Mbluak jang urang karei, dom urang anek di bangsa Cam tuk halei jeng suh sah ka bruk ngak habar piah khik ramik saong patagok ilamu meng kan tapa dom bruk pataom gauk daoh tamia, paneh kadha daoh. Min, urak ini bruk ngak ilamu nghe thuat, abih di nyu nan lac daoh tamia bhap bini Cam jeng yau dom bangsa takik karei karei di Ban raya Ho Chi Minh dak harei dak takik. Ong Quảng Đại Hội- gru pato sang bac Đại học Ban Gon dahlau diah, lac urang paneh kadha daoh Lakhah hu mikva bhap bini Cam biak takre, khan lac: “ Dom urang paneh kadha daoh Cam, meyah hu vak ye jeng oh hu labik piah patagok…"

Dom thun dahlau, kapul daoh tamia bangsa Cam quan Phu Nhuan, quan 8 daok ngak bruk  dalam chreih chrai min urak ini mboh ladam trun, kapul Hương Champa di quan 5 lavik  lavik meng mboh tagok daok tamia. Nghệ nhân Đàng Quang Dũng, Akok khoa thẩm mỹ nghệ thuật, Sang Uranaih quận 5, Ban raya Ho Chi Minh, lac urang padang kapul daoh tamia Cam “ Hương Champa” khan lac: Dahlak bhian padang ngak dom danak dak daoh tamia bangsa Cam ka dom rayo papar sap papar binguk, dom danak dak  uan raok harei pahadar, roya praong, tabiak CD, DVD, padang tabiak saong khik ramik kapul Hương Champa, caong piah khik ramik kadha daoh saong kadha tamia bangsa Cam. Sa-ai tuk halei jeng haduh hatai lac hu biak takik urang Cam tui bac gah nghe thuat tapa sang bac, tal bac. Kapul Hương Champa, urak ini daok ngak bruk hu 25 adei min dalam nan hu tal 90% adei bangsa Kinh. " Dahlak caong khin hu rilo anek bangsa Cam bac gah ndao yien piah meda harei meda ngak siam ilamu daoh tamia Cam...."

Jeng anit ranam ilamu bangsa, abih hatai ka dom bruk khik ramik saong patagok daoh tamia bhap bini Cam jeng yau dom bangsa karei, Thac si Đàng Năng Hòa, gru pato Sang bac Đại học mở, Akok dhar kapul  Bangsa Cam di  Hoi Dân tộc học Ban raya Ho Chi Minh hu rilo thun ngak bruk gah ilamu nghe thuat  ini. Sa-ai Hòa brei thau: Dhar kapul bangsa Cam yaok thun hu peih bruk daoh tamia harei Kate – Ramưwan Cam. Di ini, dom sinh viên, nghe nhan bangsa Cam hu daoh tamia bhap bini Cam..rik tame khik ramik saong patagok ilamu bangsa drei. Mbiah tal ini, dhar kapul  peih ngak hu 11 mbang Kate – Ramưwan. "Sa-ai Hòa sahaneng brei Kapul bangsa Cam njauk brei kham merat ngak bahar hu rilo bruk daoh tamia jeng yau dom bruk ialmu karei yau peih tal bac daoh bhap bini...meng khik hu ialmu daoh tamia Cam"

          Khik ramik saong patagok ilamu nghe thuat, abih di nyu nan lac daoh tamia Cam jeng yau dom bangsa takik di ban raya Ho Chi Minh, rik tame paglaong raidiuk jalan sahaneng  di bhap bini, ngak kaya meda gilang ilamu nghe thuat dom bangsa Viet Nam. Yau nan ye, caong khin hu dom gah, brei daong rilo jang ka bruk khik ramik saong patagok dom ilamu meng kan di dom bangsa./.