# Dalam danak dak ngak bruk di Đắk Lắk, harei 11/11, Tổng Bí thư, akaok negar Nguyễn Phú Trọng hu mbaok tame Harei Roya Jum pataom abih bhap bini dom buôn, palei xã Dur Kmăl (huyện Krông Ana). Tukvak tapa, mikva hu patagok ilamu đấu tranh cách mạng anh hùng, pambuak haong ngak siam jalan ngak, sarak di Đảng mek hu jak jeng praong di taong abih gah, abih di nyu nan lac gah kinh tế - xã hội, ilamu, pato megru, padang ngak palei pala bahrau. Tổng Bí thư, Akaok negar caong khin mikva dom xã, di dom, buôn, palei..., kham merat jang piah piah ba gauk dak padang sa harei hadei siam mekre jang.

# Meng harei 18 tal 23/11/2018, di palei ilimo – Du lịch dom bangsa Việt Nam (Đồng Mô, Sơn Tây, Hà Nội), mintri ilimo –padhih saong Du lịch pambuak bruk saong Trung ương Mặt trận negar Việt Nam meda peih adit “ jum pataom bangsa –inem krung ilimo Việt Nam” thun 2018, hu mbaok di jaik 200 bhapbini, nghệ sĩ, diễn viên di 15 bangsa mai meng 13 tỉnh, ban dalam taneh ia. Ini lac bruk hu peih ngak yaok thun piah pok je inem krung ilimo dom bangsa Việt Nam, paglaong bruk taom gaok ilimo, rik daong paglaong pren khang jum pataom bangsa, patagok du lịch di baoh sang praong di bhapbini 54 bangsa Việt Nam.

# Meng akaok thun tal ini, Sở Lao động-Thương binh saong Xã hội tỉnh Ninh Thuận hu peih dom mbang giao dịch bruk ngak saong brei panuac tacei jalan ka bruk nao ngak di negar lingiu ka jaik 5.400 urang ngak, dalam nan hu 167 urang nao ngak bruk di negar lingiu, tagok 45 % dut saong tukvak ini thun bloh saong rilo jang 39, % bruk ba tabiak dalam thun. Tui kuhria tal puac thun meda ba labaih 175 urang nao ngak bruk di negar lingiu. Gam saong nan, tỉnh jeng hu ba bruk ngak bahrau ka jaik 14.000 urang ngak. Urang ngak rilo meng nao ngak bruk di dom taneh ia lac: Nhật Bản, Hàn Quốc, Ả rập Xê út, Malaysia... Bruk ngak tani tanat gam saong dom sarak sangka, iek glang tal urang ngak hadei di tuk ngak salah bruk veik mai taneh ia nan ye pachreih hu rilo urang ngak dalam tỉnh tut angan tame. 

# Urak ini, dom tapon athur di huyện Hàm Thuận Bắc, tỉnh Bình Thuận hu jaik 65.000 drei, tagok labaih 5% duk saong dom bilan ini thun dahlau. Dom tapol athur di dom xã, ban sit tagok glaong, meng yaom blei athur glaong, pandap mbang ka athur biak tani tanat, pachreih rilo sang raong. Gam saong nan, huyện pachreih patagok raong glang tui jalan trang trại, gia trại. Lingiu di nan, gah raong glang tỉnh hu patagok bruk klauk caga jit ruak di tapol athur, daong sang raong glang pacang jit ruak di var raong, trại, oh caik ka jit ruak rah tabiak.

#  Bahrau ini, di ban sit Vũng Tàu, Liên đoàn Lao động tỉnh pambuak bruk haong Hội Chữ thập đỏ tỉnh, Pasak Truyền máu Bệnh viện Chợ Rẫy (TP.Hồ Chí Minh) peih bruk halan hatian brei darah mbang ka 3 thun 2018. Mbang brei darah ini, jaik 300 công nhân viên chức, urang ngak di Liên đoàn Lao động TP.Vũng Tàu,  hu mbaok tame. Tapa nan, Pasak Truyền máu Bệnh viện Chợ Rẫy mek hu 251 đơn vị darah. Meng akaok thun 2018 mbiah tal ini, labaih 1.000 CNVCLĐ dalam tỉnh hu brei darah, tapa nan pataom mek hu  1.064 đơn vị darah 

Khaw tin dunya:

# Sa sruh kapal ahaok Bô-inh 737-800 di hãng kapal ahaok Nốt-xta (Nordstar), Nga njauk par trun chip di mblang par ban Nô-rin-xcơ (Norilsk) kayua sự cố kỹ thuật. Sruh kapal ahaok par trun chip di tukvak 2 tuk 15 minit, harei 12/11 (tukvak Nga) tuk daok par di jalan meng Đô-mô-đê-đô-vô (Domodedovo) nao Nô-rin-xcơ. Tuk sruh kapal ahaok daok par trun jaik tal haluk, bộ phận cảm biến hu chức năng peih praong nắp kapal ahaok nyu jaik peih tabiak. Min, sruh kapal ahaok gaok mbaok haluk hu siam mekre. Di tukvak rah tabiak bruk nan, angaok sruh kapal ahaok hu 186 urang tuai saong 6 phi hành đoàn.

# Hạm đội phương Bắc di Nga brei thau, bruk tập trận hải quân pacang meblah tasik di taneh ia ini haong Nhật Bản daok peih tabiak di Vịnh Aden. Tui panuac khan di Hạm đội phương Bắc, bruk tập trận haong gauk ini piah patagok talei pambuak bruk di dom kapal mesruh di Nga saong Nhật Bản dalam bruk mesruh pacang meblah tasik saong pacang khủng bố. Kapal chống ngầm praong Severomorsk di Nga saong kapal khu trục Ikazuchi di Nhật Bản jeng hu mgbaok dalam mbang pasram ini.

  # Sa roh duah ka tỷ lệ urang metai kayua ung thư kalik di 18 taneh ia karei di gauk di dunya barau brei thau: 8 dalam abih tih 18 taneh ia hu peih bruk pasang iek, dom urang metai kayua ung thư kalik di urang likei tagok takik di abih lac 50% dalam labaih 30 thun tapa, dalam nan di dua taneh ia Ai-len (Ireland) saong Croát-ti-a (Croatia) tagok jaik dua mbang, di Tây Ban Nha saong Anh tagok 70%, Hà Lan tagok  60%, Pháp saong Bỉ tagok 50%. Tui pasak pasang iek jit ruak Mỹ, labaih 90% dom urang ruak ung thư kalik jeng kayua dom tế bào kalik tổn thương kayua gaok pandiak atau dom nguồn tia cực tím (UV) karei. Dalam nan, dom urang metai kayua ung thư kalik di urang kumei tok tagok hasit atau hu tuk trun, cagar veik haong tỷ lệ di urang likei ./.