong Mang Yang.

Harei ini, Gilang pariak sarak karja Việt Nam peih ngak danak dak alin hadiah pandap salam uan Tết thun sak ine girai 2024 brei ka dom sang kan kathaot, sang jaik si kan kathaot, sang sarak karja daok di xã Hòa Tú 1, huyện Mỹ Xuyên, tỉnh Sóc Trăng. Tapa nan, gilang pariak sarak karja Việt Nam hu brei 100 paok pandap ka dom sang kan kathaot, sang jaik si kan kathaot, sang sarak karja daok dalam xã Hòa Tú 1, yaok pok pandap yaom 700.000 đồng. Tết thun ini, gilang pariak sarak karja hu alin hadiah dom pok pandap, kuhria tabiak yaom jien lac labaih 5,3 tỷ, ta-eng di tỉnh Sóc Trăng hu alin hadiah 300 paok pandap brei ka sang kan kathaot, sang jaik si kan kathaot saong sang sarak karja.

Mban Bangsa tỉnh Bình Phước birau peih bruk pataom iek veik bruk ngak bangsa thun 2023, ba tabiak jalan ngak ka thun 2024. Thun 2023, Mban Bangsa tỉnh ngak njuak tui dom asar kadha hu UB bhap bini tỉnh mbaoh tangin saong ngak salah 95% bruk hu ba tabiak, dalam nan 22% bruk hu ngak salah dahlau. Abih di nyu nan lac, Danak dak pakat negar  ka  cak rok patagok kinh te - xa hoi bhum bangsa takik saong bhum ceik, danak dak  trun 1.000 baoh sang kathaot hu peih ngak  siam saong hu rilo bruk salih birau. Raidiuk bhum urang bangsa takik dalam tỉnh hu tani tanat, bruk ngak mbang, daok dang di bhap bini uranhg bangsa takik kan kathaot, sang urang kan hu karja, mặt trận, kapol nyaom dom pakat  sangka kuhria ginup.

Akaok Mintri Dầu mỏ saong Khí đốt Ấn Độ Hardeep Singh Puri harei kabroi tabiak panuac lac, kinh tế Ấn Độ meda mek hu 5 rabau tỷ đô-la dalam thun jien padai patui di ini (2024-2025) saong meda mek hu 10 rabau tỷ đô-la di thun 2030. Urak ini, kinh tế Ấn Độ kuhria mek hu 3,7 rabau tỷ đô-la. Kinh tế Ấn Độ tui kuhria tagok 7,3% dalam thun jien padai urak ini (2023-2024), saong lac nền kinh tế praong, tagok samar di abih. Bahrau ini, Ấn Độ jeng yam tapa Hồng Kông (Trung Quốc) piah jeng darak pasar chứng khoán praong ka 4 di dunya.

Dom harei ini, di Nhật Bản saong Hàn Quốc, rilo bhum palei hu tuyet laik kapal, ngak kan kandah trak tal raidiuk bhap bini saong bruk ngak mbang. Di bhum tapen tasik Nhật Bản, di bhum gah Barak lac labik  birau rah tabiak megei baoh taneh khang di tỉnh Ishikawa hu dom mbang tuyet laik. Jabat khi tuong Nhật Bản hu tabiak panuac brei caik hatai tal kan kandah gah jalan mbak, bruk nao mai di labik ini. Daok di Hàn Quốc, tuyet jeng laik kapal trak. Tui Rayo KBS, kayua langik la-ar gam haong rilo taginum ngak jeng tuyet, langik tuk dah page di rilo bhum palei biar abih kuhria meng bilan la-ar thun ini. Di ban ine Seoul nhiet do la-ar trun âm 14 độ C.

Dom menuac njaom Covid-19 di Thái Lan daok tagok samar haong 718 urang ruak njauk tame sang iek ruak saong 11 urang matai dalam adit blaoh. Tui Cục Khoa học Y tế Thái Lan, jaik abih dom urang njaom Covid-19 di taneh ia ini jeng lac njaom biến thể JN.1 saong mboh lac patuk, pandik talang, pandik tarakaong, pandik akaok, sraiy ia dhung. Dom triệu chứng di JN.1 oh trak damak min jeng daok ngak brei duh hatai kayua nyu njaom mbak biak samar, brei hu gah iek glang prein yava di taneh ia caga ba tangin tame bruk. Thái Lan kakei bhap bini jhui iek lap saong brei ngak dom jalan pacang caga yau ye cuk pataih pacang mbaok tuk nao tal dom labik hu rilo manuac./.