# Hajan praong dalam rilo harei tapa ngak glut jaleih, ia dauk di rilo labik angaok jalan radaih pui Bắc - Nam tapa ban sit Đà Nẵng saong dom tỉnh Quảng Nam, Quảng Ngãi, Bình Định. Meng kham merat di gah jalan pasei, tal 1 tuk page mesup harei 11/12, jalan pasei Bắc - Nam radaih pui nduac nao mai hu veik. Pasak kuhria mboh dahlau Khí tượng Thủy văn Negar brei thau: harei saong melam 11/12, kayua lingik la-an tagok khang nan ye dom tỉnh meng Nghệ An tal Quảng Ngãi hu hajan mbiah, hajan praong, hu labik hajan biak praong, daok dom tỉnh meng Quảng Bình tal Quảng Ngãi hu labik hajan labaih 150mm. Meng harei 14/12, kayua pambuak haong đới gió Đông angaok glaong nan ye hajan praong rilo labik di dom tỉnh Trung Trung Bộ meda dui atah saong hu hajan tal tỉnh Khánh Hòa. Dalam dom harei anak tal, ia sua angaok dom kraong meng Quảng Bình tal Phú Yên meda tagok veik. Tui nan, mbuan hu ia sua khang, glut jaleih taneh di bhum ceik, dauk ia di bhum taneh dhaong saong dom đô thị di dom tỉnh meng Quảng Bình tal Phú Yên. 

# 47 kapul, 238 urang hu mbaok tame harei pataom pakacah Palak tangin ameh kuah katak cao su thun 2018 rah tabiak meng harei 8 tal harei 11-12 di Nông trường Cẩm Đường, Tổng Công ty Cao su Đồng Nai (tỉnh Đồng Nai) ngan saong kadha: “Joi lý thuyết – Naih ngak – Paglaong tangin ngak bruk - Năng suất glaong jang”.  Lingiu di bruk jao giải ka dom kapul, dom urang tui yaom jien abih tih lac jaik 1 tỷ đồng, kadha bahrau di harei pataom pakacah thun ini, lac bruk pok meyaom dom kalup kapul 2 tấn sa hecta saong urang mek hu giải glaong di dom mbnag pakacah meng thun 2006 tal thun 2017. 

  # Tui Công an tỉnh Kiên Giang, tapa pasang iek dalam tỉnh, hu mboh 54 kapul nyaom, 325 urang brei mesraiy oh padang drap ar, bruk tín dụng đen dauk dalam angan công ty dịch vụ jien padai, daong brei mesraiy. Anak bruk nan, meng bilan 6/2018, Công an tỉnh hu peih ngak rilo jalan đấu tranh haong kol brei mesraiy trak laba, mbang pah ndok sraiy, peih dom mbang tấn công, trấn áp, khik kajap an ninh, trật tự xã hội dalam tỉnh.

# Thun 2018, UBMT negar gam saong  Bộ đội Biên phòng Sóc Trăng hu pambuak gauk padang ngak rilo bruk daong ka bhap bini bnagsa takik ngak mbang tabiak truh kan kathaot, ba gauk padang ngak palei pala bahrau. Yau ye bruk brei ka sang kan kathaot mesraiy jien blei limo binao mai raong ka 40 baoh sang daok di 3 palei dalam huyện Cù Lao Dung, Trần Đề saong ban sit Vĩnh Châu. Abih tih yaom jien blei limo ka bhap bini lac labaih 750 triệu đồng. Bruk daok pamaong tal nan lac tal puac thun 2020 hu 40 baoh sang tabiak truh kan kathaot khang kajap.

# Tui maong mboh di darak pasar kaya nong, yaom amriak kalu daok yam tame mbang trun yaom meng 1.000 - 2.000 đồng sa kg tui labik. Di darak pasar Đông Nam Bộ saong Tây Nguyên,  yaom amriak kalu lac 53.000 đồng sa kg.  Dreih yau nan, di bhum Đông Nam Bộ, yaom amriak kalu di dom tỉnh jeng daok trun meng 1.000 - 2.000 đồng sa kg, min di tỉnh Bà Rịa - Vũng Tàu, yaom amriak kalu oh trun, daok hu pablei yaom 55.000 đồng sa kg.

# Trung Quốc bahrau hu panuac cảnh báo Canađa ka dom kadha oh siam meda rah tabiak meng bruk cap mek Giám đốc tài chính di Tập đoàn viễn thông Trung Quốc Hoa-uây (Huawei) Mạnh Vãn Chu tui panuac caong di Mỹ. Urang brei panuac di Mintri Ngoại giao Trung Quốc Lục Khảng jeng hu panuac lac, bruk cap mek amuk Mạnh Vãn Chu lac bruk ngak suan praong tal dom quyền saong lợi ích njauk adat hukum di urang ini.

# Rajaei Anh oh ka brei peih bruk buh phiếu ka thỏa thuận Brexit di Quốc hội. Thủ tướng Anh daok caong lac bruk oh ka brei buh phiếu meda daong ka amuk hu rilo tukvak jang piah duah dom nhượng bộ karei meng Liên minh châu Âu piah ngak njauk hatai menuac sia taneh ia Anh, tuk amuk meda nao hu mbaok dalam sa mbang nyaom haong Hội đồng châu Âu harei 13/12 tal piah duah bruk pachreih tui.

# Mbaik tatua jalan pasei atah abih dunya di Trung Quốc daok dalam tỉnh Vân Nam hu hợp long di harei 10/12. Mbaik tatua nao tapa Nộ Giang ini daok dalam danak dak padang ngak jalan pasei dunya di Trung Quốc saong Mi-an-ma (Myanmar). Mbaik tatua ini atah labaih 1 ribau mét, gar praong 24,9m, hu padang ngak brei 4 đoàn tàu tame bến sa mbang haong gauk jeng hu, dut glaong meng mbaok ia kraong tagok tal mbaok tatua lac 211m. Dom pasei piah ngak tatua ini, lac 46 ribau tấn./.