Thun 2009, sa-ai Toán tok pasang. Lac anek kumei taluac, sa-ai hu brei daok veik sang di amaik ame tui njauk adat cambat tanarakun di urang Cam. Taduan mek tapol pabo 50 drei di amaik ame, sa-ai Toán nao mesre 150 triệu đồng piah blei 50 drei pabo tra. Meng labik njauk pah taneh piah raong pabo, sa thun hadei, sa-ai blei hu mblang taneh klak balau 2ha daok taphia palei piah hu labik raong palao tapol pabo.

Tuk tapol pabo caih menek, pabo pablei hu, sa-ai Toán mek hu phun jien veik dalam 3 thun. Meng thun ka 4, yaok thun, sa-ai mek jien tame hu jaik 100 triệu đồng meng pablei tapon pabo.

“Langik pandiak, thu lac lagaih ka pabo caih menek saong praong tagok. Pandap mbang brei ka pabo lac hareik. Urak ini, tapol pabo di sang dahlak bhian hu 150 drei”- sa-ai Toán brei thau yau nan.

Pah dua urang daok veik van ro glang pabo, yaok harei sa-ai Toán caik tabiak jaik 2 mon piah tabiak mong iek tapol pabo. Sang sa-ai Toán daok dalam palei, atah labik raong pabo jaik 3km. Tuk pabo prong meda mek ralaow, urang pablei salih mai tal van ro piah blei.

Tui sa-ai Toán, yaom pabo raloaw thun ini glaong jang dahlau biak rilo. Meyah tuk jit ruak Covid, yaom pabo raloaw jaik 90.000đ/kg ye urak ini tagok tal 130.000-135.000đ/kg. Kuhria rah tapa, 4 bilan pabo pablei hu sa mbang.

Hu jien mek tame meng pabo, thun 2013, sa-ai Toán pah taneh ngak padai blaoh blei klaoh 2ha taneh ngak nong nan haong yaom 50 triệu đồng piah ngak padai. Bruk pala drak ini, sa-ai jeng pah manuac ngak. Yaok thun, ngak hu dua mbang padai. Kaoh abih jien buh tame saong jien pah urang ngak, sa-ai Toán daok laba hu 100 triệu đồng yaok thun.

Oh padeih di nan, atah di ini 2 thun, urang kamei Cam tari tareng saong naih jioy ini khang hatai buh jien tame ngak điện aia harei atau daok iew lac điện ấp mái yau panuac ndom bui di sa-ai “pandiak di  Ninh Thuận lac đặc sản”.

“Tuk hu phun jien jaik 1 tỷ đồng, dahlak mesre di gilang pariak 1 tỷ tra piah buh tame ngak điện ấp mái blaoh pablei ka công ty điện lực. Ini lac, binah jien mek tame glaong abih di sang sa-ai ngan haong jaik 40 triệu đồng/bilan. Urak ini, dahlak ngak điện hu 2 thun. Dom harei padiak rilo, meda mek tame hu 1,5 triệu đồng meng điện”. Sa-ai Toán bui sambai brei thau yau nan.

5 sào taneh ngak nong hu sa-ai Toán buh jien tame ngak labik ngak tabiak điện ấp mái. Gah ala sa-ai kuac danao raong ikan, raong menuk, ada.  

 Yau nan, kuhria abih 3 janih jien mek tame, sang sa-ai Toán yaok thun hu meng 700-750 triệu đồng. Sang sa-ai blei tame rilo pandap panda hu yaom glaong, hu radaih ô tô. Sa-ai brei 2 urang anek (tal 8 saong tal 4) tame ban Phan Rang - Tháp Chàm bac da-a yaom lac atah di sang labaih 10km piah ka dom anek hu labik bac daa siam jang.

Dom baoh sang urang Cam yau sa-ai Toán di xã Xuân Hải, huyện Ninh Hải urak ini oh lac takik. Phaok akaok UBND xã Xuân Hải, amuk Nguyễn Thị Thanh Dịp brei thau: "Xã Xuân Hải hu labaih 19.000 menuac, daok di 9 palei, dalam nan hu 4 palei urang Chăm hu jaik 10.000 urang. Dahlau diah, urang Cam raong limo min langik tasik, taneh riya di labik ini laghaih ka pabo, nan ye urang Cam salih tapa raong pabo kayua jien mek tame glaong jang."   

Daok sa-ai Toán, Phaok akaok UBND xã Xuân Hải chreih chrai yaih khan lac: “sa-ai Toán biak naih jioy ngak mbang, ngak brei dom kan kandah di langik tasik jeng siam lagaih piah ngak kaya meda. Sa-ai Toán jeng abih hatai rik daong tame dom bruk di puk palei. Sa-ai buh tabiak sa pok jien piah ngak kadung jien pachreih bac ka sang bac tiểu học palei  An Nhơn”

Sa-ai Đạo Thị Thanh Toán lac sa dalam dom kareih camin urang nong hu rilo rik daong ka puk palei. Thun 2021, xã Xuân Hải lac xã palei pala bahrau paglaong saong daok kham merat jeng xã palei pala bahrau kiểu mẫu. Baoh sang kathaot di labik ini biak takik, tok meblah 2,46%.