#Dalam 2 harei, harei 8-9/12, di Ninh Thuận, Mintri ilamu, Thể thao saong Du lịch pambuak bruk haong UBND tỉnh Ninh Thuận peih ginum biai pakat dunya ka “Khik ramik saong cakrok patagok ilamu ngak lan am meng kan di urang Cam”. Ginum biai hu peih tabiak piah pataom panuac ka bruk khik ramik inem krung ilamu, pataom duah dom harak gar piah pakhang pasiam luận cứ khoa học ka bruk padang ngak hồ sơ “Ilamu ngak lan am meng kan di urang Cam” pok tagok UNESCO ba tame angan inem krunmg ilamu phi vật thể njauk khik caga chip.

# Page harei 10/12, Bộ Chỉ huy Bộ đội Biên Phòng TPHCM peih Nyaom roya pakacah Quyết thắng tukvak 2013 - 2018. Meng thun 2013 mbiah tal ini Bộ đội Biên phòng ban raya duah mboh, langyah 541 bruk, chap mek labaih 1.000 urang; xử phạt labih 8 tỷ đồng, chap pandap panda 10 tỷ 8 rituh trieu đồng. Langiu di nan, Bien phòng ban raya hu ngak siam bruk salih birau bruk ngak hành chính, peih ngak siam thủ tục biên phòng điện tử, patak pataom ka ban raya saong dom doanh nghiep yaok tỷ đồng; rik tame daong padang ngak , pakajap 63 kapol an ninh bhap bini, 16 kapol ngan saong 127 sruh ghe gilai khik iek eng, 23 kapol tổ tự quản an ninh trật tự ngan saong 208 baoh sang hu mbaok tame, 20 tapen ghe tự quản siam mekre rah tui jalan taphia negar…

Meng dom bruk ngak hu yau nan, Bộ Chỉ huy Bộ đội Biên phòng TP.HCM hu Thủ tướng , Bộ Quốc phòng, Bộ Tư lệnh Bộ đội Biên phòng Việt Nam, Thành Ủy - Uỷ ban bhap bini ban raya alin brei harak bằng khen ka 21 kapol, 32 urang naih gheih. 

# Di Bình Thuận, hadei di 2 thun peih ngak danak dak “Cakrok patagok sap Việt ka uraniah mầm non saong anek saih tiểu học bhum bangsa takik”, hu jaik 5.000 anek saih mầm non saong labaih 10 ribau anek saih bangsa takik hu nao bac. Dom adei rilo meng pang hu, thau hu piah ndom puac nao mai saong pabak hu bruk bac da-a. Danak dak hu peih ngak di 49 sang bac mầm non saong 99 sang bac tiểu học di 7 huyện dalam tỉnh Bình Thuận. Tui taong yaom di Sở Pato megru Bình Thuận, Tỉnh Bình Thuận ba tabiak jalan ngak lac, tal thun 2025, hu taong abih anek saih bangsa takik bac hu siam môn tiếng Việt pakat tiểu học saong caga bac tagok pakat trung học cơ sở.

# Dom harei tapa, tathok binguk dom urang lin Công an pacang khuah padam khuah Đà Nẵng tram drei dalam hajan khang piah daong urang tabiak truh dom kan kandah mbuan ba tal metai lihik ngak ka bhap bini mikva mboh anit ranam.  Nan lac, dom urang jakar, urang lin pandar phao saong ghe caluai ia tame sang 640/10 jalan Trưng Nữ Vương dauk dalam ia jaik 2 met daong ba 4 kumei dara tabiak truh labik mbuan metai lihik; Nan lac dom urang jakar urang lin medeih luac melam nyuk pruh ia tabiak meng dom hầm chung cư, sang iek ruak…piah daong khik hu siam mekre drap ar di bhap bini. Page 10/12, ia angaok dom jalan di ban Da Nang trun abih. Bhap bini daok tame rami ramik sang danaok, kuan pablei salih piah hu labik daok, labik pablei salih.

# 0 tuk dah page harei 10-12, VFF brei peih pabah mbang pablei harak online mbang dit blong chung kết lượt về di kapul dit blong VN haong Malaysia. VFF brei thau, oh pablei harak tapak ka urang takre iek min meda pablei tapak ka dom CĐV lac thương binh. Dalam sa bruk hu pambuak tal, Hiệp hội Dit blong Malaysia hu payua panuac likau ma-ah ampuan urang takre dit blong kayua tok pablei 80.000 harak ka mbang dit chung kết lượt đi di Malaysia haong Việt Nam di sân Bukit Jalil.

# Khaw tin dunya:

# Tui hãng tin Reuters, harei 9/12, mentri Ngaoi giao Trung Quoc hu iew Đại sứ Mỹ Terry Branstad di negar ini mai piah phản đối khang bruk chap mek Phó Chủ tịch gam lac Giám đốc tài chính (CFO) di Tập đoàn viễn thông Huawei Mạnh Vãn Chu (Meng Wanzhou), saong daok hu panuac lac Mỹ brei padeih bruk chap urang nan. Muk Mạnh Vãn Chu njauk cap mek pak negar Canada harei 1/12, daok dang anak bruk ba tapa negar Mỹ, ngan saong dom panuac lac pacang padauk bruk pambuak gauk di cong ty muk saong sa doanh nghiep duah jaln pablei thiết bị ka Iran, oh huac di hukum taong phạt.

# Melam som, 10/12, tui tukvak Paris, Tổng thống Pháp Emmanuel Macron hu kadha vak ndom puac haong bhap bini Prang ka bruk di taneh ia, abih di nyu nan lac bruk biểu tình, trun jalan “Ao kanyik” daok ngak srau kadau taneh ia Prang dalam mrilo adit tapa.Tui panuac khan meng Phủ Tổng thống Prang, dalam harei som, ong Macron meda taom gaok lambaok dom kapul dân biểu, dom công đoàn jeng ye nghiệp đoàn giới chủ piah duah tabiak jalan langyah ka bruk urak ini di taneh ia Prang. Tapa rilo urang ngak praong di rajaei Prang, ong Macron brei thau, dalam adit ini, ong meda ba tabiak dom jalan ngak khang piah tamat abih bruk srau kadau “Ao kanyik” daok ba tal oh tani tanat taneh ia Prang urak ini.

# Tui kuhria mboh birau di abih di Liên minh Viễn thông dunya di Liên hợp quốc, jaik 4 tỉ menuac daok pandar Internet, tui nan hu makna lac mbang camereip labaih meteh menuac sia dunya pandar mạng trực tuyến. Kadha ini brei mboh sa jalan nao hu makna praong pamaong tal sa xa hoi thong tin praong dalam angaok dunya, yaom lac daok hu biak rilo urang di dunya daok cang taduan hu kein laba meng bruk ngak kinh te so yau nan./.