Viêm talang khớp lac ruak gah khớp ngak kan kandah tal sụn. Sụn lac mô trơn gum dom labik akaok talang di khớp. Sụn khang kajap daong ngak brei dom talang trượt tapa gauk. Sụn jeng hu daong ngak patrun sốc vận động.. Tuk njauk viêm talang khớp, tal angaok di sụn nyu talah saong lipih nao. Bruk ini ngak ka dom talang ala sụn gaok tame gauk.

Bruk gaok tame gauk yau nan nyu ngak brei pandik, brah saong oh cử động khớp hu. Tui tukvak, khớp meda lahik nao hình dạng tuk camereip di nyu. Langiu di nan, dom darui talang jeng meda tamuh tagok angaok dom cạnh khớp. Dom candaih talang atau sụn meda tapaok tabiak saong seik gah dalam di dua akaok ngak brei pandik saong thương tổn ralo jang.

Jalan khik caga talang khớp

Caik hatai dom jalan ngak yau ini:

 Mbang menyum ginup

Urang Yuan hu panuac lac “thực túc thì binh cường”. Makna di nyu lac tuk mbang menyum ginup, rup pabhap hu khang kadang. Mbang ginup brei hu 4 nhóm janih lac: đạm, saradang, limek, vitamin saong khoáng chất. Đạm njauk mbang lac ralo nạc yau ralo pabui , limo, menuk, ada, ada kangar, ikan, hadang, rieng, baoh, ia tasau. Janih saradang njauk mbang lac brah, tangei, baoh bei, dom janih ratak, dalam nan, brah jhui chai patih ralo meda ngak lahik dom janih bổ. Janih limek siam ka pren yava lac janih limek dalam ikan saong kaya ikan, dom janih menyek thực vật pandar piah cuh pandap mbang. Jui mbang rilo limek động vật. Janih limek dalm kaya ikan daok hu ralo omega-3, omega-6 biak siam ka talang khớp saong tim mạch. Vitamin saong khoáng chất hu rilo dalam njam patam, baoh karoh, baoh kayau tasak. Dalam nan, brei caik hatai pabak dom vi chất yau canxi, vitamin C, D, ikan, dom janih asar, njam patam, mbang ralo baoh kayau, menyum ia sau… Patakik dom janih kích thích yau alak, cà phê, ia tea, pandap mbang biak mesam, biak mbak… Urang ruak brei caik hatai khik kajap cân nặng mbiah lagaih piah klah labaih kilo limek nyu kateik trak tagok dom khớp. 

Megei nao mai sit sit

Anak meta mboh lac, tuk pandik talang khớp, urang ruak oh khin megei nao mai ba tal dom khớp tê khang saong ruak dak trak jang. Piah nyaik bruk ini, urang ruak brei megei nao mai sit sit piah khớp hu khik caga siam jang, mô sụn hu jalan hấp thu dưỡng chất meng dịch khớp. Urang ruak meda pasram dom môn: khí công dưỡng sinh, khiêu vũ, nao takai… tui tacei pato di bác sĩ iek gah phục hồi chức năng.

Jhui eng drei nao blei jru mai menyum

Meyah khớp pandik, urang ruak brei nao khám piah hu tacei pato iek ruak njauk. Oh eng drei nao blei jru cadu pandik atau jru halei karei mai menyum. Jui pandar thực phẩm chức năng, dom pandap tui panuac di urang kayua mbuan ngak brei lihik jien min oh abih ruak saong ngak lahik cơ hội iek ruak avar./.