Tuk raidiuk cakrok, bruk taom gaok saong lai srau ilamu dak harei dak rah tabiak khang, ye bruk khik ramik dom ilamu siam mekre dalam mbang huak, daok dang yaok harei di dom bangsa dak hu yaom biak praong. Di palei 1, xã Đưng K’Nớ, huyện Lạc Dương (Lâm Đồng) hu sa urang kumei hu caik abih rai di drei piah khik bruk menyim khan bai, khik ramik dom ilamu siam mekre dalam yaok bingu la angaok khan ao di bhap bini K’Ho di labik ceik glai praong.

Umo 72 thun, tapen pabah mbang sang kayau, nghệ nhân K’Chiên (palei 1, xã Đưng K’Nớ, huyện Lạc Dương, tinh Lâm Đồng) daok ba abih drei tame menyim khan bai dalam tuk lingik hajan khang.  Dua plak tangin taha klik kacuh daok samar ba haluak nao mai, meta oh luai maong tame “tành ùi” (lac kik menyim hu ngak meng dom mbaik lồ ô kuah jangaih). Amuk K’Chiên khan lac, tuk daok sit, amuk hu thau bruk menyim kahn bai meng amaik saong amuk. Tuk umo 15 thun, amuk menyim hu khan, ao, phui saong  blah “ùi”. Saman di amuk, dom kumei dara K’Ho dalam palei thei jeng thau menyim. Raidiuk kan kandah, jalan nao mai jeng biak kan kandah, urang kumei dalam sang lingiu bruk tagok hamu, ngak puh, daok brei thau menyim khan bai ngak khan ao cuk ka abih menuac dalam sang. Abih bruk meng pala kapah, dui merai, njom merai (meng katak kayau glai) tal giăng sợi, bloh menyim jeng dom blah ùi gar 1,2 m (samu 1 sải tangin), daok atah hadom ye tui bruk pandar (yau ye ngak khan, ao, phui mesam, ùi bak anek...). Kadha praong abih lac menyim, brei caik hatai sangka tuk menyim piah khik ka nyu samu, mekre, kajap, saong bingu la angaok blah khan jeng ngak brei mekre blah khan bai. Tangin daok menyim, nghệ nhân K’Chiên  daok caik hatai sangka tal jhih khan, tal labik njauk trun - tagok, piah ngak ka dom rak merai bhong, kanyik (tượng trưng ka ia harei  saong pandiak ia harei) ndaong tagok angaok blah khan sambo hijao đậm (yau ye sambo di ceik glai). 

          Tacei tangin tame kik menyim, nghệ nhân K’Chiến lac: “Labaih 1 adit bo bahrau menyim hu du ini min, suai lô”. Daok di kreh ceik glai, bilan hajan di Đưng K’Nớ  hajan harei hajan melam,hajan patih lingik, me-om bak ceik glai tok daok mboh lingik haong ia, oh thei tagok puh hu, oh thei tabiak truh sang piah ngak bruk karei hu. Meng saman oh ka mek pasang, bilan hajan K’Chiên jeng daok menyim, abih harei ini tapa harei daih, dui atah dalam 6 bilan.  Tal tuk hu pasang, hu anek, amuk menyim khan bai piah ngak khan ao ka pasang, ka anek, daok urak ini amuk menyim piah thei khin ye pablei. Daok la menyim miat min sa adit hu oh ka tal 1 m. Piah ngak hu sa blah khan bai ye abih jaik sa bilan, pablei hu jaik 800 ribau tal 1 triệu đồng. Urak ini hu sợi công nghiệp, oh daok glaih pala kapah, dui merai, nhuộm merai. Nghệ nhân K’Chiên mboh lac: Sợi công nghiệp hu ngak meng jamriak nan ye nyu samu, mekre, kajap, ngak brei mekre jang blah khan bai meng kan. Ngak jeng blah khan bai abih rilo pren yava, abih rilo sahneng kuhria, hu takik menuac meriak gauk, min khan bai di nghệ nhân K’Chiên yaom lac hu rilo urang takre min oh lac mbuan pablei.

Dalam labaih 10 urang anek saong taco kumei di amuk K’Chiên, tok hu dom urang bac menyim, min oh thei khin ngak bruk ini. Thei jeng lac, khin cuk, ye nao ngak puh duah jien blei khan ao jhik bloh, biak lagaih.. Dalam puk palei, dom nghệ nhân gheih tangin, anit ka bruk ngak yau amuk  K’Chiên hu biak takik, tok hu dom urang umo  50 - 60 lac thau menyim, min biak takik urang abih hatai haong bruk blah “tành ùi”. Amuk K’Chiên drut drui hadar veik:  Saman dahlau, jalan tame palei biak kan nao mai, njauk nao tapa Cổng Trời, puk palei daok di kreh glai ram, ceik glaong, nan ye likei kumei dalam palei, urang taha, uraniah thei jeng cuk khan ao ngak meng khan bai, yaok urang dom bộ. Rilo bộ khan bai cuk biak livik, meteh rai menuac meng tahak... Urak ini, khan ao jeng sa janih pandap “xa xỉ”, yaok thun cuk sa mbang di tuk lễ, Tết, me-in sambai, urang thau menyim ye menyim piah cuk, urang oh thau menyim ye oh lac urang halei jeng blei. 

          Dalam lingik hajan khang, amuk K’Chiên jeng daok ba drei tame bruk menyim, sa drei, anek taco sa urang sa bruk ngak. Anit “tành ùi”, ranam khan bai, amuk jeng daok khik bruk ngak, tapa nan jeng ngak ka amuk hu bui sambai tuk umo taha. Amuk tuk halei jeng caong khin tuk amuk ba blah “tành ùi” tabiak menyim, dom anek taco pataom mai vil val amuk, piah amuk hu pato ilamu di bruk menyim, yau saman dahlau tuk daok dara amuk ngak yau nan, daok tapen amuk saong amaik./.