GRU PATO CAM BA AKHAN TAL TAL ANEK SAIH BANGSA CAM
Thứ năm, 06:30, 26/01/2023 Urang lang: Thu Thảo Urang lang: Thu Thảo
VOV4.VOV.VN - Di sang bac tiểu học Tân Hưng A, xã Tân Hưng, huyện Tân Châu, tỉnh Tây Ninh hu biak rilo rai anek saih hu bac daa haong dom cei gru, anai gru lac urang bangsa Cam.

Lac urang bangsa Cam, ndih tapui tabiak saong praong tagok di xã Tân Hưng, meng tuk daok sit, anai gru A Mi Ná hu hatai caong jeng anai gru piah ba akhar haroh mai pato ka dom adei di palei drei. Hatai caong hu jeng biak tuk anai pacacah tame hu khoa tiểu học di sang bac Đại học sư phạm Huế. Bac tamat blaoh, anai hu brei bruk pato di sang bac tiểu học xã Suối Dây, blaoh salih tapa pato di sang bac Tiểu học Tân Hưng A. Jaik abih tukvak ngak bruk, anai jeng ngak chủ nhiệm saong pato anek saih tal 1.

 Anek saih tal 1 rilo meng huac, kayua bahrau abih umo bac mẫu giáo, abih di nyu nan lac dom anek saih bangsa takik bhian gaok kan kandah lac ka oh thau sap Yuan, nan ye anai gru A Mi Ná tuk halei jeng duah rilo jalan pato piah ka dom adei thau cambaih, thau samar kadha bac. Anei khan lac, rilo anek saih bangsa oh hu bac mẫu giáo dahlau di tuk tame tal 1 nan ye ndem sap Yuan ka oh cambaih, tuk pato anai bhian pandar dom baoh panuac dalam sap Cam piah langyah tapa sap Yuan ka dom adei mbuan thau: “pato dom adei tal 1 biak kan, ngan haong dom adei bangsa Cam daok kan kandah jang…”

Dom anek saih bangsa takik rilo meng lac anek di sang kan kandah, nan ye hadei di tuk thau bac, thau vak sap Yuan, rilo adei njauk klaak bac piah daok di sang daong ka amaik ame. Piah patakik bruk klaak bac ini, anai gru A Mi Ná bhian nao tal yaok baoh sang anek saih piah duah thau bruk di yaok baoh sang, blaoh meng nan hu jalan jak ba dom adei nao bac: “rilo adei tal 4,5 sang gaok kan kandah lac dom adei padeih bac…”

Jeng deih yau anai gru A Mi Ná, cei gru Chàm Ên kak kajap haong bruk pato bac hu labaih 30 thun ngan haong hatai caong khin lac anek saih bangsa Cam oh var sap ndem, panuac puac, akhar vak, haroh cih saong ilamo di bangsa drei. Lac cei gru pato  dua - dua sap Yuan-Cam di sang bac tiểu học Tân Hưng A, cei gru brei thau lac, bruk bui sambai praong abih di cei gru lac uranaih bangsa Cam thau bac, thau cih vak sap Yuan, naih joi sap Cam saong bac naih danak dak dalam tapuk siphau. Piah pachreih dom adei thau samar saong mbuan bac, dalam dom kadha pato di drei, cei gru Chàm Ên pablak tame nan dom bruk ka raidiuk yaok harei, ka adat cambat, tanarakun di bangsa Cam. Min, bruk bo cei gru Chàm Ên mboh suh sah rilo abih, nan lac kurang tapuk siphau pato dua – dua sap Yuan – Cam: “pato sap Cam, gam sap Yuan di sang bac ye dalam danak dak ka oh hu tapuk bahrau…”

Langiu di bruk lac sa cei gru abih hatai ka anek saih, cei gru Chàm Ên daok lac Chánh Văn phòng Mban lambaok urang Islam tỉnh Tây Ninh; saong lac Thư ký di Mban khik ramik Sang magik Nou Rul Islam di puk Tân Trung A. Meng angan je di drei dalam rahra, cei gru Chàm Ên tuk halei jeng hu dom bruk ngak daong ka mikva gaok kan kandah, jak ba mikva diukrai siam ka dunya, mekre ka agama: “Gah rahra Islam tinh ye drei lac talei pambuak haong kanja daong ka mikva bangsa Cam gaok kan kandah…”

Cei gru hiệu trưởng Lê Văn Bảo brei thau, rilo thun gam, sang bac Tiểu học Tân Hưng A hu pok brei angan lac kapul lao động tiên tiến. Taong abih dom cei gru, anai gru jeng mek hu tanut chuẩn gru pato tiểu học.  Thun 2017, sang bac hu pok brei angan lac mek hu tanut chuan pakat negar. Dalam jak jeng ini, hu bruk rik prein tame oh sit di dom cei gru, anai gru urang Cam:“Bruk rik daong di cei gru, anai gru biak praong ka dom adei bangs. Kayua jaik 30% lac anek saih bangsa Cam, pato dua – dua sap ka dom adei piah ka dom adei gam khik hu sap Cam saong thau sap Yuan hu mbuan jang. Meng nan bruk klaak bac, padeih bac oh daok. Bruk rik daong di dom cei gru, anai gru hu pabak hatai jia ka anek saih saong amaik ame. Abih di nyu nan lac tuk hu jit ruak COVID-19, cei gru, anai gru jeng abih drei hu mbaok, oh huac di glaih glar, kan kandah halei”.

Meng bruk kham marat, abih drei haong bruk pato pakai saong bruk sangka raidiuk ka anek saih bangsa Cam, anai gru A Mi Ná saong cei gru Chàm Ên tuk halei jeng hu mikva anit ranam, karja palei jia tame. Abih di nyu nan lac, cei gru, anai gru lac dom gru pato naih gheih, lac kreih camin hadah piah ka dom adei anek saih Cam bac taa, ngak tui./.  

Urang lang: Thu Thảo

Viết bình luận

TIN CÙNG CHUYÊN MỤC