Brei panuac di var peih pakak “Festival Le hoi Khik ramik saong Patagok palei ngak Việt Nam thun 2023” rah tabiak melam 9/11 di Hà Nội, Akok Mentri Ngak nong saong Patagok palei pala Lê Minh Hoan ndom lac, yaok ribau palei ngak di puk palei, palei ngak meng kan di dalam negar, dom drap ar ilamu phi vat the taneh ia di janih bruk ngak meng tangin di muk kei caik rai, rik tame ba mai kein laba biak ralo ka kinh te, ilamu, xa hoi. Tukvak anak tal, Mentri ba mbuan lagaih  piah dom nghe nhan, urang gheih tangin ngak joi, dom urang thiet ke thủ công mỹ nghe pambuak haong bruk ngak, haong palei ngak, gam khik ramik saong cak rok patagok ilamu siam gheih di palei ngak meng tangin hu meng kan mai, rik tame  paglong raidiuk bhap bini di palei pala.

Tập đoàn Điện lực Việt Nam (EVN) daok brei tagok yaom điện pablei lẻ kuhria rah tapa lac 4,5% meng 1.920,37 đồng tagok 2.006,79 đồng/kWh. Lambaok EVN brei thau, bruk ramik veik yaom điện mbang ini hu khik ka dom sang kan kathaot, dom sang sarak karja oh gaok kan kandah rilo. Tui yaok pataom, thun 2022 dalam taneh ia hu labaih 1 triệu 270 rabau sang kathaot, sang sarak karja hu daong jien tui jalan ngak di Rajaei.

UB bhap bini TPHCM birau peih bruk pakacah 60 harei melam kham merat peih bruk brei phun jien buh ngak meng kadung karja, kham merat ngak bahu 95% dalam thun ini. Asar kadha pakacah lac jhul pasamar  bruk peih ngak danak dak, du an, danak dak muc tieu; pataom prein tame brei peih phun jien karja tame ngak, iek bruk jhul pasamar brei jien meng kadung karja lac bruk praong, hu makna  rik tame  jhul pasamar bruk cak rok patagok kinh te- xa hoi di TPHCM.

Urak ini, baoh durian daok hu yaom glaong di abih, laba biak rilo. Piah khik angan je, chất lượng saong angan pablei salih janih baoh kayau ini, gah ngak nong tỉnh Bến Tre hu panuac caong karja palei patagok pathau khan, kakei urang nong tuk baoh durian tasak meng paik, piah khik chất lượng baoh pablei tapa negar langiu saong angan je durian Việt Nam, plaih bruk lac kayua laba di anak meta bo pablei baoh mada. Bến Tre hu jaik 2.700ha bein durian, yaok thun hu jaik 27.000 tấn baoh. Ini lac janih baoh kayau brei kein laba glaong di abih duk haong dom janih baoh kayau karei dalam tinh.

Sở Y tế tỉnh Bình Dương birau iew dom labik y te brei patagok pasang iek bruk khik tani tanat saong salamat urang rauk hadei di bruk kuman  birau ndih tapui njauk urang chap nao di Sang iek ruak Đa khoa tỉnh Bình Dương harei 4/11 meng blaoh. Dom sang iek ruak brei padang dom kapol nyaom ngak bruk samar chip tuk hu bruk oh salamat, duah uranaih lahik, njauk chap mek…Brei pasiam saong ngak bruk yaok mbang piah taong yaom, pasiam sumu dom bruk daok kurang.

Biến đổi khí hậu njauk jeng sa asal kadha praong dalam dom sarak taneh ia di Philippines. Ini lac panuac hu Tổng thống Philippines ba tabiak harei kabroi dalam tuk pahadar 10 thun bala rabuk khang Haiyan ngak brei 6.000 menuac metai di taneh ia ini. Hadei di rabuk khang Haiyan, menuac sia ban Tacloban hu rilo kapul nyaom dunya daong padang ngak veik sang danaok khang, siam, hu prein pacang rabuk siam jang, daong pato bruk ngak, daong ka Tacloban tagok veik tui jalan siam jang saong khang kadang jang.

 Blung patih, ia nerak tachrauk saw gauk saong ia tathuak tabiak meng cong nghiep, hu mboh rilo di karong Yamuna, sa canah di kraong Hằng gireik, atah labaih 1.376 km meng talei caik Himalaya tapa dom bang di Ấn Độ. Blung patih hu mboh birau abih di ini njauk tuk njom nerak ba tal rilo urang dalam labih 20 trieu bhap bini di New Delhi njauk ruak, dalam tuk dom sang bac tieu hoc  saong dom jabat ngak bruk brei kareih pabak mbang. Yau nan min, rilo bhap bini dalam palei  di bhum gah ala kraong daok pandar ia njom nerak piah menei saong ngak mbang ngak huak.

Gah Y tế dunya WHO hu panuac lac, dalam tuk dom menuac matai saong njauk rambus daok tgaok rilo di Gaza kayua bruk mesruh gauk daok catang tagok, bruk bak katin menuac di dom labik daok plaih, haong bruk y tế, pabak ia klaih klaoh, ngak brei mbuan njaom mbak samar drah dom ruak njaom mbak. Tui WHO, bruk kurang xăng menyek di labik hu rilo menuac nyu ngak ka dom sang mac ngak jru jamaok brei kreik pabah mbang, tui nan mbuan ba tal njaom mbak dom ruak nhiễm trùng kayua vi khuẩn yau ye ruak aih craoh./.