Jaik tha thun ini mai, adit halei jeng yau nan, tal melam harei suk saong sanecar, dom adei daok di palei Kon Nhên saong xã Đak Ruồng chreih chrai jak gauk tame sang anai Ngô Thị Ly piah puac tapuk. Tal urak ini, gilang tapuk di sang anai Ly lac labik hu mbaok di 40 uranaih saong bilan hè hu rilo jang, labaih 80 adei. Hu mbaok di gilang tapuk meng tuk camereip bahrau tabiak rai, hu tame dom bruk ngak di anai Ly ba tabiak, adei Hoàng Nhật Lệ, bac tal 6 brei thau:

“Adei mai ini bac hu rilo kadha biak gheih. Hu daoh, hu tamia. Hu bac megru saong dom ayut. Hu bac dom kadha birau saong puac dom baoh tapuk siam ka drei yau baoh tapuk adei takre lac duah thau dunya saong dom baoh tapuk ka sajarah dakrai di negar drei. Biak bui, biak sambai”

Bruk njauk biai di gilang tapuk sang anai Ly nan lac oh hu siphau tui iek dom bruk ngak di gilang. Dom adei langiu di puac tapuk di gilang jeng meda  nyim ba nao sang  iek. Yau nan min tapuk di gilang oh lahik nao bo daok dak harei dak rilo jang. Tuk birau padang tabiak, gilang tok hu dua klau rituh baoh tapuk, urak ini  hu tal labaih 1.000 baoh tapuk. Nan mai meng bruk anai Ngo Thi Ly ngak brei ka dom adei thau khik ramik tapuk saong iek gilang tapuk yau di sang drei. Dom adei mai ini oh lac bac tapuk saoh bo daok thau sangka, klah rabha saong dom ayut di drei. Adei Nguyễn Thanh Phong, bhian mai puac tapuk di gilang ini brei thau:

“ Meng tuk gilang bahrau peih, dahlak hu jak dom ayut dalam puk nao pataom tapuk mai caik tame gilang. Dahlak hu khan ao, atau katap kadung klak dahlak ba mai brei ka dom ayut oh ka hu, piah pandar.

Ndem ka bruk padang ngak gilang tapuk ka dom adei di palei, anai Ly lac, tuk daok dara anai bhian ngak bruk Đoàn dam dara. Tuk mai daok di palei Kon Nhên mboh dom adei kurang tapuk, mbao piah iek, piah bac, kurang labik mein mbuan laik tame dom kadha oh lagaih meng sahaneng tal bruk padang gilang tapuk. Camereip sa-ai gaok rilo kan kandah, gauk gar dalam sang oh brei ngak, dom amaik ame dalam palei oh jia. Min dom kein lagaih bo gilang tapuk ba mai ka dom adei sit dalam palei saong ka dua urang anek di anai  nyu ngak ka urang jia saong pachreih tui. Sai-ai Trần Thị Thúy, urang jakar dân số xã Đăk Ruồng sang daok di palei Kon Nhên brei thau:

Băng: “Adei daok pak ini hu 7 thun paje, mboh dom kamuan oh hu labik me-in. Melam mai, dom amaik ame njauk nao duah anek mai sang. Meng tuk hu gilang tapuk, harei suk, harei car halei jeng yau nan, 5 tuk biar harei dom adei mbang huak bloh, menei ia njuh bloh  ba gauk mai gilang tapuk. Dom amaik ame di dom adei jeng mboh biak bui sambai meng tuk hu gilang tapuk ini. Mboh anek di drei thau khik rup pabhap haci hacih, thau bruk hagait njauk ngak, pandap hagait njauk mbang, oh daok nao me-in ban glai ban klo yau dahlau tra”     

Maong sa-ai Ngô Thị Ly tacei dom uraniah palei Kon Nhên jalan pilih tapuk lagaih haong umo thun di drei, bui sambai tuk pato dom adei pasram daoh, pasram tamia dalam ragu ragam chreih chrai, oh thei sahneng mboh bruk di sa-ai lac sa urang jakar địa chính xã. Yaom lac ngak bruk di xã atah di sang labaih 10km, bruk ngak di sa urang kumei jakar đia chính biak glaih glar, min sa-ai Ly biak sangka tal dom uraniah palei Kon Nhên, sangka pasiam gilang tapuk di sang drei, urak ini meda lac gilang tapuk di dom uraniah. Kadha daok khin ngak di sa-ai Ngô Thị Ly lac tal tuk pahadar 127 thun harei menek Wa Hồ 19/5 anak tal, sa-ai peih bruk pahadar sa thun padang gilang tapuk. Bruk njauk bui sambai jang nan lac bruk ngak kandang joa di sa-ai Ngô Thị Ly hu karja palei, dom kapul ngak pahla saong rilo bhap bini thau tal saong abih hatai daong brei./.