Urang Cam di Bình Thuận hu ilimo gheih mekre. Dom inem krung saong dom yaom glaong ilimo di bhapbini Cam pak ini tal urak ini daok khik saong ngak gheih ka ilimo Viet Nam. Piah khik ramik dom yaom glaong ilimo nan, tỉnh Bình Thuận hu padang pasak parang iek ilimo Cam saong yaom jien buh tame abih tih labaih 18 tỷ đồng. Hadei di tuk peih tabiak, pasak parang iek ilimo Cam Bình Thuận lac labik pataom mbaok bhapbini Cam di dom harei rija roya, dom harei ngak adat praong, tết cổ truyền di bangsa. Saong daok lac labik rivang, mein gheih mekre pachreih hu tuai damuai dalam taneh ia saong langiu taneh ia mai duah thau, roh duah ilimo Cam.

 3 thun gilac mai ini, pasak parang iek ilimo Cam Bình Thuận jeng labik pagun gauk di bhapbini Cam saong rilo tuai damuai di dom harei xuân. Dalam langik li-an, dom menuac jeng ba gauk tame pasak, labik daok rah tabiak bruk họp báo xuân athak thaih thun 2014. Ini lac bruk ngak kayua pasak pambuak bruk saong Gilang tapuk tỉnh peih tabiak piah duh tuai damuai saong bhapbini puk palei mai bui sambai tết. Dom harei ini, meng gah dalam tal langiu pasak hu tun menhek bingu, dok hala Đảng, laha dok taneh ia, hala dok khan bai lai tame dom kadha daoh pok je Đảng pok je Wa Ho saong bilan xuân ngak brei chreih chrai bui sambai. Yut Yli Thanh Thư di xã Phan Hiệp, huyện Bắc Bình, tỉnh Bình Thuận oh paduak hu kadha uan tabuan di drei tuk gam saong dom yut mai mein di ini. Thanh Thư brei thau, urak ini daok lac sinh viên thun puac gah Dược, sang bac Đại học Y dược ban raya Hồ Chí Minh, thun halei jeng yau nan, tết mai, xuân tal adei hu mai pak ini.

Thun ini, njauk ndom tal di abih dalam dom bruk rah tabiak di ini nan lac danakdak daoh saong gauk saong melam hội hóa trang meda rah tabiak di melam 2/2/2014 nan lac 3 bingun tết. Ini lac tuk piah ka dom yut sinh viên, dam dara di 3 xã hu rilo bhapbini Cam lac Phan Hiệp, Phan Hòa, Phan Thanh hu taom gaok ndom biai nao mai haong dom nghệ nhân di kapul daoh tamia Cam huyện Bắc Bình. Tui mban peih ngak, dom thí sinh tame pakacah hóa trang njauk ta-eng drei thiết kế piah hóa trang tui dom menuac bo drei takre pagam saong asal dalikan dalam raidiuk di bhapbini bian gaok. Tui ong Lâm Tấn Bình – Akaok pasak parang iek ilimo Cam Bình Thuận, akaok mban peih ngak dom bruk ilimo Cam tết athak thaih brei thau lac: “Peih ngak dom bruk mein ilimo Cam dalam dom harei tết athak thaih thun 2014 piah pachreih hu tuai damuai mai ravang, roh duah saong caong khin di bhapbini hu mein di harei tết cổ truyền di ba8ngsa. Taphia nan, rik daong paglaong akaok sahaneng di bhapbini Cam dalam bruk khik saong patagok ilimo phi vật thể mengkan di bangsa”.

Taphia dom bruk nan, di ini daok hu harei pataom pakacah paglaong tangin ngak lan am Mỹ nghệ saong menyim mengkan mbang yaka 4/2014. Langiu di nan daok hu parang iek jalan ngak dom janih ahan mengkan ye: Nong ya, Sakaya, tapei lik…ini lac dom janih pandap mbang oh kurang dalam salao tuk pok tagok muk kei di harei rija roya di urang Cam. Gam iek ilimo mbang menyum, tuai damuai daok hu iek dom nghệ nhân di kapul daoh tamia Cam Bắc Bình parang me-in dom kadha daoh tamia mengkan. Bruk ini nyu ba bui sambai chreih chrai ka urang iek. Jeng ye ong Đoàn Kẹo – sa urang daok di xã Phan Hiệp, huyện Bắc Bình, tỉnh Bình Thuận jeng mboh biak bui sambai tuk mai tal pasak parang iek ilimo Cam. Ong ndom lac dom bruk ngak ini lac bruk ngak hu makna glaong, bruk nan rik tame jang ka bruk khik dom yaom ilimo Cam”  

Meng dom bruk ngak siam mekre, hu makna rilo, pasak parang iek ilimo Cam Bình Thuận jeng labik gaok gauk harei xuân ka bhap bini urang Cam saong tuai damuai./.

 Kadha vak di Jasi