Mikva saong taong abih gauk anit ranam! Cồng chiêng lac janih biak ginreih saong hu yaom glaong dalam raidiuk di dom bangsa takik daok di Trường Sơn – Tây Nguyên, abih di nyu nan lac bangsa H’rê tỉnh Quảng Ngãi. Kadha “dom bangsa adei sa-ai” harei ini, hu kadha vak brei thau ka labik dang praong di janih alat ragam ginreih nan, da-a mikva saong taong abih gauk tui pang.

Urang H’rê ieu chiêng lac chinh saong bhian pandar bộ chiêng 3 baoh. Dom sang urang H’rê hu cồng chiêng, maong janih alat ragam ini yau sa urang dalam sang saong hu khik piah di labik siam di abih.

Nghệ nhân Đinh Văn Rút daok di ban sit Ba Tơ, huyện Ba Tơ brei thau: "Chiêng hu labik dang biak praong saong oh kurang hu dalam dom rija, roya, dom harei me-in bui sambai di urang H’rê. Ngan haong urang H’rê, meng bruk caik angan ka anek kamar tal bruk likhah caga, padang ngak sang, rija, roya… oh tuk halei kurang hu alak tapai haong sap di cồng chiêng".

Yaok thun, tuk tame rija, roya atau harei likhah caga,... urang H’rê jeng peih ngak adat cúng chiêng biak praong prang. Urang sahneng lac, chiêng jeng hu suan yava yau anek menuac, dom bộ chiêng quý, chiêng gheih nan lac dom bộ chiêng hu bruk pacang khik di Pô Yang. Yaok baoh sang, yaok puk palei hu bruk pandar tal chiêng brei ngak adat cúng chiêng likau di Yang, saong likau Yang daong ka suan yava di chiêng hu bui sambai, khang kajap.

Nhạc sĩ Đinh Thiên Vương, tỉnh Quảng Ngãi, brei thau: "Lingiu bruk lac ragu ragam, dom sap yava di chiêng daok brei mboh hatung hatian, brei mboh hatai caong di anek menuac. Ngan haong urang H’rê, chiêng pambuak pagam haong urang yau lisei huak, ia menyum yaok harei saong kak kajap haong yaok menuac tal abih rai".

Urak ini, hu rilo janih me-in nan ye nyu ngak kan kandah tal bruk roh duah, khik ramik saong patagok ilamu meng kan, caik ka gah khik ramik ilamu brei kham merat jang saong hu dom jalan ngak samu gauk, piah khik ramik saong patagok yaom glaong ilamu meng kan jeng ye ilamu cồng chiêng di urang H’rê.

Ong Cao Văn Chư, Phaok akaok Sở Ilamu - Thể thao saong Du lịch Quảng Ngãi brei thau: "Kol dahlak sangka khik ramik saong patagok yaom glaong ilamu cồng chiêng di urang H’rê jeng yau dom bangsa takik daok di Quảng Ngãi. Piah khik ramik dom yaom glaong ilamu di dom bangsa takik, brei hu bruk ba tangin tame di taong abih menuac sia, oh lac ta-eng dom urang ngak bruk khik ramik. Kayua yau nan ye, kol dahlak pathau khan, jak ba bhap bini paglaong akaok sahneng khik ramik saong patagok dom yaom glaong ilamu di bangsa drei".

Chiêng oh lac alat ragam saoh bo nyu daok lac drap ar biak hu yaom glaong di baoh sang saong di bhap bini urang H’rê daok di dom huyện bhum glaong Quảng Ngãi. Dom bộ chiêng hu sap chuẩn hu khik ramik siam saong hu caik veik dak livik rai dak hu yaom glaong. Tuk bhap bini H’rê tame rija, roya, sap chiêng dane tagok di kreh ceik glai pang mboh chreih chrai, piah yam tame sa bilan pala bahrau ngan saong rilo siam mekre bahrau./.