Palei Cam daok di puk 4, xã Xuân Hưng, huyện Xuân Lộc daok di tapen jalan roya 1A, ngan haong dom baoh sang praong, siam, jalan bê tông hacih, makre, hu dom bingu pala rilo sambo mau. Raidiuk sron mbon, oh hu tệ nạn xã hội atau bruk labik an ninh trật tự....Taong abih lac meng hu bruk jum pataom, anit ranam gauk di mikva saong bruk kham merat Mban khik ramik sang magik Islam di puk 4, abih di nyu lac ong Hakim AbDo HaMid.

Lac urang hu angan je dalam rahra saong hu hatai saneng salih bahrau, ong AbDo HaMid hu daong ka mikva salih jalan saneng, jalan ngak piah yam tagok dalam raidiuk. Ong jak ba mikva salih phun pala, athur raong, pandar ilamo KT tame bruk ngak. Ong AbDo HaMid ndem lac:  “Dahlau deih mikva pala padai 6 bilan sa vu, hadei di ini ngak 3 bilan sa vu min nang suat oh glaong…”

Di puk 4,  xã Xuân Hưng, taong abih dom urang Cam daok pak ini jeng tui agama Islam, bruk ngak tui hukum Islam lac bruk pacap ngak. Min dom adat cambat, tanarakun oh daok lagaih haong zaman ini ye drei meda salih ka nyu lagaih. Meng jalan sahaneng yau nan, dalam tukvak tapa, ong AbDo HaMid hu pambuak haong karja palei sangka pathau khan tal mikva dom sarak bahrau di Đảng, hukum di kanja; jak ba mikva klaak nao dom bruk oh siam, oh lagaih. Ong AbDo HaMid tuk halei jeng saneng lac drei njauk ngak kreih camin, ba akaok nao dahlau piah ka mikva ngak tui: “mikva halei ngak suan ye drei kakei veik…”

Gam haong bruk rik daong di ong AbDo Hamid – Hakim Sang magik Islam puk 4 piah ka puk 4 hu cak rok patagok hu yau urak ini daok hu bruk rik prein di ong Mohamed Nooru Deen. Yaom lac umo praong min ong Nooru Deen tuk halei jeng nao gam haong mikva dalam yaok bruk kan kandah. Ong jak ba mikva jum pataom gauk, anit ranam gauk, daong brei ka gauk, sangka tal dom baoh sang sarak kanja, sang gaok kan kandah. Lac urang hu angan je, urang dalam UBMT negar VN huyện Xuân Lộc tukvak 2019-2024, ong Nooru Deen hu maong lac urang pambuak bruk khang kajhap di karja palei saong rahra dalam puk. Ong Deen tuk halei jeng mek bruk siam makre piah jak ba mikva sa hatung hatai haong gauk dak padang puk palei dak harei dak cak rok patagok: “Dahlak tuk halei jeng saneng lac drei brei ngak habar piah pambuak karja haong mikva, nan ye di dom harei jumaat dahlak jeng pablak tame dom danak dak piah pathau khan tal mikva meng sap Cam dom jalan ngak, sarak di Kanja piah ka mikva thau hu bruk cak rok patagok kinh tế di puk palei. Dahlak jeng caong hu prein yava khang kadang piah gam haong urang taha palei rik prein tame dak padang puk palei siam makre jang”.

Mai tal xã Bình Sơn, huyện Long Thành, tỉnh Đồng Nai, thei jeng thau tal ong Đô Hô Sên, lac urang hu labik dang praong dalam bruk khik ramik haroh cih di bangsa. Ong Đô Hô Sên khan lac, labaih piluh thun dahlau, mboh dom urang thau bac saong thau cih haroh Cam dak harei dak takik. Dahlak sahneng lac drei oh peih tal pato haroh ye oh suai lavik, sap ndem, panuac puac, akhar vak, haroh cih saong ilamo di bangsa drei jeng lahik nao.

Piah hu tal bac, ong Đô Hô Sên pathau khan haong karja xã blaoh likau daong tapuk, bút,, ban kik, dien truac hadah. Blaoh ong nao tal yaok sang jak ba dom amaik ame brei anek nao bac akhar haroh. Tuk camereip, tal bac tok hu 10 adei, min ong kham marat pato haroh Cam saong akhar Yuan ka dom adei. Mboh anek bhik di drei bac hu, cih jeng, rilo amaik ame, hu gam ong muk praong thun jeng likau tame bac. Urak ini di sang magik Cam hu 2 tal bac hu labaih 60 urang. Jien tapuk siphau, bút mực, giáo trình jeng kayua ong Đô Hô Sên nao jak ba dom urang ngak pahla daong brei. Labaih 10 thun kak kajap haong bruk ngak, ong Đô Hô Sên oh mek jien ndo hagait. Bruk bui sambai abih lac hatai khin di ong lac aharoh cih, dom yaom glaong ilamo di urang Cam oh lahik nao.

Mai tal dom palei Cam di Đồng Nai harei ini, yaok urang jeng hu mbaok bruk salih bahrau mbaok mata di puk palei. Dom jak jeng nan hu bruk kham merat rik daong di dom urang angan je. Meng angan je saong bruk ngak di drei, dom urang angan je tuk halei jeng kham marat ngak brei salih bahrau jalan sahaneng di mikva, salih bahrau mbaok mata di puk paga, dak padang puk palei dak harei dak siam makre, kaya meda jang./.